គ្រូចិនសែច្រើន និងប្រាប់ក្បួនខុសគ្នាពេកក្នុងពិធីចូលឆ្នាំចិន លោក អ៊ឹម បុរិន្ទ ចេញបកស្រាយបំភ្លឺការពិត

លោក អុឹម បុរិន្ទ អ្នកហោរាសស្ត្រខ្មែរ និងជាទីប្រឹក្សាអមគណៈកម្មាធិការជាតិ រៀបចំបុណ្យជាតិ អន្តរជាតិ មានប្រសាសន៍ថា នៅប៉ុន្មានឆ្នាំចុងក្រោយនេះ យើងសង្កេតឃើញហោរាគ្រូទាយ ចិនសែរីកព្រោងព្រាតពេញហ្វេសប៊ុក ផេក។ ហើយនៅថ្ងៃជិតដល់ពេលចូលឆ្នាំចិន និងសែនដកជើងធូប ស្រាប់តែឮចិនសែខ្លះថា ថ្ងៃសែនមិនត្រូវពាក់អាវពណ៌នេះពណ៌នោះ គ្រូខ្លះថាហាមពណ៌ក្រហម ពណ៌មាស ពណ៌លឿង។ល។ ហើយឱ្យពាក់ពណ៌ខ្មៅ ពណ៌ខៀវ​ សូម្បីតែរបស់សែនក៏ឱ្យលាភពណ៍ខ្មៅ ឬខៀវដែរ។

លោក មានប្រសាសន៍ថា៖ “ខ្ញុំគិតថា គ្រូច្រើនពេក ខ្មែរខ្សែស្រឡាយចិនប្រហែលកំពុងវង្វេង ហើយមិនដឹងថាធ្វើអ្វីឱ្យត្រូវនោះឡើយ។ សម្រាប់ខ្ញុំសូមជម្រាបបងប្អូនដែលជាខ្មែរសែស្រឡាយចិន (កាត់ចិន) គួរមើលទៅទំនៀមទម្លាប់វិញទើបមិនច្របូកច្របល់”។

លោក លើកឡើងបន្តថា ប្រពៃណីជនជាតិចិន ពណ៌ក្រហមជាពណ៌តំណាងឱ្យជ័យជំនះ ពណ៌ដែលអាចកំចាត់ឧបទ្រព្យទាំងឡាយបាន ហើយសត្វនៀនក៏ខ្លាចពណ៌ក្រហមនេះដែរ។ ដូច្នេះការសែនដកជើងធូបក្ដី សែនចូលឆ្នាំក្ដី ពណ៌ក្រហមជាពណ៌ល្អបំផុត ហើយពណ៌លឿងជាពណ៌ផ្កាអង្គាសីល គឺជាដើមឈើដែលជនជាតិចិនមិនអាចអត់បាននៅក្នុងឱកាសចូលឆ្នាំចិន។

លោក អ៊ឹម បុរិន្ទ្រ បញ្ជាក់បន្ថែមថា៖ “ដូច្នេះចូរសម្លឹងមេីលទៅទំនៀមទម្លាប់ កុំសម្លឹងទៅមេីលហោរាច្រេីនពេក ព្រោះពេលនេះជាពិធីបុណ្យប្រពៃណី មិនមែនបុណ្យហោរាទេ”។

លោកបានលើកឡើងថា នេះជាការល្អម្យ៉ាងដែលមានហោរាជាច្រើនដូច្នេះ ព្រោះងាយស្រួលក្នុងការជួយតម្រង់ទិសការងារ អាជីវកម្មខ្លះៗ។ តាមការសង្កេតរបស់លោក ឥឡូវនេះហោរាកាន់ក្បួនចិន ឬហៅថា ចិនសែ មានការរីកដុះដាលខ្លាំងជាងគេ ហើយក៏ត្រូវប៉ាន់ជាងគេ។ តាមការសង្កេតបន្ត លោកបានឃើញថា ហោរាខ្មែរ ហោរដែលជាអ្នកស្នងរូប ហៅថាខ្មោចចូល ហោរចូលរូប និងហោរមួយចំនួនទៀតបានក្លាយខ្លួនជាចិនសែស្ទើរទាំងអស់ទៅហើយ៕

អត្ថបទ៖ ច័ន្ទ វីរៈ