តម្លៃផ្លៃដូងវៀតណាមដាំក្បាលចុះ ដោយសារកង្វល់គុណភាព​បង្កកម្សោយតម្រូវការពីចិន

តម្លៃផ្លែដូងបានដាំក្បាល​ចុះ ២/៣ ឬជិត ៧០% ក្នុងរយៈពេល ៣ ខែចុងក្រោយនេះ ​នៅពេលដែល​បញ្ហាគុណភាព​​ប៉ះពាល់ដល់តម្រូវការពីប្រទេសចិន ​ដែលធ្វើឱ្យ​ផ្លែដូងច្រាល់ចូលទីផ្សារក្នុងស្រុក។ នេះបើតាមការចុះផ្សាយរបស់កាសែត VnExpress។

កសិករឈ្មោះ Hoang នៅខេត្តភាគខាតត្បូង Vinh Long បាន​ប្រាប់ VnExpress ឈ្មួញទិញដូង ១ ឡូ ៤០ ០០០ ដុង (១,៥២ ដុល្លារ) ឥឡូវនេះ ខណៈពួកគេធ្លាប់ទិញ​ ១០០ ០០០ – ១៣០ ០០០ ដុង ​ក្នុង ១ ឡូ កាលពីខែសីហា។ ​

លោកស្រី Hoang បាន​និយាយថា «​ភាគច្រើន​ឆ្នាំនេះ កសិករដាំដូងដូចជាខ្ញុំ ទទួលបានប្រាក់ចំណេញច្រើន ប៉ុន្តែក្នុងរយៈពេលប៉ុន្មានខែថ្មីៗនេះ តម្រូវការបានធ្លាក់ចុះ ដែលធ្វើ​ឱ្យ​តម្លៃធ្លាក់ចុះយ៉ាងខ្លាំង»។

អនុប្រធាន​សមាគមដូងវៀតណាម លោក Cao Ba Dang Khoa បាននិយាយថា នៅឆ្នាំនេះ ក្រុមហ៊ុននាំចេញជាច្រើនបានដឹកជញ្ជូនបរិមាណច្រើនទៅកាន់​ចិនដោយគ្មានការគ្រប់គ្រងគុណភាពត្រឹមត្រូវ ដោយ​កុងតឺន័រផ្ទុយផ្លែដូងតូចធំ និងរសជាតិខុសគ្នាៗចូលគ្នា។ ​លោក​បន្តថា កុងតឺន័រខ្លះត្រូវបាន​​បដិសេធ ដែល​បង្ខំឱ្យពាណិជ្ជករនាំចូលស្រុក ហើយលក់ក្នុងតម្លៃថោកៗ។

អ្នកជំនាញដដែល​បាន​អះអាងថា អំឡុង​ពេល​ធ្វើដំណើរទៅ​ចិនថ្មីៗនេះថា ​តំណាងនៃសមាគមផ្លែឈើទីក្រុង Pingxiang បាន​ប្រាប់លោក​ថា ផ្លែដូងនាំចូលពីវៀតណាម​ជាច្រើនត្រូវបញ្ជូនត្រឡប់ទៅវិញ ដោយសារតែរស់ជាតិផ្អែកអត់ដូចគ្នា ហើយខ្វះ​ព័ត៌មានតាមដានផ្លែឈើ​។

លោកបន្តលើកឡើងថា៖ «អតិថិជននៅទីក្រុងសៀងហៃ ឬប៉េកាំង ​ហ៊ាន​ចំណាយតម្លៃខ្ពស់​ទិញ​ដូង ប៉ុន្តែប្រសិនបើគុណភាពមិនស្ថិតស្ថេរ ក្រុមហ៊ុនវៀតណាមនឹងពិបាកក្នុងការរក្សាអាជីវកម្មរបស់​ខ្លួន​នៅទីនោះ»។

សមាគមដូងវៀតណាម បាននិយាយថា ទីផ្សារអន្តរជាតិមានស្តង់ដារតឹងរ៉ឹងកាន់តែខ្លាំងឡើង​សម្រាប់ផ្លែដូងស្រស់ ​មិនដូចជាដូងកែច្នៃទេ។ បច្ចុប្បន្ន ផ្លែដូងស្រស់​លក់រាយក្នុងតម្លៃប្រហែល ៩០​ ០០០ ដុងនៅទីក្រុងប៉េកាំង និងរហូតដល់ ១២០​ ០០០ ដុងនៅសហរដ្ឋអាមេរិក ដូច្នេះអ្នកនាំចូលទិញវាតែពីកសិដ្ឋានដែលមានវិញ្ញាបនបត្រអន្តរជាតិប៉ុណ្ណោះ។​ នេះបើតាម VnExpress។