ក្រុមហ៊ុនចំនួន ១៧៥ កំពុងដំណើរការក្នុងតំបន់សេដ្ឋកិច្ចពិសេស​ក្រុងព្រះសីហនុ

បច្ចុប្បន្ននេះតំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនសហគ្រាសចំនួន ១៧៥ ក្រុមហ៊ុន ក្នុងនោះ ៧០ ភាគរយ ជាក្រុមហ៊ុនមកពីប្រទេស ចិន និង ៣០ ភាគរយ ទៀតមកពីអាមេរិក បារាំង អង់គ្លេស កូរ៉េ ជប៉ុន ដែលផ្តល់ការងារជូនប្រជាពលរដ្ឋជិត ៣ ម៉ឺននាក់ ។  តំបន់សេដ្ឋកិច្ចពិសេសក្រុងព្រះសីហនុនេះ គឺជាគម្រោង​សហប្រតិបត្តិការដ៏សំខាន់រវាងចិន និងកម្ពុជា ក្នុងក្របខណ្ឌ ”ខ្សែក្រវាត់និងផ្លូវ” ដោយបានបង្កើត​ការងារ​ជូនប្រជាពលរដ្ឋខ្មែរជាច្រើន ម៉ឺននាក់។

លោក លាវ លានឈី  (Liu Lianchi ) អនុប្រធានគ្រប់គ្រងទៅនៃតំបន់សេដ្ឋកិច្ចពិសេសក្រុងព្រះសីហនុ បានឱ្យ​ដឹងថា តាមរយៈគំនិតផ្ដួចផ្ដើមខ្សែក្រវាត់និងផ្លូវ និងយុទ្ធសាស្ត្រចតុកោណរបស់កម្ពុជា គឺជាធាតុផ្សំយ៉ាងសំខាន់។ ដោយក្នុងនាម ជាគម្រោងកិច្ចសហប្រតិបត្តិការសំខាន់រវាងប្រទេសកម្ពុជា និងប្រទេសចិន តំបន់សេដ្ឋកិច្ចពិសេស​ក្រុងព្រះសីហនុ នឹងខិតខំប្រឹងប្រែងបន្តទៀត ដើម្បីចូលរួមចំណែកក្នុងការកសាងសហគមន៍ជោគវាសនា កម្ពុជា-ចិន នៅក្នុងយុគសម័យថ្មី។

ជាមួយគ្នា កញ្ញា ហ័ង ហ័នហ័រ (Huang Huanhua ) អនុប្រធានគ្រប់គ្រងទូទៅនៃតំបន់សេដ្ឋកិច្ចពិសេស​ក្រុងព្រះ​សីហនុម្នាក់ទៀត បានប្រាប់ឱ្យដឹងដែរថា នៅតំបន់សេដ្ឋកិច្ចពិសេសក្រុងព្រះសីហនុនេះ មានផ្ទៃដីប្រហែល ១ ១១៣ ហិកតា ហើយបច្ចុប្បន្នបានអភិវឌ្ឍជិត ៦០០ ហិកតា។​

កាលពីឆ្នាំ ២០១៦ មុនពេលអញ្ជើញមកបំពេញទស្សនកិច្ចផ្លូវរដ្ឋនៅប្រទេសកម្ពុជា លោក Xi Jinping ប្រធានាធិបតី​នៃសាធារណរដ្ឋប្រជាមានិតចិន បានគូសបញ្ជាក់ថា តំបន់សេដ្ឋកិច្ចពិសេសក្រុងព្រះសីហនុ ជាគំរូនៃកិច្ច​សហប្រតិបត្តិ​ការ​ជាក់ស្តែងរវាងចិន និងកម្ពុជា។ បន្ទាប់មកនៅឆ្នាំ ២០១៨ ពេលចូលរួមវេទិកា​កំពូលស្តីពីកិច្ចសហប្រតិបត្តិការអន្តរជាតិ ”ខ្សែក្រវាត់និងផ្លូវ” លើកទី២ ដែលរៀបចំធ្វើនៅទីក្រុងប៉េកាំង សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជា​ណាចក្រកម្ពុជា បានថ្លែងកោតសរសើរថា តំបន់សេដ្ឋកិច្ចពិសេសក្រុងព្រះសីហនុ ជាគំរូនៃសមិទ្ធផលដ៏ធំធេង ក្នុងកិច្ចសហប្រតិបត្តិការ ”ខ្សែក្រវាត់និងផ្លូវ” រវាងកម្ពុជា និងចិន។ លើសពីនេះទៅទៀត តំបន់សេដ្ឋកិច្ចពិសេស​ក្រុងព្រះ​សីហនុ បានពន្លឿនការកសាងឥតឈប់ឈរ ដែលបានក្លាយទៅជាតំបន់​សេដ្ឋកិច្ចពិសេសអន្តរជាតិរបស់កម្ពុជា ដែលមានហេដ្ឋារចនាសម្ព័ន្ធពេញលេញទាំងផ្នែកផលិតកម្ម និងជីវភាពរស់នៅ៕

ប្រភព៖ ក្រសួងព័ត៌មាន