កម្ពុជា និងជប៉ុននឹងបន្តពង្រឹងកិច្ចសហប្រតិបត្តិការលើពាណិជ្ជកម្ម និងវិនិយោគ​

​ប្រទេសកម្ពុជា និងជប៉ុនកំពុងពង្រឹងកិច្ចសហប្រតិបត្តិការលើពាណិជ្ជកម្ម និងវិនិយោគ តាមរយៈព្រឹត្តិការណ៍ Business Matching ដែលធនាគារACLEDA និងសមាគមជប៉ុន-កម្ពុជា រៀបចំជាដៃគូ ក្នុងការចាប់យក​នូ​វវិស័យសក្តានុពលនានានៅកម្ពុជា។

ព្រឹត្តិការណ៍នេះប្រព្រឹត្តទៅនៅថ្ងៃទី ១២ ខែវិច្ឆិកា នៅស្នាក់ការធនាគារACLEDA ក្នុងរាជធានីភ្នំពេញ ដោយមានការចូលរួមពីក្រុមហ៊ុនជាង ៦០ ក្នុងវិស័យផ្សេងៗ រួមមានផលិតកម្ម កសិកម្ម អចលនទ្រព្យ សំណង់ គ្រឿងសម្អាង បច្ចេកវិទ្យា AI ការរចនាស្ថាបត្យកម្ម និងសេវាកម្មប្រឹក្សា។

លោកស្រី ម៉ារ អាមារ៉ា ប្រធានផ្នែកហិរញ្ញវត្ថុក្រុមធនាគារACLEDA បានបញ្ជាក់ថា ព្រឹត្តិការណ៍នេះមានគោលបំណងជំរុញការចែករំលែកចំណេះដឹង បច្ចេកទេស និងការច្នៃប្រឌិត ដើម្បីបង្កើនកិច្ចសហការរយៈពេលវែងរវាងវិនិយោគិនកម្ពុជា និងជប៉ុន។

គិតត្រឹមដំណាច់ខែកញ្ញា ឆ្នាំ២០២៥ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១១,៩៤ ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៩,២៨​ ប៊ីលានដុល្លារអាមេរិក និងមានអតិថិជនប្រមាណជាង ៦,១៨ លាននាក់។ បច្ចុប្បន្ន ធនាគារ អេស៊ីលីដា មានដៃគូអាជីវកម្ម សរុបច្រើនជាង ០,៦៦លានដៃគូ និងមានអ្នកប្រើប្រាស់អេស៊ីលីដា      ស៊ូភើអេប សរុបចំនួនជាង ៥,២៧លាននាក់។

ប្រធានសមាគមជប៉ុន-កម្ពុជា លោក តាកាហាស៊ី ហ៊ុមអាគី អតីតឯកអគ្គរដ្ឋទូតជប៉ុនប្រចាំកម្ពុជា បាននិយាយថា ក្រុមប្រតិភូជប៉ុនភាគច្រើនជាក្រុមហ៊ុនតូច និងមធ្យម បានមកកម្ពុជាប្រចាំឆ្នាំក្នុងរយៈពេល ៥ ឆ្នាំចុងក្រោយ ដើម្បីបង្កើនទំនាក់ទំនងពាណិជ្ជកម្មជាដៃគូ។

ជប៉ុនជាដៃគូពាណិជ្ជកម្ម និងវិនិយោគសំខាន់របស់កម្ពុជា ដោយមានតម្លៃពាណិជ្ជកម្មទ្វេភាគីលើស $២ ពាន់លានក្នុងរយៈពេលប៉ុន្មានឆ្នាំចុងក្រោយ។ ក្រុមហ៊ុនជប៉ុនបានវិនិយោគក្នុងវិស័យហេដ្ឋារចនាសម្ព័ន្ធ ផលិតកម្ម និងបច្ចេកវិទ្យា ខណៈដែលកម្ពុជានាំចេញសម្លៀកបំពាក់ ផលិតផលកសិកម្ម និងឧបករណ៍អេឡិចត្រូនិកទៅជប៉ុន៕