ខេត្តកំពង់ស្ពឺ កំពុងមានតម្រូវការកម្មករ​តាមវិស័យនានា ៣ម៉ឺននាក់

នៅដើមឆ្នាំ ២០២៣នេះ ខេត្តកំពង់ស្ពឺ កំពុងមានតម្រូវការកម្មករជាច្រើនពាន់នាក់ ទៅតាមវិស័យផ្សេងៗ ខណៈគម្រោងបង្កើតរោងចក្រសហគ្រាសក៏មានកំណើនច្រើនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានថ្លែងក្នុងទិវា​អន្តរជាតិ​នារី ៨ មីនា ខួបលើកទី១១២ នៅវិមាន​សន្តិភាពថា នៅដើមឆ្នាំ ២០២៣នេះ មានរោងចក្រប្រមាណ ៧១ បានបិទទ្វារ មានកម្មករ-កម្មការិនីជាង ៣២០០០នាក់ ក្នុងនោះ ស្រ្តី ២៦០០០នាក់។ ប៉ុន្តែស្របពេលជាមួយគ្នានេះ នៅខេត្តកំពង់ស្ពឺឯណោះ មានតម្រូវការកម្មករប្រមាណ ៣ម៉ឺននាក់។

ទាក់ទិននឹងតម្រូវការកម្លាំងពលកម្មនេះ លោក វ៉ី សំណាង អភិបាលខេត្តកំពង់ស្ពឺ បានប្រាប់កកម្ពុជាថ្មីថា ជាការពិត​ណាស់ នៅតាមកសិដ្ឋាន រោងកច្រសហគ្រាស ក្រុមហ៊ុនសាងសង់នានា កំពុងមានតម្រូវការកម្មករ និងកម្លាំង​ពលកម្មជាច្រើននាក់។

លោកបន្តដូច្នេះថា« គេកំពុងអត់ការងារធ្វើ យើងត្រូវការកម្មករ…បងប្អូនអត់មានការងារធ្វើអាចមករកការងារ​នៅខេត្តកំពង់ស្ពឺសិនទៅ ព្រោះកំពុងត្រូវការកម្មករច្រើន»។

លោកអភិបាលខេត្តកំពង់ស្ពឺ ក៏បានអំពាវនាវតាមរយៈកម្ពុជាថ្មី ដើម្បីជាសារទៅដល់កម្មករ កម្មការិនី ដែលមិនទាន់មាន​ការងារធ្វើ អាចទៅធ្វើការនៅខេត្តកំពង់ស្ពឺ ដែលមានចម្ងាយត្រឹមតែ ៤៨គីឡូម៉ែត្រ ពីរាជធានីភ្នំពេញប៉ុណ្ណោះ។

ស្របពេលដែលខេត្តនេះ មានតម្រូវការកម្លាំងពលកម្មច្រើន ក៏មានវិនិយោគិនហុងកុង គ្រោងបង្កើតរោងចក្រផលិតកាបូ នៅខេត្តកំពង់ស្ពឺ ដែលត្រូវការកម្លាំងពលកម្មប្រមាណ ១២០០០នាក់បន្ថែមទៀត ដោយបានពិភាក្សាគ្នាជំហានដំបូង​រួចហើយ កាលពីថ្ងៃទី ០៧ មីនា។ ពាក់ព័ន្ធនឹងគម្រោងនេះ លោក វ៉ី សំណាង បានឱ្យដឹងថា ខេត្តកំពង់ស្ពឺស្វាគមន៍​យ៉ាង​កក់ក្តៅចំពោះអ្នកវិនិយោគទាំងអស់ ទាំងវិនិយោគិន​ជាតិ និងអន្តរជាតិ ដែលមានបំណងបង្កើតរោងចក្រគ្រប់វិស័យ ដូចជា រោងចក្រកែច្នៃផលិតផលកសិកម្ម ឧស្សាហកម្ម កសិ-ឧស្សាហកម្ម ជាដើម។

សូមបញ្ជាក់ថា ខេត្តកំពង់ស្ពឺ គឺជាខេត្តមានសក្តានុពលផ្នែកឧស្សាហកម្ម ដែលទទួលបានគម្រោងបង្កើតរោចក្រច្រើន​ជាងគេ ពោលគឺជិត ១០រោងចក្រសហគ្រាស នៅដើមឆ្នាំ ២០២៣នេះ៕