រោងចក្រថ្មីមួយទៀតនឹងលេចរូបរាងនៅខេត្តតាកែវផ្តល់ការងារជាង ១ពាន់កន្លែង​ដល់ពលរដ្ឋ

ក្រុមប្រឹក្សាអភិវឌ្ឍន៍កម្ពុជា បានអនុម័តផ្តល់សិទ្ធិឱ្យក្រុមហ៊ុនឯកជនមួយបង្កើតរោងចក្រកាត់ដេរសម្លៀកបំពាក់ នៅក្នុងទឹកដីខេត្តតាកែវ ដែលមានទំហំវិនិយោគជិត ៦លានដុល្លារអាមេរិក បង្កើតការងារជាង ១ពាន់កន្លែង។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចឱ្យក្រុមហ៊ុន CONCEPT ​CREATOR FASHION (CAMBODIA) CO., LTD វិនិយោគលើគម្រោងបង្កើតរោងចក្រកាត់ដេរសម្លៀកបំពាក់ ស្ថិតនៅអគារA ភូមិត្រពាំងភ្លូ ឃុំអូរសារាយ ស្រុកត្រាំកក់ ខេត្តតាកែវ ក្នុងទុនវិនិយោគប្រមាណ៥,៨លានដុល្លារអាម៉េរិក និងអាចបង្កើតការងារបានចំនួន១៤៤១កន្លែង។

ចាប់ពីខែមករា ដល់ខែកញ្ញា ឆ្នាំ២០២២ កម្ពុជា បានអនុម័តគម្រោងវិនិយោគថ្មី សរុបចំនួន១៥០គម្រោង ក្រោមទុន​វិនិយោគ​ ៣៥០០លានដុល្លារ។ ក្នុងនោះ គម្រោងវិនិយោគរយៈពេល៩ខែ ឆ្នាំ២០២២នេះ មានការកើន​ឡើងចំនួន១៦​គម្រោង ខណៈទុនវិនិយោគក៏មានការកើនឡើងប្រមាណ១០១លានដុល្លារ បើធៀបនឹងរយៈពេលដូចគ្នា នៅឆ្នាំ២០២១។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៥ ខែតុលា ឆ្នាំ២០២២។

បើតាមរបាយការណ៍ គម្រោងវិនិយោគថ្មីទាំង១៥០គម្រោង ដែលបានអនុម័តនោះ ភាគច្រើនរួមមាន គម្រោងបង្កើត​រោងចក្រកាត់ដេរសម្លៀកបំពាក់ ស្បែកជើង កាបូប សម្ភារធ្វើដំណើរ, គម្រោងបង្កើតរោងចក្រកែ​ច្នៃវេចខ្ចប់ផ្លែឈើ, គម្រោងផលិតសំបក កង់យានយន្ត, រោងចក្រផលិតសម្ភារបរិក្ខារប្រើប្រាស់ខ្សែភ្លើង និងផលិតផលផ្លាស្ទិក, គម្រោង​បង្កើត​រោងចក្រដំឡើងរថយន្ដ និងគម្រោងលើវិស័យដទៃៗជាច្រើនទៀត៕