ជប៉ុនផ្តល់ជំនួយ ៣សែនដុល្លារ ក្នុងការអភិវឌ្ឍធនធានមនុស្ស និងជួសជុលតំបន់សំបូរព្រៃគុក

រដ្ឋាភិបាលជប៉ុន បានសម្រេចផ្តល់គម្រោងជំនួយថ្មីចំនួន ៣សែនដុល្លារអាមេរិក សម្រាប់ការងារជួសជុលឡើងវិញ ក៏ដូចជាការអភិវឌ្ឍធនធានមនុស្សលើតំបន់រមណីយដ្ឋានសំបូរព្រៃគុកដែលមានឈ្មោះថា “គម្រោងអភិវឌ្ឍន៍ធនធានមនុស្សក្នុងការថែរក្សា និងជួសជុលតំបន់រមណីយដ្ឋានសំបូរព្រៃគុក”។ នេះបើតាមការប្រកាសព័ត៌មានរបស់ក្រសួងវប្បធម៌ នៅថ្ងៃទី១២ ខែធ្នូ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងវប្បធម៌ និងវិចិត្រសិល្បៈបានឱ្យដឹងថា រដ្ឋាភិបាលជប៉ុន បានផ្តល់ជំនួយលើសកម្មភាពក្នុងការថែរក្សា និងជួសជុលតំបន់រមណីយដ្ឋានសំបូរព្រៃគុក ក្នុងរូបភាពចម្បងតាមរយៈគម្រោងមូនិធិដៃគូ មានទឹកប្រាក់សរុបចំនួន ៦៣៨ ៩៦៧ដុល្លារអាមេរិក។ ជាមួយគ្នានេះ ជប៉ុនបានជួយលើសម្ភារៈ និងឧបករណ៍ដេញថ្លៃនានាសម្រាប់ប្រើប្រាស់លើការជួសជុលដែលមានរយៈពេល៤ឆ្នាំ គឺចាប់ពីឆ្នាំ២០០៩ ដល់ឆ្នាំ២០១២។

ដោយឡែក ចាប់ពីឆ្នាំ២០២០ ដល់ឆ្នាំ២០២៤ ជប៉ុនបាន និងកំពុងសាងសង់អគារបណ្តុះបណ្តាល និងផ្តល់សម្ភារៈ ឧបករណ៍មួយចំនួនសម្រាប់ការជួសជុល និងអភិរក្សនៅរមណីយដ្ឋានសំបូរព្រៃគុក។ ទន្ទឹមនេះ ក្រសួងវប្បធម៌ ជឿជាក់ថា តាមរយៈជំនួយកន្លងមក និងជំនួយថ្មីរបស់រដ្ឋាភិបាលជប៉ុន នឹងជួយផ្តល់សមត្ថភាពដល់សិស្ស អ្នកជំនាញវ័យក្មេងកម្ពុជា បានរៀនជំនាញវិជ្ជាជីវៈកម្រិតខ្ពស់ ព្រមទាំងទទួលបានចំណេះដឹងតាមរយៈកម្មវិធីកសាងសមត្ថភាព និងការបណ្តុះបណ្តាលការងារតាមរយៈការអនុវត្តជាក់ស្តែង។ ក្រសួងក៏សង្ឃឹមថា គម្រោងនេះ រួមចំណែកក្នុងការអនុវត្តប្រសិទ្ធិភាព ការថែរក្សា និងជួសជុលតំបន់រមណីយដ្ឋានសំបូរព្រៃគុកផងដែរ៕