ជ្រញ់ម៉ៃសាក់កាន់តែទទួលបានការគាំទ្រ ខណៈពិព័រណ៍ផលិតផលខ្មែរធ្វើឱ្យមហាជនស្គាល់ច្រើន

ជ្រញ់ធ្វើអំពីដើមម៉ៃសាក់របស់សិប្បកម្មមួយដែលស្ថិតនៅភូមិភាគឦសានខេត្តរតនគិរី បច្ចុប្បន្នកំពុងតែទទួលបានការគាំទ្រខ្លាំងពីសំណាក់ប្រជាជនខ្មែរ ខណៈការតាំងពិព័រណ៍ផលិតផលខ្មែរកន្លងមកបានធ្វើឱ្យមហាជនស្គាល់ពីផលិតផលផលិតបានក្នុងស្រុកកាន់តែច្រើនជាងមុន។

ជាម្ចាស់សិប្បកម្មផលិតជ្រញ់ប្រណិត វី. ធិក (ខេមបូឌា) លោក ឈុន វីរៈ​ ប្រាប់ កម្ពុជាថ្មី ថា បច្ចុប្បន្នជ្រញ់ម៉ៃសាក់ដែលផលិតបានក្នុងសិប្បកម្មរបស់លោកកំពុងមានតម្រូវការ និងទទួលបានការគាំទ្រខ្លាំងពីសំណាក់ប្រជាជនខ្មែរ ខណៈការតាំងពិព័រណ៍ផលិតខ្មែរកន្លងមកបានជួយឱ្យមហាជនកាន់តែបានស្វែងយល់ និងបានស្គាល់អំពីផលិតផលខ្មែរកាន់តែច្បាស់។

ម្ចាស់សិប្បកម្មរូបនេះ បានឱ្យដឹងទៀតថា តាមរយៈការធ្វើពិព័រណ៍ជាច្រើនដងរួចមក លោកសង្កេតឃើញថា ផលិតផលខ្មែរ មិនថាតែជ្រញ់ម៉ៃសាក់របស់លោក ឬផលិតផលរបស់សិប្បកម្ម សហគ្រាសក្នុងស្រុកដទៃទៀតនោះទេ ឃើញថាកំពុងទទួលបានការគាំទ្រខ្លាំងដូចគ្នាផងដែរ។

យ៉ាងណាមិញ ចំពោះផលិតផលជ្រញ់ប្រណិតរបស់ លោក ឈុន វីរៈ មកទល់បច្ចុប្បន្ននេះក៏កាន់តែមានការគាំទ្រច្រើន ពីព្រោះផលិតផលនេះមានស្ដង់ដាត្រឹមត្រូវ ប្រើប្រាស់មិនប៉ះពាល់ដល់សុខភាព ចំណែកឯតម្លៃវិញក៏សមរម្យបើធៀបនឹងផលិតផលដែលនាំចូលពីប្រទេសជិតខាង។

ក្រៅពីការផលិតជ្រញ់ប្រណិត ជានិច្ចកាល សិប្បកម្មរបស់លោក ឈុន វីរៈ ក៏ចូលរួមចំណែកការពារដល់បរិស្ថានសង្គមតាមរយៈការមិនកាប់ឈើព្រៃយកមកកែច្នៃធ្វើគ្រឿងសង្ហារឹម ដ្បិតអីលោកក៏មានដីប្រមាណ ១៣១ហិកតា ដាំដើមម៉ៃសាក់សម្រាប់ទុកកែច្នៃធ្វើជ្រញ់ និងសម្ភារផ្ទះបាយដោយខ្លួនឯងផងដែរ។

ក្នុងនាមជាម្ចាស់សិប្បកម្ម លោក ឈុន វីរៈ​ ក៏សូមថ្លែងអំណរគុណដល់រដ្ឋាភិបាល ពិសេសថ្នាក់ដឹកនាំដែលបានរៀបចំពិព័រណ៍ផលិតផលខ្មែរកន្លងមក ដែលព្រឹត្តិការណ៍នេះ បានជួយជំរុញដល់សិប្បកម្ម សហគ្រាស ​និងរោងចក្រក្នុងស្រុកទាំងអស់ កាន់តែមានទីផ្សារល្អតាមរយៈការលក់ផលិតផល។ ជាងនេះការធ្វើពិព័រណ៍ផលិតផលខ្មែរ បានធ្វើឱ្យមហាជនខ្មែរបានស្គាល់ និងស្វែងយល់អំពីផលិតខ្មែរកាន់តែច្រើន​ជាងមុនផងដែរ៕

អត្ថបទ ៖ សួស សិត