ព័ត៌មានជាតិ

ប្រធានព្រឹទ្ធសភាធុញទ្រាន់នឹងថៃដែលនៅតែទូរស័ព្ទមកសុំចរចាឱ្យបើកព្រំដែន

បានផុស

១១ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

ប្រធានព្រឹទ្ធសភា សម្ដេចតេជោ ហ៊ុន សែន បានផ្ដាំទៅថៃឈប់បោកប្រាស់ជនជាតិខ្លួនឯងទៅ ក្នុងពេលដែលនៅតែបន្តទូរស័ព្ទសុំឱ្យមានការចរចាជាមួយកម្ពុជាបើកព្រំដែនឡើងវិញ។ សម្ដេចបានបញ្ជាក់ថាកម្ពុជានឹងមិនចរចារឿងបើកព្រំដែនជាមួយថៃជាដាច់ខាត ព្រោះថៃជាអ្នកបិទដោយខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីជួបជុំសិស្ស និស្សិត បុគ្គលិកអប់រំនៅមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង ព្រឹកថ្ងៃទី៣ ខែកក្កដា ឆ្នាំ២០២៥នេះ សម្ដេចតេជោ ហ៊ុន សែន មានប្រសាសន៍ថា ថៃអ្នកបិទហើយថៃក៏ត្រូវតែជាអ្នកបើក សូមកុំនាំកម្ពុជាចរចាលើរឿងនេះឱ្យសោះ បើមិនចង់អាម៉ាស់ចំពោះប្រជាជនខ្លួនឯងនិងចង់បើកព្រំដែនវិញ សូមប្រាប់ពលរដ្ឋខ្លួនឯងទៅថាចាប់ពីពេលនេះការកែសម្រួលពេលវេលាត្រូវបានបញ្ចប់ និងដំណើរការធម្មតាវិញទៅរួចរាល់ហើយ។

សម្ដេចតេជោថា៖ «កុំនិយាយភូតប្រជាជនខ្លួនឯង! ខាងនេះអត់មានឱ្យមានការចរចារឿងបើកច្រកព្រំដែនទេ។ ព្រោះរឿងអ្នកឯងបិទគឺអ្នកឯងបិទខ្លួនឯង ឬថាកែសម្រួលក៏កែសម្រួលខ្លួនឯងទៅ កុំដល់ចង់កែសម្រួលវិញអ្នកឯងមកបបួលគេចរចា។ [..] យើងអត់ត្រូវការមកញ៉ែប៉ប្រែ ចរចាមិនចរចា រវល់តែនឹងហៅទូរស័ព្ទសួរ យី!ពិបាកម្លេះវ៉ើយ! ខ្ញុំថាប្រកាច់ព្រាត់ប្រាស់ទៅណាទៅឱ្យបាត់ទៅពិបាកណាស់!»។

ក្នុងឱកាសនេះសម្ដេចក៏បានឱ្យដឹងថាទីប្រឹក្សាពិសេសនាយករដ្ឋមន្ត្រី និងជាតំណាងរាស្ត្រជប៉ុនលោក NAGASHIMA Akihisa ក្នុងពេលជួបជាមួយសម្ដេចបានលើកឡើងពីការលំបាកទាក់ទងនឹងការបិទព្រំដែននេះដោយសារក្រុមហ៊ុនជប៉ុនដែលរកស៊ីនៅថៃ និងកម្ពុជាមិនអាចដឹកទំនិញឆ្លងព្រំដែនបាន។ សម្ដេចថារឿងនេះជារឿងរបស់ថៃដែលជាបង្កមុន។

គួរឱ្យដឹងផងដែរថាប្រទេសថៃបានសម្រេចបិទព្រំដែនដោយឯកតោភាគីកាលពីថ្ងៃទី៧ ខែមិថុនា ឆ្នាំ២០២៥ ដែលធ្វើឱ្យស្ថានការណ៍ព្រំដែនជាមួយកម្ពុជាកាន់តែក្ដៅឡើង។ លើសពីនេះនៅថ្ងៃទី២៣ ខែមិថុនា ទាហានថៃបានសម្រេចបិទច្រកព្រំដែនទាំងអស់ជាមួយកម្ពុជា ហើយកម្ពុជាបានឆ្លើយតបដោយបិទវិញផងដែរ។

យោងតាមការចុះផ្សាយររបស់បាងកកប៉ុស្តិ ដែលដកស្រង់ទិន្នន័យពីនាយកដ្ឋានពាណិជ្ជកម្មបរទេសថៃបានវាយតម្លៃថា ថៃអាចនឹងខាតបង់ជិត២ពាន់លានដុល្លារអាមេរិកបើការបិទព្រំដែននេះដល់ដំណាច់ឆ្នាំ២០២៥នេះ។

កាលពីថ្ងៃទី២៩ ខែមិថុនា កងទ័ពទិសបូព៌ាថៃបានបញ្ជូនលិខិតសុំឱ្យកម្ពុជាបើកច្រកទ្វារព្រំដែនមួយចំនួនជាមួយខេត្តស្រះកែវ តែត្រូវបាននាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ច្រានចោល ដោយប្រាប់ថាឱ្យទៅស្នើសុំពីអ្នកមានអំណាចពិតប្រាកដពីថៃវិញទៅ បើគ្មានការបើកព្រំដែនទាំងអស់ដូចមុនថ្ងៃ៧ មិថុនាទេ កម្ពុជាក៏មិនបើកវិញដែរ៕

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា