អ៊ីស្រាអែល បិទផ្លូវមិនឲ្យប្រមុខសម្ព័ន្ធអារ៉ាប់ថ្មី ចូលជួបប្រធានាធិបតី ប៉ាឡេស្ទីន

អគ្គលេខាធិការថ្មីនៃសម្ព័ន្ធអារ៉ាប់ លោក Nabil Fahmy បាននិយាយកាលពីថ្ងៃទី៨ ខែកក្កដា ថា ភាគីអ៊ីស្រាអែលបានរារាំងរូបលោកមិនឲ្យចូលទៅបំពេញទស្សនកិច្ចនៅទីក្រុង Ramallah ដែលនេះគឺជាដំណើរទស្សនកិច្ចទៅក្រៅប្រទេសលើកដំបូងបំផុតរបស់លោក ចាប់តាំងពីបានកាន់តំណែងក្នុងខែនេះមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍ពីការិយាល័យរបស់លោក Fahmy, លេខាធិការដ្ឋាននៃប្លុកតំបន់មួយនេះ ត្រូវបានជូនដំណឹងដោយអាជ្ញាធរប៉ាឡេស្ទីនអំពី ការបដិសេធរបស់អាជ្ញាធរកាន់កាប់អ៊ីស្រាអែល ចំពោះដំណើរទស្សនកិច្ច ទៅកាន់ទឹកដីប៉ាឡេស្ទីនដែលកំពុងរងការកាន់កាប់ ដើម្បីជួបពិភាក្សាការងារជាមួយប្រធានាធិបតីប៉ាឡេស្ទីន លោក Mahmoud Abbas នៅក្នុងទីក្រុង Ramallah។

បច្ចុប្បន្ន រដ្ឋបាលរបស់លោក Abbas គឺជារដ្ឋាភិបាលគ្រប់គ្រងផ្នែកខ្លះនៃតំបន់ West Bank ដែលជាទឹកដីត្រូវបានអ៊ីស្រាអែលចូលកាន់កាប់តាំងពីឆ្នាំ១៩៦៧ មក។ នេះបើយោងតាមសារព័ត៌មានការចេញផ្សាយពិ timesofisrael។

ចាប់តាំងពីសង្គ្រាមនៅតំបន់ហ្គាហ្សា បានផ្ទុះឡើងក្នុងឆ្នាំ២០២៣ មក តំបន់ West Bank បានរងការអង្រួនយ៉ាងខ្លាំង ដោយសារការឆ្មក់វាយប្រហារពីសំណាក់កងទ័ពអ៊ីស្រាអែល ការវាយប្រហារដ៏សាហាវពីក្រុមអ្នកតាំងទីលំនៅថ្មី និងការវាតទីពង្រីកតំបន់តាំងទីលំនៅរបស់ជនជាតិជ្វីហ្វ ដែលសកម្មភាពទាំងនេះត្រូវបានចាត់ទុកថាខុសច្បាប់ក្រោមច្បាប់អន្តរជាតិ។

លោក Fahmy បានលើកឡើងថា ប្រជាជនប៉ាឡេស្ទីននៅក្នុងទឹកដីនោះ កំពុងរងទុក្ខវេទនាពីការឡោមព័ទ្ធនៅក្នុងទីប្រជុំជន និងទីក្រុងនានារបស់ពួកគេ ដែលព័ទ្ធជុំវិញដោយការពង្រីកដីតាំងទីលំនៅ និងផ្លូវថ្នល់សម្រាប់តែអ្នកតាំងលំនៅថ្មី (ជនជាតិជ្វីហ្វ) ប្រើប្រាស់ប៉ុណ្ណោះ ព្រមទាំងកំពុងរងគ្រោះដោយសារអំពើឃោរឃៅ និងអំពើភេរវកម្មពីសំណាក់ក្រុមអ្នកតាំងទីលំនៅថ្មី ដែលទទួលបានទាំងការការពារ និងការលើកទឹកចិត្តពីរដ្ឋអំណាចកាន់កាប់អ៊ីស្រាអែល។

សូមបញ្ជាក់ថា ជើងចាស់ផ្នែកការទូតជនជាតិអេហ្ស៊ីប រូបនេះ បានឡើងមកដឹកនាំសម្ព័ន្ធអារ៉ាប់ ដែលជាប្លុកមានសមាជិក ២២ប្រទេស និងមានទីស្នាក់ការកណ្តាលនៅទីក្រុងគែរ ចំពេលដែលតួនាទីរបស់ប្លុកនេះ ក្នុងនាមជាវេទិកាសម្រាប់សាមគ្គីភាពក្នុងតំបន់ បាននិងកំពុងផ្តោតការយកចិត្តទុកដាក់ស្ទើរតែទាំងស្រុងទៅលើបុព្វហេតុរបស់ប៉ាឡេស្ទីន៕

អត្ថបទ ៖ សាង ស្រីល័ក្ខ

ជំនួប​​ដាច់​ដោយឡែក រវាង​ ត្រាំ និង​មេដឹកនាំ​ អ៊ុយក្រែន និងស៊ីរី ​នឹង​ជារបត់​ភូមិសាស្រ្ត​នយោបាយ​ដ៏សំខាន់​