​រដ្ឋ ​លើកលែង​ពន្ធ​កាត់​ទុក​ សំដៅ​លើកកម្ពស់​បរិយាកាសធុរកិច្ច​

រាជរដ្ឋាភិបាល​បានសម្រេចលើកលែងកាតព្វកិច្ចពន្ធកាត់ទុកលើសួយសារ ​និង​ការប្រាក់ ក្នុង​ចំណោម​អ្នកជាប់ពន្ធ​តាមរបបស្វ័យប្រកាស ​ដើម្បី​លើកកម្ពស់​បរិយាកាសធុរកិច្ច​នៅកម្ពុជា​។

ពន្ធកាត់ទុក គឺជាប្រភេទពន្ធផ្ទាល់ដែលរដ្ឋតម្រូវឱ្យបង់ជាប្រចាំខែ ពីអ្នកផ្គត់ផ្គង់និវាសនជន និងអនិវាសនជន តាមរយៈអ្នកជាប់ពន្ធនិវាសនជនទៅលើការផ្គត់ផ្គង់មួយចំនួន។

​សារាចរណែនាំ ​របស់​ក្រសួងសេដ្ឋកិច្ច​ និង​ហិរញ្ញវត្ថុ ​លើកឡើងថា​៖ «លើកលែងកាតព្វកិច្ច ពន្ធកាត់​ទុក​លើសួយសារ ​និង​ការប្រាក់ រាល់ការទូទាត់ថ្លៃសួយសារ និងការប្រាក់ ក្នុងចំណោមអ្នកជាប់​ពន្ធតាម​របបស្វ័យប្រកាសដូចគ្នា»។​

​សហគ្រាសជាអ្នកជាប់ពន្ធ ​ដែល​ទទួលបានចំណូល ត្រូវកត់ត្រាជាចំណូលជាប់ពន្ធ និងប្រកាសបង់​ពន្ធលើប្រាក់ចំណូល ស្របតាមច្បាប់។

​ការលើកលែងពន្ធកាត់ទុកនេះ​ លុះត្រាតែ​ចំនួនទឹកប្រាក់នោះត្រូវបានកត់ត្រាក្នុងវិក្កយបត្រ​ស្រប​តាម​វិធាននៃការប្រើប្រាស់វិក្កយបត្រជាធរមាន ដែលបានចេញយ៉ាងត្រឹមត្រូវដោយភាគីអ្នក​ជាប់ពន្ធ​ម្ខាងទៀត៕