ទីបំផុតមានក្លិបគុនខ្មែរដំបូងគេ នៅប្រ​ទេសចិន ដោយមានសិស្សហាត់ខ្ទង់រយនាក់

ជាដំណើរ​អភិវឌ្ឍ​គុនខ្មែរ​យ៉ាង​ល្អ​ ដោយ​មានក្លិបប្រដាល់គុនខ្មែរមួយ និងជាក្លិបគុនខ្មែរដំបូងគេ បានលេចរូបរាងឡើងនៅក្នុងប្រទេសចិន ហើយមានសិស្សចូលហាត់ដល់ខ្ទង់ ១០០ នាក់ជាង។

យោងតាមសហព័ន្ធប្រដាល់គុនខ្មែរ បានឱ្យដឹងថា កាលពីថ្ងៃ អង្គារ៍ ទី ១៥ ខែ កក្កដា ឆ្នាំ ២០២៥ លោក​ ខូវ ឆាយ ប្រធានសហព័ន្ធកីឡាប្រដាល់គុនខ្មែរ និងជាអគ្គលេខាធិការស្តីទី សហព័ន្ធគុនខ្មែរអន្តរជាតិ បានចូលរួមជាអធិបតីក្នុងពិធីសម្ពោធដាក់​ឲ្យ​ដំណើរការជាផ្លូវការ ក្លិប​ប្រដាល់គុនខ្មែរដំបូងគេនៅប្រទេសចិន ដែលមានកីឡាករជាង ១០០ នាក់។

ក្នុងឱកាសនោះក៏មានការអញ្ជើញចូលរួមជាកត្តិយសពីសំណាក់ លោក ទុន ថុនា អគ្គ​កុងស៊ុលព្រះរាជាណាចក្រកម្ពុជាប្រចាំទីក្រុងក្វាងចូវ និងលោក ឡៅ ងួនអេង អនុព័ន្ធពាណិជ្ជកម្មអមស្ថានអគ្គកុងស៊ុលប្រចាំទីក្រុងក្វាងចូវ ព្រមទាំងលោកប្រធានសមាគមប្រដាល់គុនចិនប្រចាំទីក្រុងទុងគួន និងសហការីផងដែរ។

គួរបញ្ជាក់ថា ក្លិបប្រដាល់នេះមានទីតាំងស្ថិតនៅទីក្រុងទុងគួន ខេត្តក្វាងទុង សាធារណរដ្ឋប្រជាមានិតចិន។ ដោយឡែកនៅថ្ងៃស្អែកទី ១៦ ខែកក្កដា នឹងបន្តសម្ពោធក្លិបគុនខ្មែរ ៤ ទៀតនៅទីក្រុងឈុងឆីង ប្រទេសចិន និងនៅថ្ងៃទី ១៧ ខែកក្កដា នឹងបន្តសម្ពោធក្លិបគុនខ្មែរចំនួន ២ ផ្សេងទៀតនៅទីក្រុងឆឹងទូ ខេត្តស៊ីឈួន ប្រទេសចិន៕

អត្ថបទ៖ សេម កុសល