ថៃគ្រោងដាក់ពន្ធនាំចូលលើគ្រប់ទំនិញអនឡាញ​ថោក​ៗ​​ក្រោម ១ ៥០០ បាត

នាយកដ្ឋានគយរបស់ប្រទេសថៃ នឹងចាប់ផ្តើមដាក់ពន្ធនាំចូលលើទំនិញអនឡាញថោកៗ ដើម្បី​បង្កើនប្រាក់ចំណូលពន្ធ និងគាំទ្រដល់ការប្រកួតប្រជែងដោយ​ស្មើភាពគ្នា​សម្រាប់អាជីវកម្មក្នុងស្រុក ដែលរងគ្រោះដោយសារតែការហូរចូលនៃទំនិញចិនថោកៗ។

តាមការចុះផ្សាយរបស់សារព័ត៌មាន​ The Thaiger ​វិធានការនេះ​ នឹងកំណត់គោលដៅទំនិញថោកៗដែលរួចពន្ធនាពេលកន្លងមក ​ពោលនឹងអនុវត្តចំពោះទំនិញណាមួយដែលមានតម្លៃក្រោម ១ ៥០០ ​បាត (៤៦ ដុល្លារអាមេរិក)។ សូម្បីតែទំនិញដែលមាន​តម្លៃត្រឹម ១ បាត ក៏ត្រូវរងពន្ធនេះផងដេរ។ ​

ប្រធាននាយកដ្ឋានគយថៃ លោក Phanthong Loykulnanta បានប្រកាសពីគោលនយោបាយនេះថាជាផ្នែកមួយនៃយុទ្ធសាស្ត្រ «Quick Big Win» (ឈ្នះធំរហ័ស) របស់រដ្ឋាភិបាល ដោយព្យាករ​ថា វាអាចជំរុញចំណូលពន្ធគយរហូតដល់ ៣ ​ប៊ីលានបាត។ លោក​និយាយយ៉ាងដូច្នេះថា៖ «គោលដៅគឺដើម្បីធានាការប្រកួតប្រជែងដោយយុត្តិធម៌រវាងអ្នកផលិតក្នុងស្រុក និងអ្នកនាំចូលពីបរទេស»។

គួរគូសបញ្ជាក់ថា ក្រសួងពាណិជ្ជកម្មបានចាប់ផ្តើមប្រមូលអាករលើតម្លៃបន្ថែម (VAT) លើការនាំចូលផលិតផលថោកៗរួចហើយ​កាលពីខែកក្កដា ដោយទទួលចំណូលបានប្រហែល ២ ​ប៊ីលានបាត។ ជំហានបន្ទាប់គឺត្រូវអនុវត្តពន្ធនាំចូលចំពោះទំនិញដដែល​ ជាពិសេសទំនិញដែលទិញពីវេទិកា​លក់អនឡាញ​ដូចជា Shopee និង Lazada។

កាលពីឆ្នាំមុន ការនាំចូលទំនិញ​ក្រោម ១ ៥០០ បាតរបស់ថៃ មានចំនួនសរុបប្រហែល ៣០ ប៊ីលានបាត ដែល​នេះ​មានន័យថា អត្រាពន្ធជាមធ្យម ១០% អាចផ្តល់ប្រាក់ចំណូលបន្ថែម ៣ ​ប៊ីលានបាតជារៀងរាល់ឆ្នាំ។លោក Phanthong បានចង្អុលបង្ហាញថា ប្រទេសជាច្រើនទៀត រួមទាំងសហរដ្ឋអាមេរិក បានដាក់ពន្ធលើការនាំចូល​ទំនិញថោយៗរួចហើយ​៕