ដំណាំវិលជុំធ្វើឲ្យកសិករ​មួយ​គ្រួសារ​ ​ដោះបំណុល ​ឲ្យ​កូន​រៀន​ដល់មហាវិទ្យាល័យ

មួយរយ:ចុងក្រោយនេះ ទីផ្សារដំណាំបន្លែវិលជុំហាក់មានសន្ទុះទីផ្សារឡើងវិញ ខណ:កន្លងទៅ​កសិករប្រកបរបរ​ដាំដំណាំបន្លែវិលជុំនេះ​ប្រឈមបញ្ហា​ទីផ្សារខ្លាំង ធ្វើឲ្យកសិករមួយគ្រួសាររស់នៅដ៏រាំរ៉ៃជាមួយបំណុលរុំកោះរកច្រកដោះបំណុលទាំងត្រដាបត្រដួស ខណះបន្លែគ្រប់មុខ​បានធ្លាក់តម្លៃ ដោយសាតែមានឈ្មួញនាំចូលពីប្រទេសជិតខាងច្រើន។

អ្នកស្រី ឆន សារីន ហៅ ជាវ និង ស្វាមី មានកូនស្រីចំនួន ០៣នាក់រស់ក្នុងបន្ទុក បច្ចុប្បន្ន គ្រួសារអ្នកស្រីរស់នៅ ក្នុងភូមិចំកា​រ​សំរោង២ សង្កាត់ចំការសំរោង ក្រុងបាត់ដំបង ក្នុងចំណោមកសិកររស់នៅក្នុងភូមិចំនួន០២ក្នុងសង្កាត់ចំការ សំរោង ក្រុងបាត់ដំបងដែលនិយមដាំបន្លែវិលជុំគឺ ភូមិចំការសំរោង១ និង ភូមិចំការសំរោង២ ។

អ្នកស្រី ឆន សារីន បានរំលឹកពីប្រវត្តិនៃការដាំបន្លែវិលជុំរបស់គ្រួសារថា គ្រួសារអ្នកស្រីបានប្រកបរបរដាំបន្លែវិលជុំអស់ រយះ​ពេលប្រមាណ ១៧ ឆ្នាំកន្លងមកហើយ។ ដំណាំដែលគាត់ និងកសិករដទៃទៀតនិយមដាំទាំង២ភូមិខាងលើនេះ មានដូចជា ជីគ្រប់មុខ ស្ពៃតឿ ស្ពៃចង្កឹះ ភ្លៅកង្កែប ស្ពៃក្ដោប និង ស្ពៃផ្កា​ជាដើម។

អ្នកស្រីបន្តថា ផ្ទៃដីដែលគ្រួសារអ្នកស្រីដាំបន្លែចិញ្ចឹមជីវភាព ដែលមានទំហំធំជាងកន្លះហិកតា រហូតមកដល់សព្វថ្ងៃនេះ គឺអ្នកស្រីជួលគេមិនមានដីខ្លួនឯងនោះទេ។ ក្នុងសកម្មភាពកំពុងមមាញឹក ជាមួយកូនស្រីវ័យជំទង់០២រនាក់ដែលកំពុង បេះនិងចងបាច់ថ្លឹងបន្លែ”ភ្លៅកង្កែប”ទុកឲ្យមូ៉យ អ្នកស្រី ឆន សារីន បានរៀបរាប់អំពីប្រវត្តិដ៏លំបាកលំបិននៃការចាប់ផ្តើមមុខ របរដាំបន្លែវិលជុំនេះថា ការចាប់ផ្ដើមដំបូងពិតជាជួបការលំបាកសម្បើមណាស់ ព្រោះពេលនោះជាមួយនិងស្វាមីអ្នកស្រីបានចាប់ផ្តើមពីបាតដៃទទេហើយដីជាង១ហិកតាសម្រាប់​ប្រកបមុខរបរក៏ជួលគេទៀត។

ក្រោយមក នៅពេលមានអង្គការ (C.O) ឬ ធនាគារឲ្យចងការប្រាក់បណ្ដាក់ទុន ទើបអ្នកស្រី និង ស្វាមី សម្រេចខ្ចី​បុល​ទុន​មួយចំនួនពីអង្គការ ដើម្បីពង្រីកមុខរបរដាំបន្លែនេះ និងទិញសម្ភារប្រើបប្រាស់ក្នុងការស្រោចសស្របលើផលដំណាំផង។ អ្នកស្រីបានលើកឡើងបន្តថា ការខ្ចីបំណុលធនាគាររយ:ពេលយូរ ការប្រាក់កាន់តែច្រើនមិនមែនជាការងាយស្រួលនោះ ទេបើសិនជាគ្រួសារអ្នកស្រីគ្នានការតស៊ូនិងមុខរបរ។ ដំណាក់កាលដែលធ្វើឲ្យគ្រួសារអ្នកស្រីរស់នៅជាមួយនបំណុលរុំកោះនោះ ពេលដែលអ្នកស្រីជួបបញ្ហាលំបាកគឺដំណាំមិនទទូលបានផលតែបើទទូលបានទិន្នផលប្រសើរហើយបែរជាត្រូវជួបបញ្ហាទីផ្សារដ៏អាក្រក់ទៅវិញ ដែលធ្វើឲ្យបាត់ចំណូលស្របពេលដល់រដូវកាលត្រូវបង់ការប្រាក់ទៅធនាគារទៀតផង។

អ្នកស្រីបានប្រាប់ថា ព្រោះតែបំណុលធនាគារ គ្រួសារអ្នកស្រីបានរស់ត្រាំត្រែងក្នុងថ្លុកបំណុលអស់រយៈពេលជាច្រើនឆ្នាំ ទើបមួយរយៈចុងក្រោយនេះ បានប្រឹងប្រែងងើបចេញពីបំណុលនេះ យ៉ាងត្រដាបត្រដួសរហូតដល់ពេលនេះ បានស្រឡះខ្លួនប្រាណពីបំណុលរុំកោះនេះបានច្រើនគួរសម។ ដំណោះស្រាយ ក៏ដោយសារតែមួយរយៈចុងក្រោយនេះបន្លែគ្រប់មុខមានទីផ្សារល្អប្រសើរឡើងវិញ បើទោះជាជួបឧបសគ្គទីផ្សារខ្លះៗកន្លងមកក៏ដោយ។

អ្នកស្រីបានបង្ហាញពីការធូរស្រាលពីបំណុលធនាគារ និងបង្ហាញពីមោទនភាព នៃជីវភាពនៅក្នុងគ្រួសារសព្វថ្ងៃថា លោកស្រីនិងស្វាមី មានកូនស្រី ០៣នាក់នៅក្នុងបន្ទុក ហើយសុទ្ធតែស្ថិតក្នុងការសិក្សាទាំងអស់។ ដូច្នេះរាល់ការចំណាយលើ​ការ​សិក្សារបស់កូនៗ និងការចំណាយក្នុងគ្រួសារគ្រប់បែបយ៉ាង​គឺត្រូវពឹងលើពីចំណូលនៃមុខរបដាំបន្លែលក់វិលជុំនេះទាំងស្រុង ព្រោះក្រុមគ្រួសារអ្នកស្រីគ្មានដីធ្វើស្រែឬមានមុខរបរផ្សេងក្រៅ​ពី​ដាំបន្លែវិលជុំនោះទេ។ តែអ្នកស្រីអាចមានលទ្ធភាពរកប្រាក់ផ្តត់ផ្គង់ឲ្យកូនរៀនបាន រហូតបច្ចុប្បន្នកូនស្រីច្បងក៏បានចូលរៀននៅមហាវិទ្យាល័យផងដែរ។

អ្នកស្រីបញ្ជាក់ថា បន្លែ “ភ្លៅកង្កែប” បច្ចុប្បន្នមានទីផ្សារល្អគ្រាន់បើជាង២ខែមុនដោយលក់”១គីឡូក្រាម​តម្លៃ​ចន្លោះពី ៣,០០០ រៀលទៅ ៣,៥០០រៀលសម្រាប់បោះដុំឲ្យម៉ូយ ខណៈ២ខែមុនតំលៃត្រឹមតែ ១,០០០រៀលទៅ ១,៥០០រៀលប៉ុណ្ណោះ។ ក្រៅពីបន្លែ “ភ្លៅកង្កែប” អ្នកស្រីក៏ត្រូវប្រមូលផលជីគ្រប់មុខឲ្យម៉ូយផងដែរ ដែលធ្វើឲ្យអ្នកស្រីមានចំណូលគ្រាន់​បើ​បានដោះបំណុលរុំកោះបានស្ទើរទាំងស្រុង៕

អត្ថបទ៖ សៅ សារិទ្ធ