សុខភាព

ស្ត្រីសម្រាលកូនមានដៃ៤ជើង៤ ទទួលបានការឧបត្ថម្ភពីសប្បុរសជន

បានផុស

៣ years មុន

នៅ

ថ្ងៃអង្គារ ១៨ កក្កដា ២០២៣

ដោយ

ដោយមើលឃើញពីជីវភាពមានការខ្វះខាតសប្បុរសជនមួយចំនួនបានផ្ដល់ប្រាក់ឧបត្ថម្ភជាបន្តបន្ទាប់ជូនប្ដីប្រពន្ធដែលទើបសម្រាលកូនមានកាយសម្បទាចម្លែកមានដៃ៤ជើង៤ ខុសពីទារកធម្មតា។

មន្ត្រីសុខាភិបាលបានឲ្យដឹងថា ស្ត្រីដែលបានសម្រាលកូនមកមិនប្រក្រតីខាងលើនេះមានឈ្មោះ សាំង ឃីម អាយុ៣២ឆ្នាំ និងមានប្តីឈ្មោះ សុខ ខេន អាយុ៣៤ឆ្នាំ មានប្រវត្តិធ្វើចំណាកស្រុកមកពីខេត្តកំពង់ធំ ប៉ុន្តែបច្ចុប្បន្នធ្វើជាកម្មករនៅស្រុកសំពៅលូន ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីដដែលបន្តថា ទារកកើតមកមិនប្រក្រតីនេះមានជើង៤ដៃ៤ ភេទប្រុស មានទម្ងន់៣,៧០០ក្រាម សម្រាលតាមធម្មតា មិនវះកាត់នោះទេ ហើយសុខភាពទារកក៏ធម្មតាដែរ។ ខណះដែលស្ត្រីជាម្តាយបានប្រាប់ថា នេះមិនមែនជាកូនលើកដំបូងទេ តែកូនមុនៗមានសុខភាពល្អធម្មតា ចម្លែកតែកូនលើកនេះបែរជាអភ័ព្វមានកាយសម្បទាខុសប្រក្រតីទៅវិញ។ ស្ត្រីជាម្តាយបានសំណូមពរដល់គ្រូពេទ្យជួយបញ្ជូនបន្តទៅមន្ទីរពេទ្យគុន្ធបុប្ផាក្រែងជួយកែកុនកូនប្រុសរបស់ខ្លួនបាន ទើបមន្ត្រីពេទ្យបំពេញបំណង ហើយក៏នាំគ្នាជួយឧបត្ថមថវិការផ្ទាល់ខ្លួនដល់ស្ត្រីរូបនោះថែមទៀតផង។

មន្ត្រីមន្ទីរពេទ្យនៃរដ្ឋបាលខេត្តបានឲ្យដឹងថា “សេវាសម្រាលកូន និងបញ្ជូនត្រូវបានលើកលែងបង់ថ្លៃទាំងអស់” មិនតែប៉ុ
ណ្ណោះ មានសប្បុរសជនបានបរិច្ចាគធនធានថវិកាជូនក្រុមគ្រួសារទារកថែមទៀតផង ដែលក្នុងនោះមាន លោក អ៊ុយ សុធាវី អភិបាលរងខេត្តបាត់ដំបង ២០០ ០០០៛។ លោកឱសថបណ្ឌិត វឿង ប៊ុនរេត ប្រធានមន្ទីរសុខាភិបាលនៃរដ្ឋបាលខេត្ត២០០០០០៛។ លោក ហម សំខាន់ អភិបាលស្រុកសំពៅលូន ៥០០ ០០០៛។ លោកវេជ្ជបណ្ឌិត ទូត មករា ២០០ ០០០៛។ លោក ទឹម វិឆ័យ អធិការស្រុកសំពៅលូន ១០០ ០០០៛។ លោក ឡា គង់ ជានាយកសាលា EIS ២០០ ០០០៛។

ករណីនេះត្រូវបានប្រជាពលរដ្ឋ និងមហាជនមើលឃើញថា នេះជាកាយវិកាមនុស្សធម៌ពីមន្ត្រីរាជការដែលបានលះបង់ថវិកាផ្ទាល់ខ្លួនជួយដល់ជនទីទល់ដែលកំពុងប្រឈមនឹងជីវភាពគ្រួសារ។ ក្នុងនោះក្រុមគ្រូសាររបស់ទារកត្រេកអរស្ទើររកពាក្យនិយាយមិនកើតជាមួយនឹងទឹកភ្នែករលីងរលោងអ៊ួលដើមករំភើបខ្លាំងពេក ដែលពួកគាត់សង្ឃឹមថា កូនដ៏អភ័ព្វរបស់ពួកគាត់ នឹងអាចជួយបានដោយសុវត្ថិភាពពីមន្ទីរពេទ្យគុន្ធបុប្ផាតាមដែលអាចជួយទៅបាន៕

អត្ថបទ៖ សៅ សារិទ្ធ