អាជីវកម្មទេសចរណ៍ខ្វះទ្រព្យបញ្ចាំអាចស្នើសុំកម្ចីពីធនាគារចំនួន១៥

ប្រសិនបើម្ចាស់អាជីវកម្មខ្វះខាតទ្រព្យបញ្ចាំ ហើយដើម្បីធានាបាននូវកម្ចី ម្ចាស់អាជីវកម្មអាចស្នើសុំកម្ចីដែលមាន ការធានាឥណទានតាមរយៈគ្រឹះស្ថានហិរញ្ញវត្ថុ ដែលជាដៃគូរសហការជាមួយសាជីវកម្មឥណទានកម្ពុជា ចំនួន១៥ ស្ថាប័ន។ នេះបើតាមក្រសួងទេសចរណ៍។

ក្រសួងទេសចរណ៍ បានជូនដំណឹងដល់សមាគមឧស្សាហកម្មទេសចរណ៍ និងម្ចាស់អាជីវកម្មទេសចរណ៍ ទាំងអស់ថា សាជីវកម្មឥណទានកម្ពុជា បានដាក់ដំណើរការ”គម្រោងធានាឥណទានសម្រាប់សហហិរញ្ញប្បទាន​សម្រាប់វិស័យ​ទេសចរណ៍ ” ដើម្បីគាំទ្រដល់ការស្តារ និងជំរុញវិស័យទេសចរណ៍កម្ពុជា សាជីវកម្មឥណទានកម្ពុជា (CGCC) បានដាក់ឱ្យដំណើរការ”គម្រោងធានាឥណទានសម្រាប់សហហិរញ្ញប្បទានសម្រាប់វិស័យទេសចរណ៍” កាលពីថ្ងៃទី ១២ កក្កដា ឆ្នាំ ២០២២ ថ្មីៗនេះ។

តាមរយៈសេចក្តីប្រកាសរបស់ក្រសួងទេសចរណ៍ គម្រោងធានាឥណទានសម្រាប់សហហិរញ្ញ ប្បទាននេះ គឺជាគម្រោង​ធានាឥណទានដែលដើរតួជាទ្រព្យ បញ្ចាំចំនួន៨០%នៃកម្ចីដើម្បីកាត់បន្ថយតម្រូវការទ្រព្យបញ្ចាំពីធនាគារ​និងគ្រឹះស្ថានមីក្រូ​ហិរញ្ញវត្ថុ​ចូលរួមទៅអ្នកខ្ចី។ តាមរយៈគម្រោងនេះ ប្រសិនបើម្ចាស់អាជីវកម្មខ្វះខាតទ្រព្យបញ្ចាំ ហើយដើម្បីធានាបាន នូវកម្ចី ម្ចាស់អាជីវកម្មអាចស្នើសុំកម្ចីដែលមានការធានាឥណទានតាមរយៈគ្រឹះស្ថានហិរញ្ញវត្ថុ ដែលជា ដៃគូរសហការចំនួន១៥ ស្ថាប័ន ដែលរួមមាន៖ ធនាគារ ជីបម៉ុង ធនាគារ អេស៊ីលីដា ធនាគារ វឌ្ឍនៈ ធនាគារ ស្ថាបនា ធនាគារ ប្រៃសណីយ៍កម្ពុជា ធនាគារ វីង ធនាគារ ព្រីនស៍ ធនាគារ អេស៊ា-ប៉ាស៊ីហ្វិច ធនាគារ កាណាឌីយ៉ា ធនាគារ ភ្នំពេញពាណិជ្ជ ធនាគារ ហ្វីលីព ធនាគារ អរ អេច ប៊ី ធនាគារ ពាណិជ្ជកម្មក្រៅប្រទេស គ្រឹះស្ថានហិរញ្ញវត្ថុ អិលអូអិលស៊ី និងគ្រឹះស្ថានហិរញ្ញវត្ថុ ខេមា មីក្រូហិរញ្ញវត្ថុ លីមីតធីត។

សូមបញ្ជាក់ថា ក្នុងអំឡុងពេលដែលពិភពលោក ជួបវិបត្តិការរាតត្បាតជំងឺកូវីដ-១៩ ក្នុងនោះបានធ្វើឲ្យកម្ពុជា ទទួលរងផលប៉ះពាល់យ៉ាងខ្លាំងដល់វិស័យទេសចរណ៍ និងបានធ្វើឲ្យអាជីវកម្មធំៗនៅក្នុងវិស័យនេះជាង ៣,០០០ អាជីវកម្មបានបិទទ្វារ ហើយមួយចំនួនទៀតក៏ផ្អាកអាជីវកម្មផងដែរ កាលពីឆ្នាំ ២០២០។ នេះបើតាមក្រសួង​ទេសចរណ៍៕ នាង រតនៈ