ព័ត៌មានជាតិ

ដាំដុះបន្លែតាមផ្ទះសំណាញ់ ទទួលផលពេញមួយឆ្នាំ មានសុវត្ថិភាព កាត់បន្ថយប្រើប្រាស់ថ្នាំសម្លាប់សត្វល្អិត

បានផុស

៨ ខែ មុន

នៅ

ថ្ងៃពុធ ២៦ វិច្ឆិកា ២០២៥

ដោយ

មន្រ្តីក្រសួងកសិកម្មបានជំរុញឲ្យកសិករដាំដុះដំណាំតាមផ្ទះសំណាញ់ ដែលមានសុវត្តិភាពកាត់បន្ថយការចំណាយលើការប្រើប្រាស់ថ្នាំសម្លាប់សត្វល្អិត ខណៈបច្ចេកទេសនេះអាចទទួលបានផលបានពេញមួយឆ្នាំ។

ក្នុងវេទិកា និងពិព័រណ៍កសិកម្ម (CAFE 25) កាលពីពេលថ្មីៗនេះ លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងពីបញ្ហាប្រឈម និងដំណោះស្រាយលើការផលិតបន្លែដែលមានសុវត្ថិភាពនិងផ្គត់ផ្គង់ឲ្យមានស្ថិរភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«បញ្ហាប្រឈមក្នុងការផលិតបន្លែ ទោះបីបច្ចុប្បន្នផលិតបានច្រើនក្តី ប៉ុន្តែបញ្ហាប្រឈមគឺការផ្គត់ផ្គង់ឱ្យមានស្ថេរភាព»។ លោក ប្រាក់ ដាវីដ បញ្ជាក់។

ការផលិតបន្លែបានល្អគឺបានតែក្នុងខែប្រាំងប៉ុណ្ណោះ ដល់ពេលចូលខែវស្សា ភ្លៀងច្រើនធ្វើឱ្យបន្លែរលួយ។ ជាដំណោះស្រាយ ការរៀបចំជាផ្ទះសំណាញ់អាចផ្គត់ផ្គង់បន្លែបានពេញមួយឆ្នាំ។

មន្រ្តីកសិកម្មរូបនេះអះអាងថា ការផលិតបន្លែនៅក្នុងផ្ទះសំណាញ់ ជួយកាត់បន្ថយតម្រូវការប្រើប្រាស់ថ្នាំសម្លាប់សត្វល្អិត និងធានាបាននូវសុវត្ថិភាព។ ក៏ប៉ុន្តែការអនុវត្តបច្ចេកទេសនេះត្រូវការទុន។ យ៉ាងណាមិញ ក្រសួងបានកំពុងជំរុញតាមរយៈការចងក្របង្កើតសហគមន៍កសិកម្មទំនើប ដើម្បីធានាការផលិតនិងផ្គត់ផ្គង់ឲ្យមានស្ថេរភាព។

កសិករដាំបន្លែសរីរាង្គម្នាក់នៅភូមិថ្មគ្រែកណ្ដាល ឃុំថ្មគ្រែ ស្រុកចិត្របុរី ខេត្តក្រចេះ ដែលកំពុងដាំបន្លែស្ពៃក្នុងផ្ទះសំណាញ់បានឲ្យដឹងថា លោកបានប្រកបមុខរបរដាំបន្លែសរីរាង្គផ្ទះសំណាញ់នៅឆ្នាំ២០២១។

កសិកររូបនេះអះអាងថា កាលមុន លោកដាំដុះបន្លែតាមបែបបុរាណតាមគ្នាជាទម្លាប់ លុះមកដល់ឆ្នាំ២០២១ ទើបបានងាកមកដាំតាមបែបបច្ចេកទេសវិញម្តង។

លោក ប៉ុក វែង បានរៀបរាប់យ៉ាងដូច្នេះថា ការដាំបែបបុរាណ គឺដាំហាលវាលអត់មានរោងទេ ហើយមានការពិបាកថែទាំ មានសត្វល្អិតបំផ្លិចបំផ្លាញ មិនទទួលបានផលល្អ។ ចំណែកការដាំបន្លែតាមបែបបច្ចេកទេសវិញ ងាយស្រួល មិនមានសត្វល្អិត ភ្លៀងមិនស្រក់ចូល ហើយទិន្នផលក៏បានខ្ពស់ សូម្បីតែរោងទំហំត្រឹមតែ ៥ គុណ ២៥ ម៉ែត្រ ក៏ទទួលបានទិន្នផល ៣៥០ គីឡូក្រាមដែរ។

ការដាំដុះបន្លែសរីរាង្គនៅក្នុងផ្ទះសំណាញ់ គឺដាំបានគ្រប់រដូវ មិនរើសរដូវឡើយ។ លោក ប៉ុក វែង បញ្ជាក់។

លោក ប៉ុក វែង បានបញ្ជាក់ថា កាលដាំបន្លែបែបបុរាណ ឬទម្លាប់តាមគ្នា មានការខ្វះខាតថវិកាច្រើនដោយដាំក្នុង ១ ឆ្នាំ បានតែ ២ ដងប៉ុណ្ណោះ គឺពេលរដូវរំហើយឬរដូវមានទឹក និងពេលមានភ្លៀងធ្លាក់។ ប៉ុន្តែឥឡូវនេះ លោកអាចដាំដុះបានពេញ ១ ឆ្នាំតែម្តង ដោយមិនព្រួយបារម្ភបញ្ហាសត្វល្អិត និងប្រភពទឹកស្រោចស្រប ព្រោះពេលនេះមានទឹកស្រោចស្របគ្រប់គ្រាន់ ដោយប្រើប្រាស់ទឹកអណ្ដូង ហើយប្រើផ្ទះសំណាញ់ការពារសត្វល្អិត និងងាយស្រួលក្នុងការថែទាំ៕