ព័ត៌មានអន្ដរជាតិ

ពូទីន៖ រុស្ស៊ីបង្កើនផលិតកម្មអាវុធប្រភេទខ្លះរហូតដល់ជិត៣០ដងឯណោះ

បានផុស

៩ ខែ មុន

នៅ

ថ្ងៃសៅរ៍ ២០ កញ្ញា ២០២៥

ដោយ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានលើកឡើងថា រុស្ស៊ីបានបង្កើនការផលិតសព្វាវុធយ៉ាងខ្លាំងក្នុងសង្គ្រាមជាមួយអ៊ុយក្រែនជាង៣ឆ្នាំកន្លងមកនេះ ដោយប្រភេទអាវុធខ្លះត្រូវបង្កើនការផលិតរហូតដល់ជិត៣០ដងលើផលិតកម្ម។

ប្រធានាធិបតីរុស្ស៊ី លោក វ៉្លាឌីមៀរ ពូទីន ពេលចុះពិនិត្យនៅរោងចក្រផលិតសព្វាវុធ Motovilikha។ TASS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍របស់ទីភ្នាក់ងារព័ត៌មានរុស្ស៊ី TASS នៅថ្ងៃទី១៩ខែកញ្ញា បានឲ្យដឹងថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសប្រាប់បុគ្គលិកកម្មករ នៅពេលលោកកំពុងចុះពិនិត្យនៅរោងចក្រ Motovilikha ថា រុស្ស៊ីបានបង្កើនការផលិតសព្វាវុធមួយចំនួនមានចំនួនច្រើនខ្លាំងណាស់ ហើយសម្រាប់ផលិតផលខ្លះទៀតមានច្រើនរហូតដល់ជិត៣០ដង។

លោកពូទីន ត្រូវបានស្រង់សម្តីដូចបាននិយាយថា៖«សម្រាប់ប្រភេទអាវុធមួយចំនួន សម្រាប់ផលិតផលមួយចំនួន ការផលិតរបស់យើងបានកើនឡើងមិនតិចភាគរយនោះទេ ប៉ុន្តែច្រើនដង៖ ២ដង ៣ដង ១០ដង ១៥ដង និងសម្រាប់ផលិតផលខ្លះរហូតដល់៣០ដង ហើយគុណភាពបានប្រសើរឡើង។ បច្ចេកវិទ្យាកាន់តែទំនើប និងមានតម្រូវការ។»

លើសពីនេះ វិមានក្រិមឡាំង បានស្រង់សម្តីពិធីសំណេះសំណាលរបស់លោក ពូទីន ទៅកាន់កម្មករក្នុងរោងចក្រផលិតអាវុធ ដោយនិយាយថា៖«ខ្ញុំសង្ឃឹមថា សហគ្រាសរបស់អ្នកបានឆ្លងកាត់នូវពេលវេលាដ៏លំបាកនេះផងដែរ។ អ្នកប្រហែលជាអាចឃើញវាដោយខ្លួនឯង៖ ស្ថានភាពនៅទីនេះ កន្លែងផលិតទាំងនេះគឺខុសគ្នាខ្លាំងពីអ្វីដែលមានកាលពីមុននេះ។ ឥឡូវនេះអ្វីៗត្រូវបានស្ដារឡើងវិញ ហើយអ្វីៗកំពុងដំណើរការ»។

វិមានក្រឹមឡាំង បានចេញផ្សាយសម្តីលោក ពូទីន បន្ថែមថា៖«ខ្ញុំសង្ឃឹម និងជឿជាក់ថា ព្រឹត្តិការណ៍ដែលទាក់ទងនឹងប្រតិបត្តិការយោធាពិសេសនឹងបញ្ចប់ទៅនៅទីបំផុត ប៉ុន្តែតម្រូវការសម្រាប់កងកម្លាំងប្រដាប់អាវុធទំនើប និងមានសមត្ថភាព នឹងមិនថមថយឡើយ។ ផ្ទុយទៅវិញ យើងនឹងបន្តអភិវឌ្ឍកងកម្លាំងប្រដាប់អាវុធ ដើម្បីធ្វើឱ្យកាន់តែទំនើប រួមបញ្ចូលគ្នាតែមូយ និងមានថាមពលខ្លាំង។ ហើយបើគ្មានការខិតខំប្រឹងប្រែងរបស់អ្នក បើគ្មានឧស្សាហកម្មការពារជាតិ នេះនឹងមិនអាចទៅរួចទេ»។

លោកពូទីនបានកត់សម្គាល់ថា រោងចក្រផលិតអាវុធការពារជាតិ Motovikha Plants គឺជាសហគ្រាសតែមួយគត់ដែលមានអាយុកាលជិត៣០០ឆ្នាំ ហើយរោងចក្រនេះគឺជាកន្លែងផលិតប្រព័ន្ធកាំភ្លើងធំពេញលេញ។

សង្គ្រាមនៅប្រទេសអ៊ុយក្រែនបានផ្ទុះឡើងកាលពីថ្ងៃទី២៤ខែកុម្ភៈឆ្នាំ២០២២ ពេលដែលលោក ពូទីន បញ្ជាឲ្យមានប្រតិបត្តិការយោធាពិសេស ប៉ុនប៉ងផ្តួលរំលំរដ្ឋាភិបាលអ៊ុយក្រែនដឹកនាំដោយ ប្រធានាធិបតី វ៉ូឡូឌីមៀរ ហ្សេលេនស្គី ដែល លោក ពូទីនចោទថា លំអៀងទៅរកបស្ចឹមប្រទេស ប៉ុនប៉ងចូលអង្គការណាតូ ដែលគាំទ្រកំហែងដល់សន្តិសុខរុស្ស៊ី៕

រ៉ាន់ រើយ

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា