ទំហំពាណិជ្ជកម្មទ្វេភាគីជាង ២៤៥៤ លានដុល្លារ កម្ពុជា​នាំ​ចេញទៅ​ជប៉ុន​ជិត ២០០០ លាន​ដុល្លារ

លោក ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងពាណិជ្ជកម្ម បានបង្ហាញអំពីសក្តានុពល និងវឌ្ឍនភាពនៃវិស័យពាណិជ្ជកម្មកម្ពុជា-ជប៉ុន​ដែល​សម្រេចបាននៅ​ឆ្នាំ ២០២២។

នាឱកាសដឹកនាំប្រតិភូចូលរួមពិធីបើកព្រឹត្តិការណ៍ «ពិព័រណ៍កម្ពុជា២០២៣» នៅ​ទីក្រុង​តូក្យូកាល​ពីថ្ងៃទី០៣ ខែឧសភា ឆ្នាំ​២០២៣ លោក ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី និង​ជារដ្ឋលេខាធិការក្រសួងពាណិជ្ជកម្ម​បាន​បញ្ជាក់ថា ទំហំពាណិជ្ជកម្មទ្វេភាគីរវាង​កម្ពុជានិង​ជប៉ុនសម្រេចបានជាង ២៤៥៤ លានដុល្លារ​នៅ​​ក្នុង​ឆ្នាំ ២០២២។ ក្នុងនោះជប៉ុននាំចេញទៅកម្ពុជាមានទឹកប្រាក់ប្រមាណ ៥១៥ លានដុល្លារ និងនាំចូលពីកម្ពុជាមកវិញមានទឹកប្រាក់ប្រមាណ ១៩៣៩ លានដុល្លារ។

លោក​បន្ត​ថា កិច្ចសហប្រតិបត្តិការទ្វេភាគីរវាងកម្ពុជា-ជប៉ុន លើវិស័យពាណិជ្ជកម្ម វិនិយោគ និងទេសចរណ៍ រំពឹងកើនឡើងកាន់តែល្អប្រសើរ តាមរយៈការចូលរួមរបស់កម្ពុជាក្នុងពិព័រណ៍កម្ពុជានៅទីក្រុងតូក្យូ និងពិព័រណ៍ពិភពលោកឆ្នាំ​២០២៥ នៅទីក្រុងអូសាកា ប្រទេសជប៉ុន។

លោក​បានចាត់ទុកការចូលរួមពិព័រណ៍កម្ពុជា ដែល​រៀបចំ​នៅទីក្រុង​តូក្យូនៅពេលនេះ ជាការរួមចំណែកដ៏មានសារៈសំខាន់​​បំផុតក្នុងការផ្សព្វផ្សាយ និងជំរុញផលិតផលខ្មែរ សេវាកម្ម គម្រោងវិនិយោគ និងវិស័យទេសចរណ៍កម្ពុជា ឱ្យកាន់តែមានការទទួលស្គាល់ក្នុងទីផ្សារជប៉ុន និងទីផ្សារអន្តរជាតិ។

នា​ឱកាស​នោះ​ដែរមន្រ្តី​ក្រសួងពាណិជ្ជកម្ម​រូប​នេះ ក៏​បានប្រកាស​ពី​ការត្រៀមលក្ខណៈរបស់កម្ពុជាក្នុងការចូលរួម “ពិព័រណ៍ពិភពលោក ២០២៥” រយៈពេល ០៦ ខែ នៅទីក្រុងអូសាកា ប្រទេសជប៉ុន។ តាមរយៈការចូលរួមពិព័រណ៍ពិភពលោកនេះ ធ្វើឱ្យកម្ពុជាមានសិទ្ធិស្មើមុខស្មើមាត់នៅលើឆាកអន្តរជាតិ ហើយទំនាក់ទំនងការទូតរវាងកម្ពុជានិងប្រទេសម្ចាស់ផ្ទះ ក៏ដូចជារវាងបណ្តាប្រទេសអ្នកចូលរួម នឹងត្រូវបានពង្រឹងនិងពង្រីកថែមទៀត។ លើសពីនេះទៀត ពិព័រណ៍ពិភពលោក ក៏នឹងផ្តល់ឱកាសឱ្យពាណិជ្ជករ ក្រុមហ៊ុន សហគ្រាសកម្ពុជា បានជួបចរចាផ្លាស់ប្តូរពាណិជ្ជកម្ម វិនិយោគ និងទេសចរណ៍ទៅវិញទៅមកជាអន្តរជាតិផងដែរ។

គួរបញ្ជាក់ផងដែរថា នៅក្នុងពិព័រណ៍កម្ពុជាឆ្នាំ២០២៣ នៅក្នុងទីក្រុង​តូក្យូ មានរៀបចំកម្មវិធីសម្តែងសិល្បៈបុរាណខ្មែរ និងតន្រ្តី​សម័យ ហើយមានស្តង់ប្រមាណ ១០០ស្តង់ បានដាក់តាំងបង្ហាញឯកសារផ្សព្វផ្សាយអំពីវិស័យពាណិជ្ជកម្ម វិនិយោគ វប្បធម៌ប្រពៃណីខ្មែរ និងទេសចរណ៍ ព្រមទាំងផលិតផលកសិកម្ម និងសិប្បកម្មខ្មែរដូចជា៖ អង្ករ ម្រេច ស្ករត្នោត កាហ្វេ នំស្រួយ សូត្រខ្មែរ ក្រម៉ាខ្មែរ ម្ហូបអាហារ និងវត្ថុអនុស្សាវរីយ៍ជាច្រើនទៀត ដើម្បីបង្ហាញដល់ភ្ញៀវជាតិ និងអន្តរជាតិ មកចូលរួមទស្សនា។

នៅក្នុងនោះ ទំនិញអង្ករ ម្រេច និងសូត្រខ្មែរ គឺជាផលិតផលដែលទទួលបានការចាប់អារម្មណ៍ខ្ពស់ និងការបញ្ជាទិញជាបន្ត​បន្ទាប់ពីភ្ញៀវទេសចរ និងប្រជាជនជប៉ុន៕