អានុទីន រងការ​រិះគន់​ខ្លាំង ក្រោយ​ច្រៀង​បទ​តៃវ៉ាន់ ពេលបំពេញទស្សនកិច្ចនៅចិន

អតីតទីប្រឹក្សាកិច្ចការបរទេសថៃម្នាក់ បានរិះគន់ជាសាធារណៈ ចំពោះនាយករដ្ឋមន្ត្រី អានុទីន ឆានវីរៈគុល ជុំវិញការសម្រេចចិត្តច្រៀងបទចម្រៀងបុរាណ «Tian Mi Mi» ក្នុងអំឡុងពេលបំពេញទស្សនកិច្ចផ្លូវការនៅប្រទេសចិន ដោយអះអាងថា ប្រភពដើមរបស់បទចម្រៀងនេះពាក់ព័ន្ធនឹងតៃវ៉ាន់ និងឥណ្ឌូណេស៊ី ដែលធ្វើឱ្យវាក្លាយជាជម្រើសការទូតមិនសូវល្អ។ នេះ​បើយោងតាម​ការ​ចុះផ្សាយ​របស់​​សារព័ត៌មាន​ Thaiger។

កាល​ពី​ថ្ងៃទី​២០ ខែ​កក្កដា ឆ្នាំ​២០២៦ លោក អានុទីន បានបកស្រាយបទចម្រៀងស្នេហាភាសា Mandarin ដ៏ល្បីល្បាញនេះ នៅក្នុងពិធីជប់លៀងអាហារថ្ងៃត្រង់នៅ​មហាសាលប្រជាជន ក្នុងទីក្រុងប៉េកាំង ដោយ​មាន​គោលបំណងបង្ហាញពីភាពកក់ក្តៅនៃទំនាក់ទំនងរវាងប្រទេសទាំងពីរ។ យ៉ាង​ណាមិញ ការសម្តែងនេះ ត្រូវបានរិះគន់នៅលើទំព័រហ្វេសប៊ុករបស់លោក Rasm Chalermchant ដែលជាអតីតទីប្រឹក្សារដ្ឋលេខាធិការក្រសួងការបរទេស ដោយលោកបានចាត់ទុកការជ្រើសរើសបទចម្រៀងនេះថាមានលក្ខណៈហួសសម័យ និង​ខ្វះ​ការយល់​​ដឹងជាពិសេសលើកិច្ចការ​នយោបាយអន្តរជាតិ។

លោក Rasm បានលើកឡើងថា ភាគីចិនមិនមែនទទួលយកគ្រប់បទចម្រៀងភាសាចិនទាំងអស់នោះទេ។ លោកបានពន្យល់​ថា បទ «Tian Mi Mi» មានទំនុកច្រៀងនិពន្ធដោយលោក Zhuang Nu ដែលជាអ្នកនិពន្ធជនជាតិតៃវ៉ាន់ដ៏ល្បីម្នាក់ ហើយបទភ្លេងរបស់វាត្រូវបានសម្របសម្រួលចេញពីបទចម្រៀងប្រជាប្រិយឥណ្ឌូណេស៊ី ដែលមានចំណងជើងថា «Dayung Sampan» ព្រមទាំងត្រូវបានផ្សព្វផ្សាយឱ្យល្បីល្បាញទូទាំងពិភពលោក ដោយតារាចម្រៀង​ជនជាតិតៃវ៉ាន់ លោកស្រី Teresa Teng។

លោកបានបន្ថែមថា ទីក្រុងប៉េកាំងមានភាពរសើបយ៉ាងខ្លាំង ចំពោះបទចម្រៀងដែលទាក់ទងនឹងតៃវ៉ាន់ ជាពិសេសរាល់អ្វីដែលខ្លួនយល់ថា ពាក់ព័ន្ធនឹងឯករាជ្យភាពរបស់តៃវ៉ាន់។ លោកបានរំលឹកពីហេតុការណ៍កាលពី២០ឆ្នាំមុន ដែលឧបនាយករដ្ឋមន្ត្រីចិនម្នាក់ បានដើរចេញពីពិធីជប់លៀងផ្លូវការក្នុងប្រទេសថៃ បន្ទាប់ពីភាគីថៃ បានរៀបចំការកម្សាន្តដោយច្រៀងបទចម្រៀងតៃវ៉ាន់ រួមទាំងបទ «Tian Mi Mi» នេះផងដែរ។

មកទល់​នឹង​ពេលនេះ រដ្ឋាភិបាលថៃ មិនទាន់មានការឆ្លើយតប ចំពោះការរិះគន់នេះនៅឡើយទេ៕

ប្រែសម្រួល៖ ឈាង