វប្បធម៌ ជំនឿ

បទយកការណ៍៖ តារាបណ្ដាញសង្គមមួយចំនួន បំពុលសង្គម ច្រើនជាងជួយសង្គម

បានផុស

៤ years មុន

នៅ

ថ្ងៃអង្គារ ២ វិច្ឆិកា ២០២១

ដោយ

បណ្ដាញទំនាក់ទំនងសង្គម គឺជាមធ្យោបាយទំនាក់ទំនងពេញនិយមនៅក្នុងពិភពលោក ដែលគេហៅថាជាប្រភេទបណ្ដាញសង្គមមួយយ៉ាងទំនើប និងពេញនិយម ដែលមនុស្សប្រើប្រាស់ដើម្បី តាមប្រព័ន្ធអនឡាញ (Online)។ ជារៀងរាល់ថ្ងៃមាន ប្រជាជនរាប់លានអ្នកបានប្រើប្រាស់បណ្ដាញសង្គម មានដូចជា Facebook YouTube Instagram TikTok Linkedin និង Twitter ជាដើម ដើម្បីបង្កើត ឬភ្ជាប់ទំនាក់ទំនង ចែករំលែក និងផ្លាស់ប្ដូរព័ត៌មាន ឬទស្សនៈជាមួយសមាជិកគ្រួសារ មិត្តភក្ដិ ការងារ ការធ្វើអាជីវកម្ម ការផ្សាយពាណិជ្ជកម្ម ការសិក្សា ការពង្រីកបណ្ដាញ ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ មានសាធារណជនមួយចំនួន បានប្រើប្រាស់បណ្ដាញសង្គម រហូតទទួលបានចំណាប់អារម្មណ៍ និងប្រជាប្រិយភាព ហើយត្រូវមហាជន និងអ្នកគាំទ្រ ហៅពួកគេថាជា តារា Facebook ឬ តារា Tiktok ទៀតផង។ តារា Facebook ឬ តារា Tiktok ខ្លះ បានបង្ហោះនូវរូបភាពស្អាតៗ សកម្មភាពកម្សាន្ត សកម្មភាពសប្បុរសធម៌ ព្រមទាំងការផ្សព្វផ្សាយលក់ផលិតផលផងដែរ។ ហើយដើម្បីកាន់តែទាក់ទាញចំណាប់អារម្មណ៍កាន់តែខ្លាំងពីមហាជនចូលមើល ចូល Like, Comment, Share ឬដើម្បីឱ្យអតិថិជនឱ្យតាមដាន និងទិញទំនិញផលិតផលរបស់ខ្លួនផងនោះ មានតារាបណ្ដាញសង្គមខ្លះ បានបញ្ចេញសកម្មភាព ការស្លៀកពាក់ ការតុបតែងប្លែកៗ កំប្លែងៗ មានបង្ហាញលុយកាក់ទ្រព្យធន ភាពហ៊ឺហា ភាពស៊ិចស៊ី ឬមានតារា Facebook ឬ តារា Tiktok ខ្លះ បានលើកយកបញ្ហាក្នុងគ្រួសារមកលាតត្រដាង ឬមានជម្លោះហែកហួរ ឆ្លើយឆ្លង និងប្ដឹងផ្ដល់ សុំទោសគ្នាថែមទៀតផង។

តើសកម្មភាពអវិជ្ជមានទាំងនេះ ជះឥទ្ធិពលអ្វីខ្លះដល់សង្គម? តើក្រសួងស្ថាប័នពាក់ព័ន្ធយល់ឃើញ និងមានវិធានការទប់ស្កាត់ដូចម្ដេចខ្លះ?

លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈ មានប្រសាសន៍ថា តាមការសង្កេតឃើញសកម្មភាពរបស់តារាហ្វេសប៊ុកមានកន្លែងខ្លះមិនសមរម្យក្នុងការបង្ហាញជាសាធារណៈ ក៏ព្រោះតែដើម្បីបានផលប្រយោជន៍ដែលខ្លួនចង់បាន ដែលនេះជាសេរីភាពក្នុងការសម្ដែងរបស់គាត់ ហើយពេលគាត់ធ្វើបែបនោះមានអ្នកចូលមើលគាត់ច្រើន គាត់អាចរកចំណូលបាន។

លោក ឡុង ប៉ុណ្ណាស៊ីរីវត្ថ លើកឡើងថា៖ “ប៉ុន្តែសកម្មភាពភាពមានភាពមិនសមរម្យទាំងនោះអាចជះឥទ្ធិពលទៅលើកូនក្មេងដែលមិនទាន់ចេះពិចារណា ថាជាការពិត ឬការសម្ដែង ហើយក្មេងៗអាចយកតម្រាប់តាម។ ជួនកាលពេល រដ្ឋមន្ត្រីបង្រៀនតាម Facebook Youtube មិនសូវមានអ្នកចូលមើលទេ តែបើគេ ឈ្លោះគ្នា ធ្វើ ឬហូបអ្វីប្លែកៗ មានអ្នកចូលមើលរាប់ K (រាប់ពាន់នាក់)”។

អ្នកនាំពាក្យក្រសួងវប្បធម៌ និងវិចិត្រសិល្បៈ ខាងលើនេះ មានប្រសាសន៍ថា កន្លងមកមានប្រកាសរួមមួយដែលមានក្រសួងព័ត៌មាន ក្រសួងមហាផ្ទៃ ក្រសួងប្រៃណីយ៍ ដាក់វិធានការលើការផ្សព្វផ្សាយ ការបង្ហាញដែលធ្វើឱ្យប៉ះពាល់ដល់សណ្ដាប់ធ្នាប់សង្គម ធ្វើឱ្យអស្ថេរភាពសង្គមជាដើមនោះ គឺសុទ្ធតែមានទោស ដែលនេះជាវិធានការទប់ស្កាត់សកម្មភាពមិនគប្បី រួមទាំងក្រមព្រហ្មទណ្ឌ ក្រមរដ្ឋប្បវេណី ដែលអ្នកធ្វើទៅមានការប៉ះពាល់គេ ឬបរិហាកេរ្តិ៍អ្នកដទៃ សុទ្ធតែមានទោសដែលបានចែងក្នុងច្បាប់ ដែលកន្លងមកក៏មានសមត្ថកិច្ចចុះអនុវត្តកិច្ចការនេះតាមនីតិវិធីជាបន្តបន្ទាប់ដែរ។

លោក ឡុង ប៉ុណ្ណាស៊ីរីវត្ថ មានប្រសាសន៍ថា៖ “អ្នកបង្ហោះវីដេអូលើ ហ្វេសប៊ុក ឬ យូធូប យើង [ក្រសួងវប្បធម៌] គ្មានសិទ្ធិទៅបិទគណនីគេទេ ទាល់តែយើងមានហេតុផលច្បាស់លាស់ថា សកម្មភាពនោះធ្វើឱ្យប៉ះពាល់ដល់ស្ថេរភាពសង្គម រឿងប្រទេសជាតិនោះ ទើបយើងធ្វើលិខិតស្នើទៅក្រុមហ៊ុនហ្វេសប៊ុក ហើយគេពិនិត្យស្រួលបួល ទើបគេបិទគណនីនោះបាន។ បើយើងគ្រប់គ្រងតឹងរឹងខ្លាំង គេថាបំបិទសេរីភាព។ តែបើសកម្មភាពនោះ សម្ដែងលើស្ថានីយ៍ទូរទស្សន៍ ឬជាក្រុមហ៊ុនបណ្ដាញសារព័ត៌មានជាដើមនោះ នោះក្រសួងព័ត៌មាន អាចបិទបានភ្លាម”។

លោក ឡុង ប៉ុណ្ណាស៊ីរីវត្ថ មានប្រសាសន៍បន្តថា៖ “ពួកគាត់ជាប្រជាពលរដ្ឋ បើក្រសួងវប្បធម៌ និងវិចិត្រសិល្បៈអញ្ជើញពួកគាត់មកណែនាំ ក៏មិនត្រូវ លើកលែងតែគាត់នៅក្នុងក្របខណ្ឌវប្បធម៌ នោះទើបយើងមានក្រមសីលធម៌សិល្បករ ឬពួកគាត់មានសមាគមន៍សិល្បៈជាដើមនោះ ទើបយើងអាចអញ្ជើញគាត់មកណែនាំអប់រំ ឬណែនាំតាមសមាគមន៍នោះ។ កន្លងមក សិល្បករខ្លះ បើអញ្ជើញមកអប់រំហើយនៅមិនរាងចាល យើងបានផ្ញើលិខិតជូនក្រសួងព័ត៌មានដើម្បីផ្អាកអញ្ជើញពួកគាត់ឡើងសម្ដែងតាមកម្មវិធីនៃស្ថានីយ៍ទូរទស្សន៍អាចមានរយៈពេល១ឆ្នាំអីជាដើម”។

រដ្ឋលេខាធិការ ក្រសួងវប្បធម៌ និងវិចិត្រសិល្បៈ ដដែលនេះ មានប្រសាសន៍ថា ថ្វីដ្បិតតែមហាជន ឬប្រជាពលរដ្ឋ មិនមែនជាអ្នកសិល្បៈស្ថិតក្រោមក្រសួងវប្បធម៌ និងវិចិត្រសិល្បៈ ប៉ុន្តែបើបុគ្គលណាធ្វើអ្វីដែលប៉ះពាល់ដល់សណ្ដាប់ធ្នាប់សង្គម ឬធ្វើឱ្យសាធារណជនមានប្រតិកម្មមិនពេញចិត្តខ្លាំង នោះសមត្ថកិច្ចនឹងចុះទៅបង្ក្រាបមិនចាំបាច់មានការប្ដឹង។ ជាមួយគ្នានេះ នៅពេលមហាជនតាមដានតែអ្វីដែលផ្ដល់គុណប្រយោជន៍ និងចំណេះដឹង ហើយឈប់ចាប់អារម្មណ៍ និងមិនចូលមើល ឬ Like Comment គាំទ្រសកម្មភាពមិនសមរម្យទាំងនោះ នោះម្ចាស់ខ្លួននឹងឈប់ហើយ។

សូមជម្រាបថា បើតាម គេហទំព័រ Geeks in Cambodia បង្ហាញថា នៅក្នុងឆ្នាំ២០១៩ ប្រទេសកម្ពុជាមានអ្នកប្រើប្រាស់ហ្វេសប៊ុក (Facebook) ប្រមាណ ៨លាន ៨សែននាក់ ដែលជាកំណើនយ៉ាងរហ័សបើធៀបទៅនឹងឆ្នាំ២០១៧ ដែលមានក្រោម ៥លាននាក់ប៉ុណ្ណោះ។ ចំណែក YouTube ស្ថិតក្នុងចំណាត់ថ្នាក់លេខ២ មានជិត ២លាននាក់ តាមពីក្រោយដោយ Instagram ជាង ៧សែននាក់ Tik Tok ប្រហែល ៥សែននាក់ Linkedin ជាង ៣សែននាក់ និង Twitter ប្រមាណ ២សែននាក់។

ងាកមកសាកសួរមតិយោបល់ពីក្រសួងព័ត៌មានវិញម្ដង លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន មានប្រសាសន៍ថា ដោយសារការរីកចម្រើននៃប្រព័ន្ធព័ត៌មានវិទ្យា បណ្ដាញផ្សព្វផ្សាយសង្គមនេះ គឺប្រជាពលរដ្ឋកម្ពុជាមានសិទ្ធិប្រើប្រាស់បណ្ដាញសង្គមយ៉ាងទូលំទូលាយ។ ជាទូទៅយើងសង្កេតឃើញថា ប្រជាពលរដ្ឋខ្លះប្រើប្រាស់បណ្ដាញសង្គមនេះ ដើម្បីប្រយោជន៍ការងារ ទំនាក់ទំនង និងការប្រកបអាជីវកម្មជាដើម។ ជាមួយគ្នានេះ យើងសង្កេតឃើញ ប្រជាពលរដ្ឋមួយចំនួនមិនបានប្រើប្រាស់បណ្ដាញសង្គមដោយត្រឹមត្រូវ ឬផ្ដល់ជាប្រយោជន៍ដល់សង្គម ក៏ដូចជាខ្លួនឯងទេ។

លោក មាស សុភ័ណ្ឌ មានប្រសាសន៍បន្តថា៖ “ខ្ញុំយល់ឃើញថា ក្នុងនាមជាអ្នកប្រើប្រាស់បណ្ដាញសង្គម ដើម្បីចែករំលែកព័ត៌មាន ព្រឹត្តិការណ៍ ឬហេតុការណ៍អ្វីមួយ គួរតែពិនិត្យ និងយកចិត្តទុកដាក់នូវការចែករំលែកព័ត៌មានពិត មានប្រភពច្បាស់លាស់ ឬចែករំលែកអ្វីដែលប្រកបដោយការយល់ដឹង និងភាពទទួលខុសត្រូវ ដើម្បីចៀសវាងការចែករំលែករបស់ខ្លួនប្រែជាខុសឆ្គង ឬប៉ះពាល់ដល់សិទ្ធិរបស់អ្នកដទៃ”។

មន្ត្រីក្រសួងព័ត៌មានខាងលើ លើកឡើងថា ប្រជាពលរដ្ឋអ្នកប្រើបណ្ដាញហ្វេសប៊ុកធម្មតាដែលមិនមែនជាសារអ្នកព័ត៌មាន មិនស្ថិតក្រោមការគ្រប់គ្រងរបស់ក្រសួងព័ត៌មាន ដែលក្រសួងអាចហៅ មកអប់រំណែនាំទេ។ ដូចនេះអ្នកប្រើប្រាស់បណ្ដាញហ្វេសប៊ុក គួរប្រើឱ្យមានប្រយោជន៍ និងប្រកបដោយភាពទទួលការខុសត្រូវ។

លោក មាស សុភ័ណ្ឌ បញ្ជាក់ថា៖ “បើគាត់ប្រើប្រាស់បណ្ដាញសង្គមដែលមិនត្រឹមត្រូវ ឬប៉ះពាល់ដល់សេចក្ដីថ្លៃថ្នូរ ឬសិទ្ធិអ្នកដទៃ នោះគាត់ត្រូវទទួលខុសត្រូវចំពោះមុខច្បាប់ ដោយអាចរកបណ្ដឹងទៅដល់អាជ្ញាធរ ឬតុលាការទៀតផង”។

គួរជម្រាបបន្ថែមថា ប្រជាជនកម្ពុជាដែលប្រើប្រាស់បណ្ដាញសង្គមហ្វេសប៊ុកមានអាយុចន្លោះពី ១៣ឆ្នាំរហូតដល់ជាង ៦០ឆ្នាំ។ ប៉ុន្តែចំនួនប្រជាជនដែលប្រើប្រាស់ច្រើនជាងគេ គឺជាយុវជនដែលមានអាយុចន្លោះពី ២២ ដល់ ២៦ឆ្នាំ ដែលមានប្រមាណ ៣៣% នៃអ្នកប្រើប្រាស់សរុប។ ប្រជាជនកម្ពុជាបច្ចុប្បន្នមានចំនួន ១៦ ៨៨៤ ២៨៤ នាក់គិតត្រឹម ខែមីនា ឆ្នាំ២០២១។ គិតត្រឹមខែឧសភា ឆ្នាំ២០២១នេះ របាយការណ៍បានឱ្យដឹងថា ប្រទេសកម្ពុជាមានអ្នកប្រើប្រាស់បណ្ដាញសង្គមហ្វេសប៊ុកប្រមាណ ១០,៩ លាននាក់។

ជាមួយគ្នានេះ លោក លីវ សុផាណារិទ្ធិ អនុរដ្ឋលេខាធិការ និងជាអ្នកនាំពាក្យ ក្រសួងប្រៃសណីយ៍ និងទូរគមនាគមន៍ មានប្រសាសន៍ថា តារាហ្វេប៊ុកមួយចំនួនចូលចិត្តធ្វើអ្វីដែលប្លែកៗ ឬទាក់ទាញចំណាប់អារម្មណ៍ ដែលនេះគឺជាវិធីសាស្ត្រធ្វើអាជីវកម្មរបស់ពួកគាត់ ដើម្បីទាក់ទាញអ្នកចូលមើលវីដេអូ ឬការ Live របស់គាត់ ដោយគាត់អាចបង្កើតជារឿងផ្សេងៗ។ គ្រាន់តែថា ការបំពុលសង្គមនេះ មិនមែនសុទ្ធតែខុសនឹងច្បាប់ទេ គឺអាចត្រឹមតែខុសសីលធម៌។ បើជាទង្វើខុសច្បាប់ នឹងមានក្រសួងពាក់ព័ន្ធត្រួតពិនិត្យចាត់វិធានការបញ្ឈប់មិនខាន។

លោក លីវ សុផាណារិទ្ធិ មានប្រសាសន៍ថា៖ “កន្លងមក ទាក់ទងនឹងការលក់ផលិតផលក្លែងក្លាយ ឬខុសច្បាប់ គឺសមត្ថកិច្ចបានចុះទៅណែនាំ ឬកសាងសំណុំរឿងទៅតុលាការជាដើម។ ហើយចំណែកអ្នកដែលមានសកម្មភាពខុស ឬពាក្យសម្ដីមិនសមរម្យ ខុសសីលធម៌ខុសវប្បធម៌នោះ ក្រសួងក៏បានហៅមកណែនាំអប់រំឱ្យលុបឃ្លីបវីដេអូនោះចេញ ហើយបើធ្វើខុសច្បាប់ គឺក្រសួងមានវិធានការស្នើទៅក្រុមហ៊ុនហ្វេសប៊ុកដើម្បីបិទ Page គណនី របស់បុគ្គលដែលធ្វើខុសច្បាប់”។

អ្នកនាំពាក្យ ក្រសួងប្រៃសណីយ៍ និងទូរគមនាគមន៍ រូបនេះបានអំពាវនាវ សូម តារាបណ្ដាញសង្គម និងមហាជនទូទៅ ធ្វើ ឬបង្ហោះបង្ហាញអ្វីដែលស្របច្បាប់ ហើយរួមគ្នាជ្រោមជ្រែងជួយលើកតម្កើងវប្បធម៌ អរិយធម៌ជាតិយើងទាំងអស់គ្នា។

លោក លីវ សុផាណារិទ្ធិ មានប្រសាសន៍បន្តថា៖ “សូមកុំមើលឃើញតែផលចំណេញផ្ទាល់ខ្លួន ហើយមិនគិតដល់ផលប៉ះពាលដល់ប្រជាពលរដ្ឋ និងក្មេងៗដែលប្រើប្រាស់បណ្ដាញសង្គម ដែលខ្វះការយល់ដឹង ហើយសូមប្រកបអាជីវកម្មដោយគុណធម៌ សីលធម៌ និងការទទួលខុសត្រូវខ្លួនឯង ព្រោះការប្រើប្រាស់បណ្ដាញសង្គមនេះមានអ្នកទស្សនាច្រើនទូលំទូលាយណាស់ មិនមែនដូចរោងកុននោះទេ។

ពិតណាស់ បណ្ដាញសង្គមបានផ្តល់អត្ថប្រយោជន៍វិជ្ជមានជាច្រើនដល់អ្នកប្រើប្រាស់ ប៉ុន្តែក្នុងពេលជាមួយគ្នា វាក៏អាចបង្កជាបញ្ហា ឬគ្រោះថ្នាក់ដល់អ្នកប្រើប្រាស់ផងដែរ ប្រសិនបើមិនចេះប្រើវាឱ្យបានត្រឹមត្រូវ។ ផលប៉ះពាល់ចេញពីអ្នកប្រើប្រាស់ផ្ទាល់វិញ គឺកង្វះចំណេះដឹងរបស់អ្នកប្រើប្រាស់តែម្តង។ ពួកគេអាចផ្សព្វផ្សាយ ឬចែករំលែកព័ត៌មានដែលមានភាពអវិជ្ជមាន អសីលធម៌ ការជេរប្រមាថ ការបរិហារកេរ្តិ៍អ្នកដទៃ ការប្រើប្រាស់ពាក្យពេចន៍អសុរោះ ដែលអាចធ្វើឱ្យកុមារ ឬយុវជនយកគំរូតាម និងមានអាកប្បកិរិយារស់នៅមិនល្អនៅក្នុងសង្គម។

យោងតាមក្រមព្រហ្មទណ្ឌនៃព្រះរាជាណាចក្រកម្ពុជា មាត្រា ៣០៥ បានឱ្យនិយមន័យបទល្មើសបរិហារកេរ្តិ៍ជាសាធារណៈថា គ្រប់ការអះអាងបំផ្លើស ឬការទម្លាក់កំហុសដោយអសុទ្ធចិត្តលើអំពើណាមួយ ដែលនាំឱ្យប៉ះពាល់ដល់កិត្តិយស ឬកិត្តិសព្ទនៃបុគ្គល ឬនៃស្ថាប័នណាមួយ គឺជាការបរិហារកេរ្តិ៍។ ដោយហេតុតែ “បទបរិហារកេរិ៍ដជាសាធារណៈ” ពុំមែនជាអំពើមួយដែលឃោរឃៅ ពុំទទួលរងនូវផលប៉ះពាល់ធ្ងន់ធ្ងរដល់សន្តិសុខសង្គម ដូច្នេះហើយនៅក្នុងក្រមព្រហ្មទណ្ឌ ពុំមានការចែងដាក់ទោសជាប់ពន្ធនាគារចំពោះជនដែលបានប្រព្រឹត្តបទល្មើសនោះឡើយ ពោលគឺជនណាដែលប្រព្រឹត្តអំពើបរិហារកេរិ៍្តជាសាធារណៈចំពោះបុគ្គល ឬស្ថាប័នណាមួយ នឹងត្រូវទទួលការផាកពិន័យជាប្រាក់ និងផ្តល់ជាសំណងរដ្ឋប្បវេណីដើម្បីជួសជុលព្យសនកម្មដល់ជនរងគ្រោះតែប៉ុណ្ណោះ។ ការផ្តន្ទាទោសក្នុងបទល្មើសបរិហារកេរ្តិ៍ជាសាធារណៈ ត្រូវពិន័យជាប្រាក់ពី ១០០,០០០ រៀល ទៅ ១០,០០០,០០០ លានរៀល។

រីឯនីតិវិធីនៃបណ្តឹងចំពោះបទល្មើសនេះ គឺត្រូវអនុវត្តតាមមាត្រា៣០៩ នៃក្រមព្រហ្មទណ្ឌ ដែលបានកំណត់ថា ក្នុងករណីដែលមានការបរិហារកេរ្តិ៍ ចំពោះបុគ្គលឯកជន ការចោទប្រកាន់នឹងត្រូវធ្វើឡើងតាមបណ្តឹងរបស់សាមីខ្លួន ដែលទទួលរងនូវការបរិហារកេរ្តិ៍នោះ។ ពាក្យបណ្តឹងរបស់សាមីខ្លួន ឬប្រធានស្ថាប័នសាមី ដែលមានចែងខាងលើ គឺជាលក្ខខណ្ឌចាំបាច់នៃការចោទប្រកាន់អំពីបទល្មើសព្រហ្មទណ្ឌ ដោយអយ្យការ ហើយការដកពាក្យបណ្តឹងឱ្យជនរងគ្រោះ ឬ ដើមបណ្តឹងរដ្ឋប្បវេណីអាចនាំឱ្យបណ្តឹងអាជ្ញារលត់។ ប៉ុន្តែការចោទប្រកាន់នឹងអាចត្រូវធ្វើឡើងដោយស្វ័យប្រវត្តិដោយព្រះរាជអាជ្ញា កាលបើការបរិហារកេរ្តិ៍នោះ ត្រូវបានធ្វើឡើងប្រឆាំងនឹងបុគ្គលម្នាក់ ឬបុគ្គលមួយក្រុម ដោយមូលហេតុដើមកំណើត ពូជសាសន៍ សញ្ជាតិ ឬសាសនា របស់បុគ្គលនោះ៕

អត្ថបទ៖ ច័ន្ទ វីរៈ

សូមអានព័ត៌មានពាក់ព័ន្ធ៖ មន្ត្រីនាំពាក្យក្រសួងធម្មការ ថ្កោលទោស អ្នកស្លៀកស្បង់ចីពរព្រះសង្ឃ រាំតាមបណ្ដាញសង្គម

Related Topics:បទយកការណ៍