កីឡា

កីឡាករ ឃឺន ប៊ុនពេជ្រមរក កាលពីក្មេងៗចូលហាត់កីឡាហែលទឹកព្រោះចង់ជិះយន្តហោះពេលចេញប្រកួត

បានផុស

១៧ នាទី មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

កីឡាការិនី ឃឺន ប៊ុនពេជ្រមរក រំលឹកទៅអតីតកាលចូលហ្វឹកហាត់កីឡាហែលទឹកនេះគឺដោយសារចង់ជិះយន្តហោះ ស្របពេលពេលដឹងក្ដីក៏ស្រឡាញ់ និងចង់មានស្នាដៃតបស្នងក្រុមគ្រួសារ និងសង្គមជាតិរហូតដល់សព្វថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី ឃឺន ប៊ុនពេជ្រមរក

កីឡាការិនីផ្នែកហែលទឹកពាក់ជើងទា ឃឺន ប៊ុនពេជ្រមរក បានឲ្យដឹងថា រូបគេចូលហ្វឹកហាត់កីឡាហែលទឹកនេះតាំងតែអាយុប្រហែល ១០ឆ្នាំមកម្ល៉េះ និងមានរយៈពេល ១០ឆ្នាំមកហើយគិតមកដល់សព្វថ្ងៃ។ រូបគេបានផ្លាស់ប្ដូរពីកីឡាហែលទឹកមកហែលទឹកពាក់ជើងទាអំឡុងឆ្នាំ២០២២។

កត្តាដែលនាំឲ្យរូបគេបានចូលហ្វឹកហាត់កីឡាហែលទឹកពាក់ជើងទានេះគឺដោយសារលោកតារបស់ខ្លួនជាគ្រូហែលទឹកផ្នែកប៉ារ៉ាឡាំពិក។ ដូច្នេះទើបមានការជំរុញ និងជួយជ្រោមជ្រែងគ្រប់យ៉ាងរហូតក្លាយជាកីឡាការិនីជម្រើសជាតិដូចពេលនេះ។

កីឡាការិនី ឃឺន ប៊ុនពេជ្រមរក

ទន្ទឹមនិងការជំរុញពីលោកតាហើយនោះរូបគេក៏មានក្ដីស្រមៃចង់ជិះយន្តហោះផងដែរ ព្រោះនៅពេលហាត់មានសមត្ថភាពខ្លាំង ក្លាយជាជម្រើសជាតិ និងបានចេញទៅប្រកួតនៅឯក្រៅប្រទេស។ រូបគេពិតជាមានភាពសប្បាយរីករាយជាខ្លាំងនៅពេលបានសម្រេចបំណងបានជិះយន្តហោះទៅប្រកួតជាច្រើនដងនៅក្រៅប្រទេសមកនេះ។

បច្ចុប្បន្ននេះកីឡាការិនីវ័យ ២០ឆ្នាំរូបនេះកំពុងហ្វឹកហាត់ជាខ្លាំងដើម្បីមានសមត្ថភាពកាន់តែល្អត្រៀមការប្រកួតកម្រិតអន្តរជាតិដូចជាជើងឯកអាស៊ីអាគ្នេយ៍ លើកទី៣ នៅម៉ាឡេស៊ី និងព្រឹត្តិការណ៍សំខាន់ៗជាច្រើនទៀតដើម្បីជាការតបស្នងជូនក្រុមគ្រួសារ និងប្រទេសជាតិ។

ទិដ្ឋភាពហ្វឹកហាត់

បញ្ជាក់ដែរថា ឃឺន ប៊ុនពេជ្រមរក ជាកីឡាការិនីជម្រើសជាតិផ្នែកកីឡាហែលទឹកពាក់ជើងទា។ រូបគេចូលហ្វឹកហាត់កីឡាហែលទឹកនេះប្រហែល ១០ឆ្នាំមកហើយ និងធ្លាប់ឈ្នះមេដាយនៅស៊ីហ្គេម វៀតណាម ស៊ីហ្គេមនៅកម្ពុជា និងមេដាយអាស៊ីអាគ្នេយ៍ជាច្រើនគ្រឿងទៀតផងដែរនាពេលកន្លងមក៕