សម្តេច ម៉ែន សំអន តែងតែយកចិត្តទុកដាក់ចំពោះបញ្ហាសុខភាពរបស់ វីរនារីដោះមីន គង់ សារឿន

សម្តេច​កិត្តិ​សង្គហ​បណ្ឌិត ម៉ែន សំអន អ្នកតំណាងរាស្ត្រ​មណ្ឌល​ស្វាយរៀង តែងតែ​យកចិត្ត​ទុកដាក់​ចំពោះ​បញ្ហា​សុខភាព​របស់ វីរនារី​ដោះមីន គង់ សារឿន ជា​រឿយៗ​តាំងពី​មិនទាន់មាន​ជំងឺ​មក​ម្ល៉េះ។ ប៉ុន្តែ មកដល់​ថ្ងៃនេះ​ ក្រោយ​ទទួលដំណឹង​ថា លោកស្រី គង់ សារឿន វីរនារី​ដោះ​មីន​កំពុងស្ថិត​ក្នុង​សភាព​ជំងឺ​ធ្ងន់ធ្ងរ​កំពុង​សង្គ្រោះបន្ទាន់​រួចមក ​នា​រសៀល​ថ្ងៃ​ចន្ទ ៩​រោច ខែស្រាព​ណ៍ ឆ្នាំម្សាញ់ សប្តស័ក ព​.​ស​. ២៥៦៩ ត្រូវ​នឹង ថ្ងៃទី​១៨ ខែសីហា ឆ្នាំ​២០២៥ សម្តេច​កិត្តិ​សង្គហ​បណ្ឌិត ម៉ែន សំអន ក៏​ប្រញាប់ប្រញាល់​អញ្ជើញ​ចុះមក​សួរសុខទុក្ខលោកស្រី គង់ សារឿន វីរនារី​ដោះមីន​នៅ​សម័យ​សង្គ្រាម និង​ក្រោយ​សម័យ​សង្គ្រាម ដែល​កំពុង​សម្រាក​ព្យាបាល​ជំងឺ​រលាក​សួត និង​ដុំ​សួត ធ្ងន់ធ្ងរ នៅ​មន្ទីរពេទ្យ​ព្រះ​កេតុមាលា រាជធានី​ភ្នំពេញ​តែម្ដង។

សម្តេច​កិត្តិ​សង្គហ​បណ្ឌិត ក៏បាន​ជូនពរ​ដល់ លោកស្រី គង់ សារឿន ឆាប់​ជាសះស្បើយ និង​មាន​សុខភាព​ល្អប្រសើរ​ឡើងវិញ​។ លោកស្រី គង់ សារឿន បាន​ថ្លែងអំណរគុណ ដល់​សម្តេច​កិត្តិ​សង្គហ​បណ្ឌិត តែងតែ​យកចិត្ត​ទុកដាក់ និង​សួរសុខទុក្ខ នៅពេលដែល​មក​សម្រាក​ព្យាបាល​នៅ​មន្ទីរពេទ្យ។

សូម​បញ្ជាក់​ថា បច្ចុប្បន្ន លោកស្រី គង់ សារឿន កំពុង​សម្រាក​ព្យាបាល​ជំងឺ​រលាក​សួត និង​ដុំ​សួត ធ្ងន់ធ្ងរ និង​ស្ថិតក្រោម​ការតាមដាន​ និង​ព្យាបាល​ដោយ​យកចិត្ត​ទុកដាក់​ពី​សំណាក់​គ្រូពេទ្យ​ជំនាញ​នៃ​មន្ទីរពេទ្យ​ព្រះ​កេតុមាលា៕

អត្ថបទ ៖ វិមាន