ថៃ និងឡាវ សហការគ្នាបង្កើនតម្លៃពាណិជ្ជកម្មដល់ ១១ ពាន់លានដុល្លារ

បើយោងតាមការប្រកាសដោយអ្នកនាំពាក្យរដ្ឋាភិបាលថៃលោក Chai Wacharonke បានឲ្យដឹងថា ប្រទេសថៃ និងឡាវបានកំណត់ផែនការបង្កើនតម្លៃពាណិជ្ជកម្មទ្វេភាគីដល់ ១១ ពាន់លានដុល្លារអាមេរិក ក្នុងរយៈពេល ២ ឆ្នាំខាងមុខ ។

សម្រាប់ផែនកា​រនេះ បានផ្តោត​សំខាន់ទៅ​លើពាណិជ្ជកម្ម និងការវិនិយោគ កិច្ចសហប្រតិបត្តិការថាមពល និងសន្តិសុខ រួមជាមួយការតភ្ជាប់​គ្នារវាងផ្លូវដែក ផ្លូវថ្នល់ និងការដឹកជញ្ជូន ហើយមានចក្ខុវិស័យដើម្បីប្រែក្លាយឡាវ និងថៃភាគឦសានទៅជាតំបន់រីកចម្រើនរួមគ្នាផងដែរ ។

ចំពោះការដឹកជញ្ជូន ថៃបានគាំទ្រគំនិតផ្តួចផ្តើមរបស់រដ្ឋាភិបាលឡាវក្នុងការប្រែក្លាយប្រទេសទាំងពីរទៅជាការតភ្ជាប់ផ្លូវគោកក្នុងតំបន់ដ៏សំខាន់ ដោយថៃបានសន្យាថា នឹងសហការក្នុងការអភិវឌ្ឍហេដ្ឋារចនាសម្ព័ន្ធ និងការលើកកម្ពស់ការតភ្ជាប់ដឹកជញ្ជូនជាដើម ។

ទន្ទឹមនឹងនេះ គម្រោងសំខាន់មួយទៀត គឺការសាងសង់ស្ពានរថភ្លើងថ្មីឆ្លងកាត់ទន្លេមេគង្គ ដោយភ្ជាប់ខេត្ត Nong Khai ដែលជាខេត្តភាគឦសាននៃប្រទេសថៃ ទៅកាន់ទីក្រុងវៀងចន្ទន៍ ខណៈថៃក៏មានបំណង​ពង្រីកកម្ចីទន់ដល់ឡាវសម្រាប់គម្រោងមួយនេះផងដែរ ។

ថៃក៏បានជំរុញឡាវឲ្យបង្កើតថ្លៃសេវាដឹកជញ្ជូនទំនិញប្រកបដោយតម្លាភាពនៅសួនដឹកជញ្ជូនទីក្រុងវៀងចន្ទន៍ ដែលអាចឲ្យប្រតិបត្តិករថៃរៀបចំផែនការដឹកជញ្ជូនទំនិញកាន់តែមានប្រសិទ្ធភាព ។ មិនតែប៉ុណ្ណោះ ថៃក៏បានស្នើឲ្យឡាវគួរតែស្តារឡើងវិញនូវរថយន្តដឹកទំនិញពីប្រទេសថៃ ហើយថែមទាំងបានបង្ហាញពីចំណាប់អារម្មណ៍ទិញថាមពលស្អាតបន្ថែមទៀតពីប្រទេសឡាវ ដើម្បីគាំទ្រដល់កំណើនឧស្សាហកម្មផងដែរ ។

បញ្ហា​មួយ​ទៀត​ដែល​ភាគី​ទាំង​ពីរ​បាន​ឯកភាព​គ្នា​ដោះស្រាយនោះ ​គឺ​បញ្ហា​​អ័ព្ទ​ឆ្លង​ដែន ។ ផែនការសកម្មភាពរួមគ្នារវាងប្រទេសថៃ ឡាវ និងមីយ៉ាន់ម៉ា កំពុងត្រូវបានតាមដានដើម្បីធ្វើការដោះស្រាយបញ្ហា ។ មិនតែប៉ុណ្ណោះ ថៃក៏ត្រៀមខ្លួនជាស្រេចដើម្បីជួយឡាវក្នុងការបង្កើតផែនទីតំបន់ហានិភ័យនៃភ្លើងឆេះ និងផ្តល់ការបណ្តុះបណ្តាលដល់មន្ត្រីឡាវផងដែរ ។

ចំណែកសម្រាប់កិច្ចសហការសំខាន់ៗផ្សេងទៀតរបស់ប្រទេសទាំងពីរ ក៏រួមមាន កិច្ចព្រមព្រៀងស្តីពីការផ្លាស់ប្តូរវប្បធម៌ ការបណ្តុះបណ្តាលបើករថភ្លើង ជំនួយបច្ចេកទេស និងការបង្កើតគំរូអាជីវកម្មសម្រាប់ផ្លូវដែកជាតិឡាវជាដើម ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន៖ ការនាំចេញសម្លៀកបំពាក់ និងវាយនភណ្ឌ វៀតណាម ទំនងជាធ្លាក់ចុះពី ៥ ទៅ ៦.៣ ភាគរយ