សេដ្ឋកិច្ច

វិស័យឯកជនរំពឹងថាវេទិកាធុរកិច្ចកម្ពុជា-កូរ៉េនឹងជួយលើកកម្ពស់ការធ្វើពាណិជ្ជកម្មនិងវិនិយោគរវាងប្រទេសទាំងពីរ

បានផុស

១១ ខែ មុន

នៅ

ថ្ងៃពុធ ១៥ ឧសភា ២០២៤

ដោយ

ភ្នំពេញ៖ វេទិកាធុរកិច្ចកម្ពុជា-កូរ៉េ ដែលសហការរៀបចំដោយសភាពាណិជ្ជកម្មកម្ពុជា និងសភាពាណិជ្ជកម្ម និងឧស្សាហកម្មជាតិកូរ៉េ នឹងត្រូវធ្វើឡើងក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងដំណើរទស្សនកិច្ចជាផ្លូវការទៅប្រទេសកូរ៉េខាងត្បូង ក្នុងគោលបំណងដើម្បីជំរុញ ពាណិជ្ជកម្មនិងការវិនិយោគទ្វេភាគីកម្ពុជា-កូរ៉េ និងពង្រឹងភាពជាដៃគូនៃប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេទិកាធុរកិច្ចកម្ពុជា-កូរ៉េត្រូវបានរៀបចំឡើងក្នុងអំឡុងពេលសម្តេចធិបតីនាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បំពេញទស្សនកិច្ចផ្លូវការនៅសាធារណរដ្ឋកូរ៉េ ចាប់ពីថ្ងៃទី១៥ ដល់ថ្ងៃទី១៩ ខែឧសភា ឆ្នាំ២០២៤។ នេះបើយោងតាមសេចក្តីប្រកាសព័ត៌មានរបស់សភាពាណិជ្ជកម្មកម្ពុជា។

លោក គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា ក៏បានដឹកនាំគណៈប្រតិភូសភាពាណិជ្ជកម្មកម្ពុជាចូលរួមអមដំណើររបស់សម្តេចសម្តេចធិបតីនាយករដ្ឋមន្ត្រីផងដែរ។

«សភាពាណិជ្ជកម្មកម្ពុជា នឹងចុះអនុស្សរណៈយោគយល់ជាមួយសភាពាណិជ្ជកម្ម និងឧស្សាហកម្មកូរ៉េ ដើម្បីចូលរួមលើកកម្ពស់ទំនាក់ទំនងពាណិជ្ជកម្មនិងសេដ្ឋកិច្ច ក៏ដូចជា ជំរុញកាលានុវត្តភាពធុរកិច្ចរវាងប្រទេសទាំងពីរ»។ នេះបើយោងតាមសេចក្តីប្រកាសព័ត៌មានដដែល។

លោកលឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា វេទិកាធុរកិច្ចនេះនឹងផ្តល់នូវព័ត៌មានថ្មីអំពីការធ្វើធុរកិច្ច និងវិនិយោគនៅកម្ពុជាទៅដល់ពាណិជ្ជករកូដោយផ្ទាល់តែម្តង។

លោកបានថ្លែងថា៖«វេទិកាធុរកិច្ចនេះនឹងដើរតួយ៉ាងសំខាន់ក្នុងការផ្តល់ព័ត៌មានលម្អិតបន្ថែមទៀតដល់មន្ត្រី អ្នកវិនិយោគ និងអ្នកជំនួញនៃប្រទេសទាំងពីរអំពីអត្ថប្រយោជន៍នៃការអនុវត្ត ពាណិជ្ចកម្មសេរីកម្ពុជា-កូរ៉េ”។

បើយោងតាមសភាពាណិជ្ជកម្មកម្ពុជា គណៈប្រតិភូសភាពាណិជ្ជកម្មកម្ពុជា នឹងបំពេញទស្សនកិច្ចនៅតំបន់ឧស្សាហកម្មបច្ចេកវិទ្យា (Pangyo Techno Valley) សារមន្ទីរនវានុវត្តន៍សាមសុង (Samsung Innovation Museum) រោងចក្រចម្រាញ់ជីវថាមពលពីសំបកគ្រាប់ស្វាយចន្ទី និងជួបប្រជុំជាមួយភាគីពាក់ព័ន្ធ ដើម្បីកសាងទំនាក់ទំនង និងពង្រីកសកម្មភាពពាណិជ្ជកម្មរវាងប្រទេសទាំងពីរផងដែរ។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ត្រូវបានដាក់ឱ្យចូលជាធរមាននៅថ្ងៃទី១ ខែធ្នូ ឆ្នាំ២០២២។ ជាមួយកិច្ចព្រមព្រៀងនេះ ប្រទេសកូរ៉េខាងត្បូងយល់ព្រមលើកលែងពន្ធលើផលិតផល ៩៥,៦ ភាគរយដែលនាំចូលពីកម្ពុជា ហើយកម្ពុជាក៏ត្រូវលើកលែងពន្ធលើទំនិញនាំចូល ៩៣,៨ ភាគរយផងដែរ។

យោងតាមរបាយការណ៍របស់ធនាគារជាតិនៃកម្ពុជា (NBC) បានឱ្យដឹងថា ប្រទេសកូរ៉េគឺជាប្រភពនៃការវិនិយោគផ្ទាល់ពីបរទេសធំជាងគេទីពីររបស់ប្រទេសកម្ពុជា។ការវិនិយោគរបស់កូរ៉េមានជាចម្បងក្នុងវិស័យហិរញ្ញវត្ថុ អចលនទ្រព្យ ផលិតកម្ម កសិកម្ម ថាមពល វារីអគ្គិសនី និងសំណង់៕