​កម្ពុជា​មាន​សក្ដានុ​ពល​ផលិត​កម្ម​កសិកម្ម​ ខណៈ​ទីផ្សារ ​និង​ការ​កែច្នៃ​នៅ​មាន​កម្រិត​

វិស័យ​កសិកម្មកម្ពុជា​បាន​ឈាន​ចូល​ដល់​ដំណាក់​កាល​ថ្មី ដែល​ផលិត​កម្ម​កសិកម្ម ​បាន​បន្តកើនឡើង​ឥត​ឈប់ឈរ ​ខណៈ​ទីផ្សារ ​និង​ការ​កែច្នៃ​នៅ​មាន​កម្រិត។​

​លោក អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យ​កសិកម្ម និងជនបទ មានប្រសាសន៍នៅថ្ងៃទី ១៣ ខែវិច្ឆិកា ឆ្នាំ ២០២៥ថា​ កម្ពុជា​មានសក្ដានុពលខ្ពស់​ក្នុងការប្រែក្លាយជាតួអង្គដ៏សំខាន់ នៅក្នុងទីផ្សារ​កសិកម្ម ពិភពលោក ជាពិ​សេស​ការផ្គត់ផ្គង់ផលិត​ផល​កែច្នៃ ​ហើយដើម្បីសម្រេចគោលដៅនេះ ទាម​ទារ​ឱ្យមានប្រព័ន្ធ​អេកូឡូ​ស៊ី​គ្រប់ជ្រុជ្រោយ និង​ប្រទាក់ក្រឡាគ្នា​ ការវិនិយោគ​ក្នុងស្រុក​ពីសំណាក់​វិនិ​យោគិនជាតិ និងអន្តរ​ជាតិ ការពង្រឹងភាពជាដៃគូពាណិជ្ជកម្ម ការផ្សារភ្ជាប់កសិករជាមួយទីផ្សារ បច្ចេកវិទ្យា និងនវានុវត្តន៍ ហិរញ្ញវត្ថុ ហេដ្ឋារចនាសម្ព័ន្ធ និង​ចំណេះដឹង។

​លោក​ទេសរដ្ឋមន្ត្រី អ៊ុក រ៉ាប៊ុន ​បានលើកឡើងនៅក្នុងពិធីបើក​វេទិកា និងពិព័រណ៍កសិកម្មកម្ពុជា ២០២៥ ​រយៈពេល ៤ ថ្ងៃចាប់ពីថ្ងៃទី ១៣ ដល់ថ្ងៃទី ១៦ ខែច្ឆិកា ឆ្នាំ ២០២៥ នៅមជ្ឈមណ្ឌលពិព័រណ៍​កោះ​ពេជ្រ​។​

កម្ពុជាមានឧត្តមភាពប្រៀបធៀបជាច្រើន សម្រាប់ការវិនិយោគក្នុងវិស័យកសិឧស្សាហកម្មរួមមាន ទីតាំងភូមិសាស្ត្រល្អដែលអាចភ្ជាប់ទៅទីផ្សារតំបន់ និងអន្តរជាតិ។

បើតាមលោកទេសរដ្ឋមន្ត្រី ​កម្ពុជាមាន​លក្ខខណ្ឌបរិស្ថានសមស្របសម្រាប់ផលិតកម្មកសិកម្ម មូលដ្ឋាន​ផលិត​កម្មរឹងមាំ កម្លាំងពលកម្មវ័យ​ក្មេង ការលើកទឹកចិត្តផ្នែកពន្ធ ការសម្រួលពាណិជ្ជកម្ម និងការគាំទ្រផ្នែកហេដ្ឋារចនាសម្ព័ន្ធ ដែល​បង្កើត​បាន​នូវបរិយកាស​អំណោយ​ផល​សម្រាប់​ការវិនិយោគ​។​

​រាជរដ្ឋាភិបាល​បានដាក់ចេញ​គោលនយោបាយសំខាន់ៗ​ជាច្រើន ​ដើម្បីបង្កើនល្បឿន​នៃការអភិវឌ្ឍសេដ្ឋកិច្ច​ រួមទាំងវិស័យកសិកម្ម៖

១.ការពង្រីកលទ្ធភាព ​ទទួលបានហិរញ្ញប្បទាន​ និងឥណទាន​តាមរយៈការបង្កើត ​ធនាគារ អភិវឌ្ឍជនបទ ​និងកសិកម្ម ធនាគារសហគ្រាសធុនតូច និងមធ្យមកម្ពុជា ​និងសារជីវកម្មធា នាឥណទានកម្ពុជា និងការបង្កើតកិច្ចសហប្រតិបត្តិការ​ជាមួយធនាគារពាណិជ្ជិកម្មផ្សេងៗ ​ដើម្បីបង្កើនលទ្ធភាពដល់សហគ្រាសក្នុងស្រុក​ក៏ដូចជាសហគមន៍កសិកម្មទំនើប​ ក្នុងការទទួលបាននូវកម្ចីក្នុងទំហំសមស្រប ​និងអត្រាការប្រាក់​ទាប។

២.ការជំរុញ ​និងការលើកកម្ពស់សហគ្រិនភាព ​និងការចាប់យកបច្ចេកវិទ្យាឌីជីថល ​តាមរយៈការ​បង្កើតមជ្ឈមណ្ឌល​បណ្ដុះបណ្ដាលធុរកិច្ច​ថ្មីតេជោ ​និងមូលធិអភិវឌ្ឍសហគ្រិនភាព និង​សហគ្រិនខ្មែរ។​

៣.ការអភិវឌ្ឍស្ដង់ដាជាតិ និងពង្រឹងការប្រតិបត្តិតាមស្ដង់ដា ដើម្បីធានាបាននូវអនុលោមភាព​របស់ផលិតផលសម្រាប់ការប្រកួតប្រជែង​នៅលើទីផ្សារក្នុងស្រុក ​តំបន់ និងអន្តរជាតិ។

៤.ការចរចាបើកទីផ្សារបន្ថែម ​ជាមួយប្រទេស​ជាដៃគូ និងការសម្រួលពាណិជ្ជកម្ម ដើម្បីជំរុញ​ការ​នាំចេញផលិតផល​កម្ពុជាឱ្យបានកាន់តែច្រើន។

៥.ការសហការជាមួយវិស័យឯកជន និងដៃគូអភិវឌ្ឍនក្នុងការពង្រឹងសមត្ថភាពផលិត ​ដើម្បីធានាបានទាំងបរិមាណ និងគុណភាព និងការកៀរគរវិនិយោគគាំទ្រខ្សែច្រវាក់តម្លៃ កសិកម្មទាំងមូល។

៦.ការដាក់ចេញនូវកម្មវិធីពិសេសជំរុញការវិនិយោគ​ក្នុងខេត្តទាំង ៤ នៅភូមិភាគឦសាន ដោយ​ផ្ដោត​លើវិស័យកសិកម្ម កសិឧស្សាហកម្ម និងទេសចរណ៍។

៧.ការកែលម្អបរិយាកាសធុរកិច្ច ជាពិសេសការកាត់បន្ថយការចំណាយរបស់សហគ្រាស ខណៈ​រាជ​រដ្ឋា​ភិបាលតែងតែចាត់ទុកវិស័យឯកជនថាជាក្បាលម៉ាស៊ីននៃកំណើន និងជាដៃគូ​សំខាន់បំផុត ក្នុងការបង្កើតការងារ គំនិតច្នៃប្រឌិត និង​នវានុវត្តន៍ ការលើកកម្ពស់គុណភាព និងសុវត្ថិភាពស្បៀង និងការពង្រឹងសមត្ថភាពប្រកួតប្រជែងរបស់កម្ពុជានៅក្នុងទីផ្សារតំបន់ និងសាកលលោក តាម​រយៈ​ការអនុវត្តកសិកម្មល្អ ប្រកបដោយគុណភាព និងមេត្រីភាពបរិស្ថាន៕​

អត្ថបទ៖ ឡេង ដេត