ខេត្តថៃ Ubon Ratchathani រងការវាយប្រហារពីគ្រោះរញ្ជួយដីកម្រិត ៤.៧ រ៉ិចទ័រ

យោងតាមការចេញផ្សាយរបស់ The Nation ខេត្ត Ubon Ratchathani ភាគខាងកើតប្រទេសថៃបានរងការវាយប្រហារពីគ្រោះរញ្ជួយដីកម្រិត៤.៧ រ៉ិចទ័រ ខណៈចំណុចកណ្ដាលនៃរញ្ជួយនៅប្រទេសវៀតណាម។

នាយកដ្ឋានឧតុនិយមថៃបានរាយការណ៍ពីការរញ្ជួយដីកម្រិត ៤.៧ រ៉ិចទ័រ នៅព្រឹកថ្ងៃព្រហស្បតិ៍ទី១១ខែកញ្ញានេះ ដោយចំណុចកណ្តាលរបស់វាមានទីតាំងនៅប្រទេសវៀតណាម ចម្ងាយប្រហែល ៣៤៦ គីឡូម៉ែត្រភាគខាងកើត ខេត្ត Ubon Ratchathani ។ បើតាមនាយកដ្ឋានអង្កេតការរញ្ជួយដី ការរញ្ជួយដីនេះត្រូវបានគេរកឃើញនៅម៉ោង ១ និង ៣៦ ព្រឹក នៅជម្រៅរាក់ត្រឹមតែ ២ គីឡូម៉ែត្រ ប៉ុន្តែនៅមានការព្រមានពីសុវត្ថិភាព។

អាជ្ញាធរ​បាន​ថៃបានជំរុញឲ្យប្រជាពលរដ្ឋមានការប្រុងប្រយ័ត្នខ្ពស់ តាមដានព័ត៌មានផ្លូវការ និងត្រៀមខ្លួនក្នុងករណីមានសកម្មភាពរញ្ជួយដីបន្ថែមទៀត បើទោះបីជាការ​រញ្ជួយ​ដី​នេះ​មិន​ត្រូវ​បាន​គេ​រំពឹង​ថា​នឹង​បង្ក​ការ​ខូច​ខាត​ដល់​អាយុ​ជីវិត ឬ​ទ្រព្យសម្បត្តិ​ធ្ងន់ធ្ងរនៅ​ក្នុង​ប្រទេស​ថៃ​ក៏ដោយ។

មកដល់ពេលនេះទាំងនៅក្នុងប្រទេសថៃនិងវៀតណាមមិនទាន់មានការរាយការណ៍ពីអ្នកស្លាប់ របួសនិងការខូតខាតនៅឡើយនោះទេ។

គួរបញ្ជាក់ថាប្រទេសថៃចាប់តាំងពីមានការរញ្ជួយដីដ៏ធំកាលពីខែមីនាពីប្រទេសមីយ៉ាន់ម៉ាមក ប្រទេសនេះជារើយៗរងការវាយប្រហារពីគ្រោះរញ្ជួយដីកម្រិតស្រាលជាបន្តបន្ទាប់ ដែលបង្កជាការភ័យខ្លាចក្នុងចំណោមប្រជាជនថៃ៕

អត្ថបទ៖ ប៊ុន សុភាព