ក្រសួងវប្បធម៌ កំពុងសហការជាមួយស្ថាប័នពាក់ព័ន្ធពិនិត្យករណីស្ត្រីម្នាក់យកប្តីពីរក្នុងពេលតែ​មួយ​ប៉ះពាល់ដល់តម្លៃស្ត្រីខ្មែរ

លោក ស៊ុ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ បានមានប្រសាសន៍នៅថ្ងៃទី២៤មីនានេះថា ក្រសួងបាននិងកំពុងសហការជាមួយស្ថាប័នពាក់ព័ន្ធនានា​ ដើម្បីពនិត្យទៅលើករណីស្ត្រីម្នាក់យកប្តីពីរក្នុងពេលតែមួយ ដែលបានផ្សព្វផ្សាយ​នៅតាមបណ្តាញសង្គម ដែលទង្វើនេះបានធ្វើឱ្យប៉ះពាល់ដល់សេចក្តីថ្លៃថ្នូរ និងតម្លៃជាស្ត្រីខ្មែរ ក៏ដូចជាសង្គមជាតិទាំងមូល។

លោក ស៊ុ ម៉ាប់ បាបន្តថា ករណីនេះក្រសួងកំពុងសហការជាមួយស្ថានប័នពាក់ព័ន្ធដើម្បីពិនិត្យមើលថា ត្រូវមានវិធានការយ៉ាងណាចំពោះស្ត្រីរូបនោះ ព្រោះអ្វីដែលស្ត្រីបានផ្សព្វផ្សាយនៅតាមបណ្តាញសង្គមមិនត្រឹមត្រូវនោះទេ ជាទង្វើអសីលធម៌ជាទីបំផុតសម្រាប់សង្គមខ្មែរ និងតម្លៃជាស្ត្រីខ្មែរដែលមិនដែលកើតមានកន្លងមកទេ។

លោក ស៊ុ ម៉ាប់ បានធ្វើការអំពាវនាវដល់អ្នកប្រើប្រាស់បណ្តាញសង្គមទាំងអស់មុននិងផុសអ្វីមួយ គួរតែធ្វើការពិចារណាទៅលើតម្លៃវប្បធម៌ និងប្រពៃណីដ៏ផូរផង់របស់ខ្មែរយើងជាមុនសិន ដូចជាការស្លៀកពាក់ ការប្រើពាក្យពេជន៍ និងបង្ហោះរូបផ្សេងៗ ព្រោះថាបើកាលណាបង្ហោះហើយវានឹងប៉ះពាល់យ៉ាងខ្លាំងដល់សង្គមទាំងមូល។ ជាក់ស្តែងដូចករណីស្ត្រីម្នាក់យកប្តីពីរក្នុងពេលតែមួយដែលបានផ្សព្វផ្សាយនៅតាមបណ្តាញសង្គមនេះជាដើម។

ករណីស្ត្រីម្នាក់យកប្តីពីរក្នុងពេលតែមួយដែលបានផ្សព្វផ្សាយនៅតាមបណ្តាញសង្គមនេះដែរ ត្រូវបានសម្តេចតេជោ ហ៊ុន សែន ធ្វើការរិះគន់ផងដែរកាលពីម្សិលមិញថា «ថ្ងៃនេះខ្ញុំសូមបង្ហាញនូវអារម្មណ៍បុគ្គលដែលមិនពាក់ព័ន្ធជាមួយការងាររបស់រដ្ឋនោះឡើយ។ អ្វីដែលខ្ញុំចង់និយាយគឺទាក់ទងជាមួយស្ត្រីម្នាក់យកប្តីពីរក្នុងពេលតែមួយ និងរស់នៅជាមួយគ្នាជិះរថយន្តជាមួយគ្នាហូបបាយជាមួយគ្នា ធ្វើការជាមួយគ្នា តែខ្ញុំមិនច្បាស់ថា នៅលើគ្រែជាមួយគ្នានោះទេ។ រូបភាពទាំងអស់នេះត្រូវបានចែកចាយលើបណ្តាញសង្គមយ៉ាងទូលំទូលាយ។ តើស្ត្រីម្នាក់នេះយកប្តី២នាក់ពិតប្រាកដ ឬជាការសំដែងដើម្បីទាក់ទាញអ្នកមើល? ប្រសិនបើគាត់យកប្តី២នាក់ពិតប្រាកដ ហើយរស់នៅជាមួយគ្នាគាត់ជាស្ត្រីដ៏មហិមា និងជាស្ត្រីដែលបំផ្លាញប្រពៃណីស្ត្រីខ្មែរខ្លាំងបំផុតក្នុងសម័យទំនើបក្រោយរបប ប៉ុល ពត។

សម្តេចតេជោបានសរសេរទៀតថា បុរសមានប្រពន្ធពីរ ឬលួចមានស្រីខំលួចលាក់ខ្លាចប្រពន្ធឈ្លោះគ្នាផង ខ្លាចច្បាប់ផងខ្លាចប្រពន្ធដឹងផង ព្រមទាំងរដ្ឋធម្មនុញ្ញចែងថា(ប្តីមួយប្រពន្ធមួយ)ផង។ សម្តេចតេជោ ក៏សូមអ្នកដឹងរឿង ឬសាមីខ្លួនជួយបំភ្លឺរឿងនេះផងប្រសិនបើអាចធ្វើទៅបាន៕

អត្ថបទ៖ សំអឿន