ជប៉ុន ដើរតួនាទីសំខាន់ក្នុងការ​អភិវឌ្ឍសេដ្ឋកិច្ចសង្គមកម្ពុជា

ការវិនិយោគរបស់ជប៉ុន បានចូលរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ដែលក្នុងនោះ មានក្រុមហ៊ុនធំៗ របស់ជប៉ុន បានជួយផ្ទេរបច្ចេកវិទ្យា និងលើកកម្ពស់បែបផែនរស់នៅរបស់ប្រជាជនកម្ពុជា ដូចជាផ្សារទំនើបអ៊ីអន និងក្រុមហ៊ុនមីនីបៀជាដើម។ នេះជាការលើកឡើងរបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅជំនួបពាណិជ្ជកម្មជាមួយគណៈប្រតិភូធុរកិច្ចជប៉ុន ដែលកំពុងបំពេញទស្សនកិច្ចនៅកម្ពុជា ដើម្បីសិក្សាស្វែងយល់​ពីកាលនុវត្តភាពធុរកិច្ច និងស្វែងរកដៃគូសហការ កាលពីថ្ងៃទី៣០ ខែសីហា ឆ្នាំ២០២២។

នៅក្នុងជំនួបពាណិជ្ជកម្ម ដែលរៀបចំឡើងដោយអង្គការពាណិជ្ជកម្មក្រៅប្រទេសជប៉ុន សភាពាណិជ្ជកម្មកម្ពុជា និងសមាគម​សហគ្រិនវ័យក្មេងនៅកម្ពុជា អ្នកឧកញ៉ា គិត ម៉េង មានប្រសាសន៍ថា គោលបំណងនៃជំនួបពាណិជ្ជកម្មនេះ មានបីចំណុច រួមមានទី១. ផ្តល់ឱកាសដល់ធុរជនជប៉ុន បានជួបពិភាក្សាដោយផ្ទាល់ជាមួយធុរជនកម្ពុជាទៅតាមវិស័យ​សក្តានុពលរៀងៗខ្លួន ទី២. ផ្សារភ្ជាប់ទំនាក់ទំនងរវាង​ធុរជន​ទាំងពីរ​ប្រទេស និង៣. ចែករំលែកបទពិសោធន៍ និងផ្លាស់ប្តូរព័ត៌មានគ្នាទៅវិញទៅមក។

បើតាមអ្នកឧកញ៉ា គិត ម៉េង ប្រទេសកម្ពុជា និងជប៉ុន មានទំនាក់ទំនងល្អតាំងពីយូរលង់ណាស់មកហើយ។ អ្នកឧកញ៉ា គិត ម៉េង ក៏បានលើកឡើងអំពីវិស័យសក្តានុពលសំខាន់ៗ ដែលធុរជនជប៉ុន អាចពិចារណាក្នុងការបណ្តាក់ទុន​វិនិយោគផងដែរ ហើយសភាពាណិជ្ជកម្មកម្ពុជា ត្រៀមខ្លួនជាស្រេចជួយគាំទ្រដល់សកម្មភាពធុរកិច្ច និងវិនិយោគ​ទាំងនោះ។

ទំហំពាណិជ្ជកម្មទ្វេភាគីរវាងកម្ពុជា-ជប៉ុន ឈានដល់តម្លៃទឹកប្រាក់សរុប ១,១៣ពាន់លានដុល្លារ នៅក្នុងរយៈពេល ៧ខែដំបូងឆ្នាំ ២០២២ បានកើនឡើង ១៦,២ភាគរយ ពីចំនួនទឹកប្រាក់ ៩៧៩លានដុល្លារ បើធៀបនឹងរយៈពេល​ដូចគ្នាកាលពីឆ្នាំមុន។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា។

ប្រទេសកម្ពុជា បាននាំចេញមុខទំនិញទៅទីផ្សារជប៉ុន ក្នុងតម្លៃទឹកប្រាក់ ៦៦៧លានដុល្លារ និងនាំចូលទំនិញពីជប៉ុន​មកវិញ មានតម្លៃទឹកប្រាក់ ៤៦៩លានដុល្លារ ចាប់ពីខែមករា ដល់ខែកក្កដា ឆ្នាំ ២០២២ កើនឡើង ១១,៧% និង២៣,១% រៀងគ្នា បើធៀបនឹងរយៈពេលដូចគ្នាកាលពីឆ្នាំ ២០២១។

ការនាំចេញមុខទំនិញសំខាន់ៗរបស់កម្ពុជាទៅកាន់ប្រទេសជប៉ុនរួមមាន សម្លៀកបំពាក់ ស្បែកជើង កាបូប គ្រឿងសង្ហារឹម គ្រឿងសំអាង ក្រដាស សម្ភារៈការិយាល័យ ផលិតផលកសិកម្ម និងផលិផលស្បែក។ កម្ពុជាបាននាំចូលគ្រឿងចក្រ រថយន្ត គ្រឿងអេឡិចត្រូនិច គ្រឿងសង្ហារឹម ក្រណាត់ និងប្លាស្ទិកពីប្រទេសជប៉ុន។
កម្ពុជា ក៏សម្លឹងមើលប្រទេសជប៉ុនជាដៃគូពាណិជ្ជកម្មអាទិភាពសម្រាប់ការពិភាក្សាលើកិច្ចព្រមព្រៀងពាណិជ្ជកម្មសេរីទ្វេភាគី ដែលនឹងត្រូវបង្កើតឡើង ខណៈដែលបច្ចុប្បន្ននេះ កម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មសេរី​ទ្វេភាគីចំនួនពីររួចមកហើយ រួមមានជាមួយប្រទេសចិន និងកូរ៉េខាងត្បូង៕