អំពើហិង្សានៅភាគខាងត្បូងថៃ ឥតធូរស្រាល, លើកនេះផ្ទុះគ្រាប់បែក មុខប៉ុស្តិ៍ប៉ូលិស តែម្តង 

ភាគខាងត្បូងប្រទេសថៃ កើតមានការវាយប្រហារទៀតហើយ ដោយកាលពីរាត្រីថ្ងៃអង្គារ ទី២១ ខែកក្កដា ឆ្នាំ២០២៦ គ្រាប់បែកក្នុងរថយន្ត បានផ្ទុះនៅមុខប៉ុស្តិ៍ប៉ូលិស ក្នុងខេត្ត Narathiwat បង្កការខូចខាតធ្ងន់ធ្ងរ។

តាមការបញ្ជាក់ពីប៉ូលិស រថយន្ត Toyota Soluna ផ្ទុកទៅដោយគ្រាប់បែក បានផ្ទុះនៅមុខប៉ុស្តិ៍ប៉ូលិស Tanyong ក្នុងឃុំ Kaluao Nuea នៃស្រុក Mueang ធ្វើឲ្យខូចខាតដល់អគារ និងបង្កជាអគ្គិភ័យ ឆាបឆេះរាលដាលដល់សំណង់នៅក្បែរនោះ ផងដែរ។

យ៉ាងណា មិនមានសេចក្តីរាយការណ៍អំពីមនុស្សរងគ្រោះទេ ខណៈហេតុការណ៍នេះ កំពុងស្ថិតក្រោមការស៊ើបអង្កេតរបស់ ប៉ូលិសថៃ។

អំពើហិង្សានៅភាគខាងត្បូងប្រទេសថៃ ផ្ទុះឡើងខ្លាំងទៅៗ ក្នុងរយៈពេលថ្មីៗ ជាពិសេសក្នុងខែមិថុនា តែម្តង ដោយកើតការវាយប្រហារញឹកញាប់បំផុត ក្នុងអត្រាដែលមិននឹកស្មានដល់ ពោលគឺសឹងរាល់ថ្ងៃ។

ជម្លោះប្រដាប់អាវុធដ៏រ៉ាំរ៉ៃ នៅភាគខាងត្បូងប្រទេសថៃ គឺកើតឡើងនៅក្នុងខេត្តចំនួន៤ ដូចជា Narathiwat, Pattani, Yala និង Songkhla ដែលអូសបន្លាយពេល អស់ជាច្រើនទសវត្សរ៍មកហើយ ដោយមានឫសគល់ ចេញពីប្រវត្តិសាស្ត្រនយោបាយ និងសាសនា។ 

យោងតាមតួលេខចុងក្រោយ ពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤ មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស៕

អត្ថបទ៖ សុវណ្ណ