ហាងឆេងប្រេងសាំងពិភពលោកដើមខែថ្មី បន្តហក់ឡើងថ្លៃ លក់ ១.៤៤ ទៅ ១.៥១ ដុល្លារក្នុងមួយលីត្រ

តម្លៃប្រេងសាំងពិភពលោកនៅថ្ងៃសុក្រនេះហក់ងើបឡើងថ្លៃវិញ ដោយសារតែរឿងរ៉ាវស្មុគស្មាញបន្ថែមទៀតពាក់ព័ន្ធកិច្ចពិភាក្សាជុំវិញបទឈប់បាញ់នៃភ្លើងសង្គ្រាមរវាងអ៊ីស្រាអែល និងក្រុមហាម៉ាស ក្រោយការវាយប្រហារសម្លាប់ពលរដ្ឋប៉ាឡេស្ទីនជាង ១០០ នាក់ដែលកំពុងរង់ចាំបើកជំនួយនៅតំបន់ហ្គាហ្សា ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី១ ខែមីនានេះ ។

ក្រុមហ៊ុនប្រេងអន្តរជាតិម៉ាក Brent បានឡើងថ្លៃ ២៩ សេន ឬ ០.៤ ភាគរយ ដាក់លក់ក្នុងតម្លៃ ៨២.២០ ដុល្លារក្នុងមួយបារ៉ែល (ស្មើ ១.៤៤ ដុល្លារក្នុងមួយលីត្រ) ខណៈតម្លៃប្រេងរបស់ក្រុមហ៊ុនអាមេរិក West Texas Intermediate (WTI) ហក់ឡើង ២២ សេន ឬ ០.៣ ភាគរយលក់ក្នុងតម្លៃ ៧៨.៤៨ ដុល្លារ (ស្មើនឹង ១.៥១ ដុល្លារក្នុងមួយលីត្រ) ។

ទន្ទឹមនោះ ការឡើងថ្លៃនេះទៀតសោត ក៏ដោយសារតែអង្គការនៃប្រទេសនាំចេញប្រេង OPEC+ និងសម្ព័ន្ធមិត្តដែលដឹកនាំដោយប្រទេសរុស្ស៊ី បានឯកភាពគ្នាកាលពីខែវិច្ឆិកា ឆ្នាំ២០២៣ កាត់បន្ថយការផលិតប្រេងប្រហែល ២.២ លានបារ៉ែលក្នុងមួយថ្ងៃសម្រាប់ត្រីមាសទី ១ ក្នុងឆ្នាំ ២០២៤ នេះ ហើយជាក់ស្ដែងប្រទេសស្ដេចប្រេងអារ៉ាប៊ីសាអូឌីតបានចាប់ផ្ដើមគោលការណ៍នេះជាបណ្ដើរៗហើយ ។

ស្របពេលជាមួយគ្នានេះ ហាងឆេងប្រេងសាំងលើពិភពលោកក៏មិនទាន់បង្ហាញសញ្ញាវិជ្ជមានណាមួយនៅឡើយនោះដែរ ចាប់តាំងពីក្រុមហ៊ូទីបើកការវាយប្រហារដោយយន្តហោះដ្រូន ក៏ដូចជាផ្តក់គ្រាប់រ៉ុកកែតទៅលើនាវានៅសមុទ្រក្រហម ដើម្បីគាំទ្រទៅដល់ក្រុមហាម៉ាស ហើយសកម្មភាពទាំងប៉ុន្មាននេះកំពុងបង្កក្ដីភ័យព្រួយទៅដល់លំហូរទំនិញឆ្លងកាត់ផ្លូវដ៏សំខាន់មួយនេះ ។

គួរបញ្ជាក់ថា ហាងឆេងប្រេងសាំងលើពិភពលោកក៏អាចនឹងបន្តហក់ឡើងថ្លៃបន្ថែមទៀតផងដែរ ដោយសារតែអង្គការនៃប្រទេសនាំចេញប្រេង OPEC+ កំពុងពិចារណាពង្រីកការកាត់បន្ថយទិន្នផលប្រេងរាប់ម៉ឺនបារ៉ែលក្នុងមួយថ្ងៃរហូតដល់ត្រីមាសទី ២ ក្នុងឆ្នាំ ២០២៤ នេះ ៕

ដោយ ៖ សុខ ជីវ័ន្ត

ចុចអាន ៖ អាមេរិក ជាប្រទេសទិញទំនិញច្រើនជាងគេបង្អស់ពី កម្ពុជា ក្នុងខែមករា មានតម្លៃជិត ៦៣០ លានដុល្លារ