ព័ត៌មានអន្ដរជាតិ

គណបក្សភូមិចៃថៃប្ដេជ្ញាកាត់បន្ថយការពឹងផ្អែកចិន និងអាមេរិក សម្រាប់ការនាំចេញ

បានផុស

៥ ខែ មុន

នៅ

ថ្ងៃចន្ទ ៩ កុម្ភៈ ២០២៦

ដោយ

គណបក្សភូមិចៃថៃ របស់លោក អានុទីន ឆានវីរៈគុណ (Anutin Charnvirakul) ដែលទើបឈ្នះការបោះឆ្នោតកាលពីថ្ងៃអាទិត្យភ្លូកទឹកភ្លូកដី បានគូសបញ្ជាក់ពីគោលនយោបាយនាំចេញសំខាន់ ដោយកំណត់គោលដៅកាត់បន្ថយការពឹងផ្អែកលើទីផ្សារប្រពៃណី រួមមានចិន និងសហរដ្ឋអាមេរិក និងពង្រឹងសហគ្រាសធុនតូច និងមធ្យម (SMEs) ដើម្បីប្រកួតប្រជែងទូទាំងពិភពលោក។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងពាណិជ្ជកម្ម លោកស្រី Suphajee Suthumpun ដែលជាសមាជិកនៃគណបក្សភូមិចៃថៃ បានលើកឡើងថា ការនាំចេញរបស់ថៃប្រឈមមុខនឹងហានិភ័យផ្សេងៗ ដោយសារតែពឹងផ្អែកខ្លាំងពេកទៅលើសហរដ្ឋអាមេរិក និងចិន ដែលប្រទេសទាំង២នេះរួមចំណែកប្រហែល ១/៣ នៃតម្លៃនាំចេញសរុបរបស់ថៃ។

លោកស្រីបានសង្កត់ធ្ងន់លើតម្រូវការក្នុងការពន្លឿនការពង្រីកទីផ្សារថ្មី និងកាត់បន្ថយពឹងផ្អែកលើទីផ្សារណាពេក ការធ្វើពិពិធកម្មមុខទំនិញ និងអ្នកនាំចេញ ខណៈធ្វើឱ្យប្រសើរឡើងនូវសហគ្រាសធុនតូច និងមធ្យម (SMEs) និងលើកកម្ពស់ ផលិតផល «ផលិតនៅថៃ» ដើម្បីកសាងមូលដ្ឋានសេដ្ឋកិច្ចរយៈពេលវែងឱ្យកាន់តែរឹងមាំ និងមាននិរន្តរភាពជាងមុន។

លោកស្រីរដ្ឋមន្រ្តីនិយាយថា គោលនយោបាយនាំចេញមានសារៈសំខាន់ចំពោះសេដ្ឋកិច្ច ហើយនៅតែជាម៉ាស៊ីនសេដ្ឋកិច្ចសំខាន់ ដែលរដ្ឋាភិបាលថ្មីត្រូវតែជំរុញទៅមុខ។

លោកស្រី Suphajee បានលើកឡើងថា គណបក្សភូមិចៃថៃចង់ធ្វើឱ្យការនាំចេញ និងការនាំចូល មានប្រសិទ្ធភាពជាងមុន ប៉ុន្តែទាស់ត្រង់ថា ថៃពឹងផ្អែកលើអាមេរិក និងចិនខ្លាំងពេក។ លោកស្រីបន្តថា ប្រសិនបើថៃរក្សាការពឹងផ្អែកលើការនាំចេញទៅប្រទេសដែលឈ្លោះគ្នា វាបង្កហានិភ័យ។

ដូច្នេះហើយ លោកស្រីនិយាយថា ប្រទេសថៃត្រូវតែស្វែងរកទីផ្សារថ្មី និងពង្រីកមូលដ្ឋានទាំងមូលដោយលក់បានកាន់តែច្រើន។ លោកស្រីបន្តថា៖ «ពេលនិយាយថា (ទីផ្សារ)អឺរ៉ុបកំពុងរីកចម្រើន មជ្ឈិមបូព៌ាកំពុងរីកចម្រើន តើវារីកចម្រើនគ្រប់គ្រាន់ទេ?។ អ្វីដែលយើងត្រូវបន្ត គឺរបៀបចូលទៅក្នុងទីផ្សារថ្មី និងធ្វើឱ្យពួកគេរីកចម្រើនច្រើនជាងមុន ដូច្នេះយើងអាចកាត់បន្ថយការពឹងផ្អែកលើ» អាមេរិក និងចិន៕