កម្ពុជាមានរោងចក្រវិស័យវាយនភណ្ឌជាង ១ ២០០ ផ្តល់ការងារជិត ១ លាននាក់

គិតត្រឹមចុងឆ្នាំ ២០២១ នេះ កម្ពុជាមានរោងចក្រ សហគ្រាសដែលបានចុះបញ្ជីផ្លូវការក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបបានកើនដល់ប្រមាណជាង ១ ២០០ រោងចក្រ ដែលផ្តល់ការងារក្នុងប្រព័ន្ធ ដល់កម្មករនិយោជិតប្រមាណជិត ១ លាននាក់។

ថ្លែងក្នុងសន្និបាតលើកទី ១៥ របស់សមាគមរោងចក្រកាត់ដេរនៅកម្ពុជា នៅថ្ងៃទី ១៥ ខែមករានេះ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គិតត្រឹមចុងឆ្នាំ ២០២១ នេះរោងចក្រ សហគ្រាសដែលបានចុះបញ្ជីផ្លូវការក្នុងវិស័យនេះបានកើនដល់ប្រមាណជាង ១ ២០០ រោងចក្រ ដែលផ្តល់ការងារក្នុងប្រព័ន្ធ ដល់កម្មករនិយោជិតប្រមាណជិត ១ លាននាក់។

លោករដ្ឋមន្ត្រីបានបន្ថែមថា ជាក់ស្តែងនៅក្នុងឆ្នាំ ២០២១ ទឹកប្រាក់នាំចេញសរុបនៃវិស័យនេះមានប្រមាណជិត ១០ ពាន់លានដុល្លារអាមេរិក ឬប្រមាណ ៦៣ ភាគរយ នៃទឹកប្រាក់នាំចេញសរុបរបស់កម្ពុជា។  ដោយឡែកជីវភាពកម្មករនិយោជិត ក៏បានប្រសើរឡើងជាលំដាប់ដោយការយកចិត្តទុកដាក់របស់រាជរដ្ឋាភិបាល តាមរយៈការតម្លើងប្រាក់ឈ្នួលអប្បបរមាជាបន្តបន្ទាប់។

លោករដ្ឋមន្ត្រីបានបញ្ជាក់ថា បើគិតចាប់ពីឆ្នាំ ១៩៩៧ ដល់ឆ្នាំ ២០២១ រាជរដ្ឋាភិបាលបានដំឡើងប្រាក់ឈ្នួលអប្បបរមាដល់កម្មករនិយោជិតបានចំនួន ១៨ លើក ដោយកើនពី ៤០ ដុល្លារអាមេរិកសម្រាប់ឆ្នាំ១៩៩៧ ដល់ ១៩៤ ដុល្លារអាមេរិកសម្រាប់ឆ្នាំ ២០២២។

លោករដ្ឋមន្ត្រីបានបន្ថែមទៀតថា សម្រាប់ឆ្នាំ ២០២២ នេះ ដោយបូករួមទាំងប្រាក់រង្វាន់អតីតភាពការងារ និងប្រាក់អត្ថប្រយោជន៍ផ្សេងៗ កម្មករនិយោជិតម្នាក់ៗ អាចទទួលបានប្រាក់ឈ្នួលចាប់ពី ២១១ ដុល្លារអាមេរិក ទៅ ២២២ ដុល្លារអាមេរិកក្នុងមួយខែ។ ក្រៅពីកម្មករនិយោជិតប្រមាណជិត ១ លាននាក់ដែលទទួលផលផ្ទាល់ មានប្រជាពលរដ្ឋប្រមាណជាង ២ លាននាក់ដែលទទួលផលដោយប្រយោលពីវិស័យនេះ។

លោករដ្ឋមន្ត្រីបានចាត់ទុក វិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ជាវិស័យទ្រទ្រង់សេដ្ឋកិច្ចដ៏សំខាន់ និងនៅតែជាវិស័យនាំចេញសំខាន់ជាងគេរបស់កម្ពុជា ដោយកំណើនប្រចាំឆ្នាំជាមធ្យមក្នុងរយៈពេល ១០ ឆ្នាំចុងក្រោយនេះ មានអត្រាប្រហែល ១០%។

លោករដ្ឋមន្ត្រីបានឱ្យដឹងទៀតថា ទោះបីជាមានការធ្លាក់ចុះបន្តិចបន្តួចនៅក្នុងឆ្នាំ ២០២០ បានងើបឡើងវិញបានយ៉ាងល្អក្នុងឆ្នាំ ២០២១ ដោយការនាំចេញក្នុងរយៈពេល ១០ ខែដំបូងមានកំណើនគួរឱ្យកត់សម្គាល់ ក្នុងនោះការនំាចេញសម្លៀកបំពាក់មានទឹកប្រាក់ ៦ ៥៣៨ លានដុល្លារ កើនឡើង ៦% ធៀបនឹងឆ្នាំកន្លងទៅ ការនាំចេញផលិតស្បែកជើងមានទឹកប្រាក់ ១ ១១៣ លានដុល្លារ កើនឡើង ២០% ការនាំចេញផលិតផលធ្វើដំណើរមានទឹកប្រាក់ ១ ១៧៩ លានដុល្លារ កើនឡើង៤៩%៕

អត្ថបទ៖ សំអឿន