ព័ត៌មានជាតិ

កំណាយស្រាវជ្រាវខ្លោងទ្វារខាងត្បូងប្រាសាទតាព្រហ្ម លទ្ធផលរកឃើញថ្មបាយក្រៀមជិត ១០០ ដុំ

បានផុស

២ years មុន

នៅ

ថ្ងៃព្រហស្បតិ៍ ៨ កុម្ភៈ ២០២៤

ដោយ

លោកស្រី នេត ស៊ីមន បុរាណវិទូនាយកដ្ឋានអភិរក្សប្រាសាទនៃអាជ្ញាធរជាតិអប្សរាបានឱ្យដឹងថា ការងារធ្វើកំណាយស្រាវជ្រាវខ្លោងទ្វារខាងត្បូងប្រាសាទតាព្រហ្មធ្វើឡើងក្នុងគោលបំណងធំ ៣ សំខាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរជាតិអប្សរាសហការជាមួយស្ថាប័ន ASI របស់ឥណ្ឌា កំពុងធ្វើកំណាយជួសជុលឡើងវិញខ្លោងទ្វារខាងត្បូងនៃប្រាសាទតាព្រហ្ម ដែលបានរងការខូចខាតទ្រុឌទ្រោមខ្លាំង។

មុនពេលចាប់ផ្តើមការងារជួសជុល ស្ថាប័នស្រាវជ្រាវបុរាណវិទ្យាឥណ្ឌា ( ASI ) ក៏បានសិក្សាប្រមូលព័ត៌មានមុនឈានទៅដល់ការរុះរើជួសជុលខ្លោងទ្វារខាងត្បូងនៃប្រាសាទតាព្រហ្ម។ លោកស្រី នេត ស៊ីមន អះអាងថា នេះគឺជាដំណាក់កាលនៃការជួសជុល ដូច្នេះក្រុមការងារបានរើថ្មនៅផ្ទៃខាងលើទាំងអស់ ដើម្បីចុះបញ្ជីថ្ម ត្រៀមជួសជុលពង្រឹងឡើងវិញ។

លោកស្រីបានសង្កត់ធ្ងន់ថា «ការងារកំណាយស្រាវជ្រាវនេះ យើងធ្វើឡើងមានគោលបំណងសំខាន់ ៣ រួមមាន ទី១. ស្វែងរកថ្មដែលបានបាត់បង់ ទី២.សិក្សាអំពីស្ថានភាពគ្រឹះខ្លោងទ្វារ ស្វែងរកមូលហេតុដែលធ្វើឱ្យខ្លោងទ្វារបាក់រលុះទ្រុឌទ្រោម និងទី៣. ដើម្បីសិក្សាអំពីបច្ចេកទេសនៃការសាងសង់របស់ចាស់បុរាណ ពីរចនាសម្ពន្ធគ្រឹះខាងក្រោមរបស់ខ្លោងទ្វារ»។

ពាក់ព័ន្ធការងារធ្វើកំណាយស្រាវជ្រាវ បានចាប់ផ្តើមតាំងពីពាក់កណ្ដាលខែធ្នូ ឆ្នាំ២០២៣ មានរយៈពេលជិតពីរខែមកហើយ។ បើតាមលោកស្រី នេត ស៊ីមន ក្រុមការងារជីករណ្ដៅបានចំនួន ៥ នៅជុំវិញខឿនរបស់ខ្លោងទ្វារ ដោយបានជីករណ្តៅខ្លះមានជម្រៅចន្លោះពី ៦០ ទៅ ៧០ សង់ទីម៉ែត្រ ដើម្បីស្វែងរកថ្ម ហើយជាលទ្ធផលនៃកំណាយបានរកឃើញថ្មបាយក្រៀមជិត ១០០ដុំ៕