​សភាពាណិជ្ជកម្ម​កម្ពុជា​ប្រចាំប្រទេសនូវែលសេឡង់ ​ជំរុញលទ្ធភាពការធ្វើពាណិជ្ជកម្ម​អន្តរជាតិ

សភាពាណិជ្ជកម្មកម្ពុជា​ប្រចាំប្រទេសនូវែលសេឡង់​ បាន​រៀបចំកិច្ចប្រជុំសមាជិក ​ដើម្បី​ពិភាក្សា​ និង​រៀបចំផែនការយុទ្ធសាស្ត្រ ​ព្រមទាំងផែនការសកម្មភាពនានា​ ក្នុងនោះមានដូច​ជាការផ្គូរផ្គង់​អ្នក​នាំ​ចេញ​ និង​អ្នកនាំចូល​រវាង​ប្រទេស​ទាំងពីរ ការសិក្សាពីលទ្ធភាពនៃការចុះអនុស្សរណៈយោគយល់ (MOU) ជាមួយស្ថាប័ន​មានសក្តានុពលនៅប្រទេសទាំងពីរ ការតាំងពិពណ៌ផលិផលខ្មែរ ​ការស្វែង​រកដៃគូរ​សហការ​ផ្ស​ព្វ​ផ្សាយ​ផលិតផលខ្មែរជាដើម។ ​

​កិច្ចប្រជុំនេះក៏មានគោលបំណងប្រមូលធាតុចូល មតិយោបល់ និងសំណូមពរពីសមាជិកនីមួយៗ ដើម្បីពង្រឹងការអភិវឌ្ឍ និងបន្តអនុវត្តតួនាទី និងភារកិច្ចរបស់សភាពាណិជ្ជកម្ម​ឱ្យកាន់តែមាន​ប្រសិទ្ធភាព។​

​ជាពិសេសការបង្កើនសមាជិកភាពបន្ថែមទៀតក្នុងការចូលរួមជាមួយសភាពាណិជ្ជកម្មកម្ពុជារបស់យើងពីគ្រប់តំបន់នៃប្រទេសនូវែលសេឡង់ផងដែរ ក្នុងការជួយជម្រុញសកម្មភាពសេដ្ឋកិច្ច​របស់​ប្រទេស​កម្ពុជា​ជា​មួយប្រទេសនូវែលសេឡង់។​ ​

កិច្ចប្រជុំនេះក៏បានបង្ហាញពីការប្តេជ្ញាចិត្តរបស់សមាជិកក្នុងការរួមចំណែកអភិវឌ្ឍសហគមន៍អាជីវកម្មខ្មែរ និងពង្រឹងទំនាក់ទំនងពាណិជ្ជកម្មអន្តរជាតិ។

កិច្ចប្រជុំក៏បានពិភាក្សា និងសម្រេចលើការចាត់តាំង ព្រមទាំងប្រគល់តួនាទី និងភារកិច្ចជាក់លាក់មួយចំនួនជូនសមាជិកចំពោះផ្នែកហិរញ្ញវត្ថុ និងផ្នែកជំនួយការផ្ទាល់ ដើម្បី​កំណត់មុខងារ និងការទទួលខុសត្រូវឱ្យកាន់តែច្បាស់លាស់ និងសមស្របទៅតាមផែន​ការការងារ​របស់ស្ថាប័នចំ។

ការរៀបចំរចនាសម្ព័ន្ធការងារនេះនឹងជួយបង្កើនប្រសិទ្ធភាព និងភាព​រលូនក្នុង​ការ​អនុវត្តគម្រោងនានា៕