ក្រសួងអប់រំ រៀបចំប្រឡង អានអត្ថបទ ស្មូតកំណាព្យ និងតែងនិពន្ធ អបអរទិវាអំណានលើកទី ៧

ក្រសួងអប់រំ យុវជន និងកីឡា ប្រកាសរៀបចំប្រឡង អានអត្ថបទ ស្មូតកំណាព្យ និងតែងនិពន្ធ ពានរង្វាន់ សម្ដេចតេជោ ហ៊ុន សែន ដើម្បីអបអរទិវាអំណានលើកទី ៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី ៣១ ខែមករានេះ បានជម្រាបមក ប្រធានមន្ទីរអប់រំ យុវជន និងកីឡារាជធានី ខេត្តជ្រាបថា ក្រសួងអប់រំ យុវជន និងកីឡា នឹងរៀបចំកម្មវិធីប្រឡងប្រណាំង អានអត្ថបទ ស្មូតកំណាព្យ និងតែងនិពន្ធ ជ្រើសរើសជ័យលាភីថ្នាក់ជាតិចំណាត់ថ្នាក់លេខ១ ដល់ លេខ៣ ទទួល ពានរង្វាន់ សម្ដេចតេជោ ហ៊ុន សែន ដើម្បីអបអរសាទរទិវាជាតិអំណានលើកទី៧ ថ្ងៃទី ១១ មីនា ២០២២ ក្រោមប្រធានបទ “អំណានជួយលើកកម្ពស់គុណភាពជីវិតក្នុងសង្គមឌីជីថល”។

លោក ហង់ ជួនណារ៉ុន ស្នើលោក លោកស្រី ប្រធាន រៀបចំដំណើរការប្រឡងប្រណាំងជ្រើសរើសជ័យលាភី លេខ១ ថ្នាក់ក្រោមជាតិទាំងបីវិញ្ញាសា ដោយថតជាវីដេអូ (វិញ្ញាសាអានអត្ថបទ និងស្មូតកំណាព្យ) និងស្នាដៃសំណៅដើម របស់ជ័យលាភីផ្នែកតែងនិពន្ធ រួចបញ្ចូនមកនាយកដ្ឋានអភិវឌ្ឍកម្មវិធីសិក្សាឱ្យបានមុនថ្ងៃទី ២២ ខែកុម្ភៈ ឆ្នាំ ២០២២ ជាកំហិត។

វិញ្ញាសាប្រឡងប្រណាំង៖

– ការតែងនិពន្ធ(អត្ថបទពាក្យកាព្យ ឬពាក្យរាយ) សម្រាប់សិស្សមធ្យមសិក្សាទុតិយភូមិ

– ការស្លូតកំណាព្យ សម្រាប់សិស្សមធ្យមសិក្សាបឋមភូមិ

– ការអានអត្ថបទ សម្រាប់សិស្សបឋមសិក្សា(សិស្សថ្នាក់ទី៤ ដល់ទី៦)។

កាលបរិច្ឆេទ និងទីកន្លែងប្រឡងប្រណាំង៖

– កាលបរិច្ឆេទប្រឡងប្រណាំងយកជ័យលាភីថ្នាក់ជាតិ ថ្ងៃទី៩ ដល់ទី១០ ខែមីនា ឆ្នាំ២០២២

– ទីកន្លែង អគាររដ្ឋបាលថ្មីក្រសួងអប់រំ យុវជន និងកីឡា (ជាប់សាលាបឋមសិក្សាចៅពញាហុក)

– ទំនាក់ទំនង លេខទូរសព្ទ និងតេឡេក្រាម ០១២ ៩២ ៨៦ ៩១។

គួរបញ្ជាក់ថា ការជម្រាបខាងលើ ធ្វើតាមកម្មវត្ថុ ការអនុវត្តសេចក្ដីណែនាំលេខ ៤៧អយក.សណន ស្តីពី ការប្រារព្ធទិវាជាតិអំណាន ១១ មីនា ចុះថ្ងៃទី ៤ ខែធ្នូ ឆ្នាំ២០១៧ និងដោយយោងតាម អនុក្រឹត្យលេខ ១២០អនក្រ.បក ស្ដីពី ទិវាជាតិអំណាន ចុះថ្ងៃទី១៤ ខែកញ្ញា ឆ្នាំ២០១៥៕

អត្ថបទ៖ ច័ន្ទ ​វីរៈ