Update៖ ករណីឆេះក្នុងអគារខុនដូនៅផ្លូវ២១៧​សង្កាត់ស្ទឹងមានជ័យទី១ កើតឡើងដោយសារឆ្លងចរន្ដពីម៉ាស៊ីនបោកខោអាវ

កាលពីវេលាម៉ោង០៨និង៥០នាទីយប់ថ្ងៃទី ១៩ ខែកក្កដា ឆ្នាំ២០២៥ មានករណីអគ្គិភ័យឆេះបន្ទប់ខុនដូជាន់ទី១១ នៃអគ្គខុនដូមួយកន្លែងនៅផ្លូវលេខ២១៧ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ ករណីនេះត្រូវបានកម្លាំងជំនាញបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចុះអន្តរាគមន៍ដល់កន្លែងកើតហេតុភ្លាមៗ ដើម្បីទប់ស្កាត់កុំឲ្យមានការរាលដាលដល់បន្ទប់ផ្សេងទៀត និងគ្រប់គ្រងបានទាំងស្រុង។

តាមការបញ្ជាក់ពីមន្ត្រីជំនាញ ករណីនេះ កើតឡើងដោយសារការឆ្លងចរន្ដអគ្គិសនីពីម៉ាស៊ីនបោកខាវអាវ។​ តាមប្រភពព័ត៌មានពីប្រជាពលរដ្ឋបានអោយដឹងថា មុនកើតហេតុ គេបានឃើញអ្នកស្នាក់នៅខាងលើអគារខុនដូ មានការឆោឡោរត់ចុះមកក្រោម និងបានប្រាប់ថា មានអគ្គិភ័យឆេះបន្ទប់នៅជាន់ទី១១ ។ ភ្លាមៗ ពលរដ្ឋដែលនៅក្បែរនោះបាន មើលទៅមើលក៏ឃើញមានអណ្តាតភ្លើងយ៉ាងសន្ធោសន្ធៅ ចេញពីបន្ទប់កើតហេតុ ទើបអ្នកឃើញហេតុការណ៍ ប្រញាប់រាយការណ៍ជូនសមត្ថកិច្ច ចុះមកអន្តរាគមន៍ ការពាររាលដាល។

អគ្គិភ័យនេះបានឆាបឆេះអស់ម៉ាសុីនបោកខោអាវ និងសម្ភារៈប្រើប្រាស់អស់មួយចំនួន តែមិនបង្កអោយមនុស្សរងរបួសនោះឡើយ។ ក្នុងនោះរថយន្តពន្លត់របស់ស្នងការដ្ឋាននគរបាលរាជធានីភ្នំពេញ មកដល់ទីតាំងចំនួន ០៤គ្រឿង និង រថយន្តជំនួយរបស់ Khmer Beverages ០១គ្រឿង ពន្លត់អោយរលត់ជាស្ថាពរ។ ចំពោះមូលហេតុ សមត្ថកិច្ចបានសន្និដ្ឋានថា បណ្តាលមកពីឆ្លងចរន្តអគ្គិសនី ចេញពីម៉ាសុីនបោកខោអាវ បង្កជាអណ្តាតភ្លើង៕

អត្ថបទ៖ រដ្ឋា