ទ័យវត្ថុ បច្ច័យ និងគ្រឿងបរិក្ខា​របស់​សម្តេចធិបតី ហ៊ុន ម៉ាណែត ត្រូវ​បាន​ប្រគេន​ដល់​ព្រះសង្ឃ​គង់​នៅក្នុងវត្តចំនួន១៥១វត្ត និងសាលាបុណ្យចំនួន៥

ទ័យវត្ថុ បច្ច័យ និងគ្រឿងបរិក្ខារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានលោកឃួង ស្រេង អភិបាលនៃគណៈអភិបាលរាជធានីភ្នំពេញនិងលោកជំទាវជា ស៊ីណាឃួង ស្រេង នាំទៅប្រគេនដល់វត្តចំនួន១៥១វត្តនិងសាលាបុណ្យចំនួន៥ នៅក្នុងរាជធានីភ្នំពេញសំរាប់ ពិធីបុណ្យចូលព្រះវស្សាដើម្បីលើកតម្កើងវិស័យព្រះពុទ្ធសាសនាដែលជាសាសនារបស់រដ្ឋ។

កម្មវិធីនេះ បានធ្វើឡើងនៅរសៀលថ្ងៃទី១០ កក្កដា ឆ្នាំ២០២៥ ក្នុងបរិវេណវត្តនាគវន័្ត សង្កាត់បឹងកក់២ ខណ្ឌទួលគោក ក្រោមអធិបតីភាព លោកឃួង ស្រេង អភិបាលនៃគណៈអភិបាលរាជធានីភ្នំពេញនិងលោកជំទាវជា ស៊ីណាឃួង ស្រេង។

តាម​ទំនៀមទម្លាប់​ជាប្រពៃណីនៃព្រះពុទ្ធសាសនា ព្រះសង្ឃទាំងឡាយគ្រប់អារាម​ក្នុង​ព្រះរាជាណាចក្រ​កម្ពុជា​ ត្រូវនិមន្តចូលកាន់ព្រះវស្សាអស់ថេរវេលា ៣ខែចាប់ពីថ្ងៃ១រោចខែអាសាធតទៅ។ ពាក្យថា (វស្សា)ប្រែថា(ភ្លៀងឬរដូវភ្លៀង) ដែលមានកំណត់រយៈ​ពេល​៣ខែ​រាប់​ពី​ថ្ងៃ១រោច ខែអាសាធដល់ថ្ងៃ១៥កើតខែ កត្តិក។

ក្នុងរយៈពេល៣ខែនេះ នៅគ្រប់ព្រះវិហារទាំងឡាយគេតែងរក្សាភ្លើងទៀនព្រះវស្សាធ្វើពីក្រមួនឲ្យិឆេះជានិច្ច។ តែបច្ចុប្បន្ន​នេះ​ដោយសារ​ក្រមួន​ពុំ​សូវ​សំបូរ​គេ​និយមប្រើប្រេងជំនួសវិញ។

ជួនកាលមានព្រះសង្ឃខ្លះពុំបានចូលព្រះវស្សាតាមកំណត់កាលវេលា៣ខែ ដោយមាន​ធុរៈ​អ្វី​មួយ ឬ ដោយ​រោគាពាធ​នោះ លោក​អាច​ចូល​បច្ឆិម​វស្សាបានគឺលោកចូលនៅថ្ងៃ១រោជ ខែស្រាព ហើយត្រូវគិតវស្សាឱ្យគ្រប់៣ខែដូចព្រះសង្ឃ ដែលចូលមុនគឺត្រូវចេញវិញនៅថ្ងៃ១រោជខែកត្តិក ចំពោះទ័យទានដែលត្រូវប្រគេនដល់ព្រះសង្ឃតាមវត្តទាំង១៥១វត្តនិង៥សាលាបុណ្យដោយក្នុង១វត្តនិង១សាលាបុណ្យមាន ៤០ម៉ឺនរៀល,ទៀនវស្សា១គូ,អង្ករ១០០គីឡូក្រាម,សាដកចំនួន១,ស្ករស១បាវ២៥គីឡូក្រាម,ទឹកដោះគោខាប់១កេស,ទឹកក្រូច៤កេស,ទឹកបរិសុទ្ធ៤កេស, មី៤កេសតូច,ត្រីខកំប៉ុង១កេសស្មើ១០០កំប៉ុង។

ក្នុងឱកាសនោះដែរ លោកឃួង ស្រេង អភិបាលនៃគណៈអភិបាលរាជធានីភ្នំពេញនិងលោកជំទាវជា ស៊ីណាឃួង ស្រេង បាន​អញ្ជើញអុជទៀន អុជធុនៅលើព្រះវិហារសុំសេចក្ដីសុខសប្បាយជូនប្រជាពលរដ្ឋក្នុងរាជធានីភ្នំពេញនាចូលព្រះវស្សានេះ៕

ដោយ ៖ ស្រីរ័ត្ន