មូមូ ហ្វាម ដាក់ផែនការផលិតទឹកដោះគោស្រស់ ១ម៉ឺនលីត្រ ក្នុងមួយថ្ងៃត្រឹមចុងឆ្នាំ២០២៦​

កសិដ្ឋានចិញ្ចឹមគោយកទឹកដោះ មូមូ ហ្វាម គ្រោងដាក់ផែនការផលិតទឹកដោះគោស្រស់ឱ្យបាន១ម៉ឺនលីត្រ ក្នុងមួយថ្ងៃ នាពេលចុងឆ្នាំ២០២៦នេះ ខណៈបច្ចុប្បន្នកសិដ្ឋានអាចផលិតទឹកដោះគោស្រស់បានជាង៨ពាន់លីត្រក្នុង១ថ្ងៃ។

លោក យន់ សុផាត ម្ចាស់កសិដ្ឋានចិញ្ចឹមគោយកទឹកដោះ មូមូ ហ្វាម ប្រាប់ កម្ពុជាថ្មី ថា បច្ចុប្បន្នកសិដ្ឋានរបស់លោកអាចមានលទ្ធភាពផលិតទឹកដោះគោស្រស់បានប្រមាណ៨ពាន់លីត្រ ក្នុងមួយថ្ងៃ ខណៈកសិដ្ឋានមានគោសរុបចំនួន៨០០ក្បាល និងមានគោដែលអាចផលិតទឹកដោះបានចំនួន ៥០០ក្បាល​ ផងដែរ។

ចំពោះផែនការទៅថ្ងៃខាងមុខ ម្ចាស់កសិដ្ឋានរូបនេះ បានបញ្ជាក់ថា កសិដ្ឋាននឹងគោដាក់គោបន្ថែមពីប្រទេសអូស្រ្ដាលី និងវៀតណាម ដើម្បីធ្វើយ៉ាងណាអាចផលិតទឹកដោះគោស្រស់បានក្នុងបរិមាណច្រើនជាងមុន។

បើក្រឡេកទៅមើលទីផ្សារទឹកដោះគោស្រស់នៅលើបណ្ដាផ្សារទំនើបវិញ បច្ចុប្បន្នទឹកដោះគោស្រស់ដែលផលិតបានក្នុងស្រុកហាក់ពិបាកប្រកួតប្រជែងជាមួយនឹងទឹកដោះគោស្រស់នាំចូលពីប្រទេសជិតខាងបន្ដិច នេះក៏ដោយតែកសិដ្ឋានរបស់គេធំៗ និងអាចផលិតទឹកដោះគោស្រស់បានក្នុងបរិមាណច្រើនជាងកសិដ្ឋានក្នុងស្រុកផងដែរ។

ក្នុងនាមជាម្ចាស់កសិដ្ឋានផលិតទឹកដោះគោស្រស់ក្នុងស្រុក លោក យន់ សុផាត នៅតែព្យាយាមធ្វើយ៉ាងណាពង្រីក និងពង្រឹងគុណភាពការផលិតទឹកដោះគោស្រស់ឱ្យមានស្ដង់ដាខ្ពស់ ​និងធ្វើយ៉ាងណាផលិតទឹកដោះគោស្រស់ក្នុងបរិមាណច្រើនជាងមុនសម្រាប់ផ្គត់ផ្គង់តម្រូវការក្នុងស្រុកផងដែរ។

គួរជម្រាបថា គិតត្រឹមខែមីនា ឆ្នាំ ២០២៤ កម្ពុជាមានកសិដ្ឋានចិញ្ចឹមគោយកទឹកដោះសរុបចំនួន៤ និងមានគោយកទឹកដោះចំនួន ១.១៧៦ ក្បាល ដែលអាចផលិតទឹកដោះគោស្រស់ ជាង ១៣ ពាន់លីត្រក្នុងមួយថ្ងៃ ​ស្មើនឹងជាង ៥ លានលីត្រក្នុង១ ឆ្នាំ ឬ ១៧ ភាគរយ នៃតម្រូវការទឹកដោះគោ​ស្រស់ក្នុងស្រុកជាង ៣០ លានលីត្រ៕

អត្ថបទ ៖ សួស សិត