អាហារូបករណ៍ថ្នាក់ភាសាអង់គ្លេស ៣៥០កន្លែង របស់មូលនិធិសម្តេចក្រុមព្រះ នរោត្តមច័ក្រពង្ស់

មូលនិធិសម្តេចក្រុមព្រះ នរោត្តម ច័ក្រពង្ស់ បានផ្តល់អាហារូបករណ៍ ៣៥០កន្លែង ទៅកាន់សិស្សទើបតែបញ្ចប់ការសិក្សាថ្នាក់ទី ១២ និងសិស្សានុសិស្សទូទៅ សិក្សាថ្នាក់ភាសាអង់គ្លេសគ្រប់កម្រិត នៅវិទ្យាស្ថានភាសាបរទេស សាខាអូរប្ញស្សី នៃសាកលវិទ្យាល័យបញ្ញាសាស្ត្រកម្ពុជា តាមរយៈ ការប្រោសព្រះរាជទាននៃសម្តេចក្រុមព្រះ នរោត្តម ច័ក្រពង្ស់។

អាហារូបករណ៍នេះ ក្រោមកិច្ចសហប្រតិបត្តិការរវាង មូលនិធិសម្តេចក្រុមព្រះ នរោត្តម ច័ក្រពង្ស់ និង សាកលវិទ្យាល័យបញ្ញាសាស្ត្រកម្ពុជា គឺដើម្បីផ្តល់ឱកាសដល់សិស្សានុសិស្សបន្តការសិក្សា ក្នុងការកសាងអនាគតដ៏វែងឆ្ងាយ និងកសាងធនធានសម្រាប់ប្រទេសជាតិ។ ឱកាសអាហារូបករណ៍នេះ មិនត្រឹមតែជាជំនួយសម្រាប់ការសិក្សាទេ ប៉ុន្តែបង្ហាញពីទឹកចិត្តសប្បុរសធម៌ កតញ្ញូចំពោះជាតិ និងជាចំណែកមួយដ៏ធំដើម្បីជួយទៅដល់ សិស្សក្រីក្រ និងសិស្សមកពីគ្រួសារពលី និងគ្រួសារភៀសសឹក។ នេះបើតាមការផុស របស់មូលនិធិសម្តេចក្រុមព្រះ នរោត្តម ច័ក្រពង្ស់ុ។

សម្រាប់សិស្សានុសិស្សដែលមានបំណងដាក់ពាក្យអាហារូបករណ៍នេះ អាចដាក់ពាក្យបានតាមរយៈតំណភ្ជាប់៖ https://forms.gle/xtXSn2QZ5MCngA5aA ។ ផុតកំណត់ទទួលពាក្យ នៅថ្ងៃទី ២១ ខែកញ្ញា ២០២៥។ សូមបញ្ជាក់ថា អាហារូបករណ៍ នេះ បានតែសិស្សចំនួន ៣៥០នាក់ដំបូងតែប៉ុណ្ណោះ និងតាមកម្រិត សមត្ថភាព ជីវភាព និងការដាក់ពាក្យរបស់អ្នកសិក្សា៕