ការបិទរដ្ឋាភិបាលអាមេរិក នឹង​កាត់បន្ថយ​ ២០% នៃប្រតិបត្តិការ​ហោះហើរអាមេរិក​

រដ្ឋមន្ត្រីក្រសួងដឹកជញ្ជូនសហរដ្ឋអាមេរិក លោក Sean Duffy បានព្រមានកាលពីថ្ងៃសុក្រថា ​​លោកអាចបង្ខំឱ្យ​ក្រុមហ៊ុនអាកាសចរណ៍អាមេរិក​កាត់បន្ថយជើងហោះហើររហូតដល់ ២០% ប្រសិនបើការបិទទ្វាររបស់រដ្ឋាភិបាលបន្តអូសបន្លាយ ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការព្រមាន​ពីមន្រ្តីជាន់ខ្ពស់អាមេរិកយ៉ាងដូច្នេះ ធ្វើឡើង​ក្រោយ​រដ្ឋបាលអាកាសចរណ៍សហព័ន្ធ (FAA) បានណែនាំក្រុមហ៊ុនអាកាសចរណ៍ឱ្យកាត់បន្ថយជើងហោះហើរ ៤% នៅថ្ងៃសុក្រ ដោយគ្របដណ្ដប់លើ​អាកាសយានដ្ឋានសំខាន់ៗចំនួន ៤០ ដោយសារតែការបិទទ្វាររបស់រដ្ឋាភិបាល។ ការកាត់បន្ថយនេះ នឹងកើនឡើងដល់ ១០% នៅថ្ងៃទី ១៤ ខែវិច្ឆិកា។

ការបិទរដ្ឋាភិបាលបាន​បង្កើន​អវត្តមានរបស់អ្នកគ្រប់គ្រងចរាចរណ៍ផ្លូវអាកាសនៅថ្ងៃសុក្រ បានបណ្តាលឱ្យ FAA ពន្យារពេលជើងហោះហើររាប់រយនៅអាកាសយានដ្ឋានសំខាន់ៗចំនួន ១០ រួមមាន Atlanta, San Francisco, Houston, Phoenix, Washington, D.C. និង Newark។ គិតត្រឹមម៉ោង ៧ កន្លះ យប់ ជើងហោះហើរជាង ៥ ៣០០០ ជើង ត្រូវបានពន្យារ​។ នេះបើយោងតាម ​​​​FlightAware។

គួរគូសបញ្ជាក់ថា រដ្ឋាភិបាលអាមេរិកត្រូវបិទដោយសារតែសភាទាំង២បក្ស មិនឯកភាពលើកញ្ចប់ថវិកាប្រើប្រាស់សហព័ន្ធថ្មី។ មកទល់ថ្ងៃសុក្រ ៧ វិច្ឆិកា វាមាន​រយៈពេល ៣៨ ថ្ងៃហើយ ​ដោយ​បង្ខំឱ្យអ្នកគ្រប់គ្រងចរាចរណ៍ផ្លូវអាកាសចំនួន ១៣ ០០០ នាក់ និងអ្នកត្រួតពិនិត្យសន្តិសុខចំនួន ៥០ ០០០ នាក់ ​ធ្វើការដោយគ្មានប្រាក់ឈ្នួល ដែលនាំឱ្យមានការអវត្តមានកាន់តែច្រើន៕