ថៃ រំពឹងក្រុមហ៊ុនធំៗចំនួន ៣ របស់ អាមេរិក មកវិនិយោគខ្ទង់ពាន់លានដុល្លារក្នុងប្រទេស

នាយក​រដ្ឋមន្ត្រី​ថៃលោក សេតថា ថាវីស៊ីន រំពឹង​ថា​ នឹង​ទទួល​បាន​ការ​វិនិយោគ​យ៉ាង​ហោច​ណាស់ជាង ​៥ ពាន់​លាន​ដុល្លារ​ពី​ក្រុមហ៊ុន Tesla, Google និង Microsoft បន្ទាប់ពីមានកិច្ច​ប្រជុំជាមួយ​វិនិយោគិនកំពូលៗអាមេរិកនាពេលកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រីលើកឡើងថា ​ក្រុមហ៊ុន Tesla នឹង​សម្លឹង​មើល​ការវិនិយោគទៅ​ក្នុង​រោងចក្រ​ផលិតរថយន្តអគ្គិសនី (EV) ហើយក្រុមហ៊ុន Microsoft និង Google កំពុង​សម្លឹង​មើល​មជ្ឈមណ្ឌល​ទិន្នន័យ ។ ប៉ុន្តែ​លោកមិន​បាន​បញ្ជាក់​លម្អិត​ថា​តើ​ប្រាក់ ៥ ពាន់​លាន​ដុល្លារនេះជាការវិនិយោគរួមគ្នា ឬជាចំនួនរបស់ក្រុមហ៊ុននីមួយៗឡើយ ។

ចំពោះការវិនិយោគបរទេសថ្មីៗនឹងជំរុញសេដ្ឋកិច្ចរបស់ប្រទេសថៃ ដែលរំពឹងថានឹងកើនឡើង ២.៨ ភាគរយនៅឆ្នាំនេះ ប៉ុន្តែតិចជាងការព្យាករណ៍កាលពីលើកមុន ដោយសារការនាំចេញចុះខ្សោយ ។

ការលើកឡើងរបស់លោក សេតថា កើតមានឡើង បន្ទាប់ពីនាយករដ្ឋមន្ត្រីថ្មីរបស់ថៃរូបនេះបានជួបពិភាក្សាជាមួយនាយកប្រតិបត្តិក្រុមហ៊ុន Tesla គឺលោកមហាសេដ្ឋី Elon Musk អំពីវិស័យរថយន្តអគ្គិសនីកាលពីសប្ដាហ៍មុន ។

គួរឲ្យដឹងថា ថៃដែលជាមជ្ឈមណ្ឌលដំឡើងរថយន្តធំជាងគេទី ៤ នៅអាស៊ី កំពុងផ្តល់ការលើកទឹកចិត្ត និងជំរុញដល់ក្រុមហ៊ុនផលិតរថយន្ត EV ឲ្យមកវិនិយោគបន្ថែមក្នុងប្រទេសថៃ ជាពិសេសគឺការកាត់បន្ថយពន្ធដល់អ្នកទិញរថយន្តក្នុងស្រុកផងដែរ ៕

ប្រែសម្រួល៖ នាង រតនៈ

​ប្រភព៖​ Bangkok Posts