ថៃ ដាក់ក្ដីសង្ឃឹមថា ភ្ញៀវទេសចរនឹងកើនដល់ ១០ លាននាក់ក្នុងឆ្នាំនេះ

អាជា្ញធរទេសចរថៃ (TAT) រំពឹងថា ដំណាច់ឆ្នាំ ២០២២ នេះភ្ញៀវដែលមកលេងប្រទេសថៃ នឹងកើនដល់ចំនួនជាង ១០ លាននាក់ ខណៈសមាគមន៍អ្នកធ្វើដំណើរថៃ ព្យាករណ៍ថា នឹងអាចទទួលភ្ញៀវបរទេសចូលក្នុងប្រទេសថៃ បានជាង ២០ លាននាក់ឯណោះនៅឆ្នាំក្រោយ ។

លោក Yuthasak Supasorn ប្រធានអាជ្ញាធរទេសចរណ៍ថៃ រំពឹងទៀតថា នៅក្នុងត្រីមាសចុងក្រោយក្នុងឆ្នាំនេះ យ៉ាងហោចណាស់ ក្នុងមួយខែ ក៏មានទេសចរបរទេសជាង ១.៥ លាននាក់ ចូលមកកម្សាន្តក្នុងប្រទេសថៃដែរ ។

លោក Yuthasak បន្តថា កាលវិភាគហោះហើរសម្រាប់រដូវរងាឆ្នាំ ២0២២ ដល់ឆ្នាំ ២០២៣ អ្នកដំណើរបានកក់ ៥៧៣,៥៣៨ កៅអីក្នុងមួយសប្តាហ៍សម្រាប់ជើងហោះហើរទៅកាន់ប្រទេសថៃ ពោលកើនឡើង ៧៤.២ ភាគរយពី ៣២៩,២៨៨ កៅអីនារដូវក្តៅឆ្នាំ ២០២២ ។

ជាមួយគ្នានោះ ប្រធានសមាគមន៍សណ្ឋាគារថៃ អ្នកស្រី Marisa Sukosol Nunbhakdi យល់ឃើញថា ដើម្បីស្តារកំណើនភ្ញៀវទេសចរថៃមកវិញនៅក្នុងត្រីមាសចុងក្រោយនេះ គឺថៃត្រូវបង្កើនការហោះហើរត្រង់ និងដោយផ្ទាល់ចូលមកក្នុងប្រទេស កាត់បន្ថយការរឹតត្បិតជំងឺកូវីដ ១៩ និងលើកលែងការពាក់ម៉ាសជាដើម ។

ជាចុងក្រោយអ្នកស្រីបន្ថែមថា កិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (Apec) ដែលនឹងត្រូវធ្វើឡើងនៅទីក្រុងបាងកក នៅពាក់កណ្តាលខែវិច្ឆិកា ក៏នឹងជួយជំរុញទេសចរណ៍ និងការស្តារសេដ្ឋកិច្ចថៃផងដែរ ៕

ប្រែសម្រួលដោយ ៖ នាង រតនៈ

ប្រភព ៖ The Nation Thailand

ចុចអាន ៖ អតិផរណានៅ អាមេរិក ឡើងដល់ ៨.២ ភាគរយ ក្នុងខែកញ្ញា