សេដ្ឋកិច្ច

សមាគមធុរកិច្ចឯកជនពីរចាប់ដៃគ្នាទាក់ទាញការវិនិយោគ និងបណ្តុះបណ្តាលពលកម្មជំនាញ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ២៣ ឧសភា ២០២៤

ដោយ

សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) និងទីភ្នាក់ងារពាណិជ្ជកម្មកូរ៉េ (KOTRA) នឹងសហការគ្នាដើម្បីលើកកម្ពស់បរិយាកាសវិនិយោគ បង្កើតកំលាំងពលកម្មជំនាញ និងទាក់ទាញការវិនិយោគមកកាន់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី២៣ ខែឧសភា ឆ្នាំ២០២៤លោក Robert Hwang អនុប្រធានTAFTACបានជួបជាមួយលោក Hacheong Yun អគ្គនាយក KOTRA ដែលទើបតែងតាំងថ្មីប្រចាំការិយាល័យរាជធានីភ្នំពេញ ដើម្បីពិភាក្សាអំពីកិច្ចសហប្រតិបត្តិការនិងជំនួយពាណិជ្ជកម្មច្រើនជាងមុន និងការវិនិយោគរវាងប្រទេសទាំងពីរ។

បើយោងតាមសេចក្តីប្រកាសព័ត៌មានរបស់ TAFTAC ឧស្សាហកម្មរបស់កម្ពុជាមានភាពរឹងមាំ និងកសាងធនធានមនុស្ស និងកម្លាំងការងារជំនាញរឹងមាំជាងមុន ហើយនឹងស្វាគមន៍វិនិយោគិនកូរ៉េទាំងអស់ដែលមកបណ្តាក់ទុនទាំងផ្នែកផលិតកម្ម និងការវិនិយោគលើផ្នែកផលិតវត្ថុធាតុដើម ។ ជារៀងរាល់ឆ្នាំអ្នកស្វែងរកការងារថ្មី និងយុវជនវ័យក្មេងចំនួន៣០ម៉ឺននាក់បានចូលក្នុងទីផ្សារការងារ។

TAFTAC បានគូសបញ្ជាក់ថា៖« បញ្ហាចីរភាពគឺជានិន្នាការថ្មីមួយដែលកំពុងលេចឡើង ដែលឧស្សាហកម្មនេះកំពុងសម្លឹងមើល ដើម្បីកសាងបរិស្ថានប្រកបដោយចីរភាព និងកន្លែងផលិតកម្មបៃតងជាងមុន(គិតអំពីបរិស្ថានខ្លាំងជាងមុន)»។

KOTRA ជាផ្នែកពាណិជ្ជកម្មរបស់ស្ថានទូតកូរ៉េ ដែលជួយសមាជិកកូរ៉េ វិនិយោគិននៅក្រៅប្រទេសជាង១០០ប្រទេស។ វិទ្យាស្ថានបណ្តុះបណ្តាលវិស័យកាត់ដេរនៅកម្ពុជា(CGTI) បានធ្វើបទបង្ហាញអំពីវគ្គបណ្តុះបណ្តាល និងការអភិវឌ្ឍន៍ធនធានមនុស្សក្នុងវិស័យ ហើយរីករាយក្នុងការសហការជាមួយដៃគូកូរ៉េក្នុងការអភិវឌ្ឍន៍ម៉ូដ ជំនាញ និងផែនការអភិវឌ្ឍន៍ធនធានមនុស្សពាក់ព័ន្ធ។ «KOTRA នឹងធ្វើការជាមួយវិនិយោគិន ស្ថាប័ននានា ដើម្បីស្វែងរកឱកាសសម្រាប់ការបណ្តុះបណ្តាល ជំនួយបច្ចេកទេស ការដោះដូរកម្មវិធីសិក្សាក្នុងវិស័យដែលទាក់ទងនឹងការអភិវឌ្ឍន៍ធនធានមនុស្ស»។ នេះបើយោងតាមសេចក្តីប្រកាសព័ត៌មាននេះ។

សមាគមដដែលបានរំលេចបន្ថែមថា ក្រុមហ៊ុនប្រហែល ១៥០០ ស្ថិតនៅក្នុងវិស័យកាត់ដេរ វាយនភណ្ឌ ស្បែកជើង និងទំនិញធ្វើដំណើរ ដែលមានកម្មករនិយោជិត ប្រហែល៩០ម៉ឺននាក់ ជាមួយនឹងប្រាក់បៀវត្សរ៍ជាមធ្យម ២៦០ ដុល្លារ/ខែ ។ បច្ចុប្បន្នវត្ថុធាតុដើមភាគច្រើនបំផុតត្រូវបាននាំចូល ហើយកម្ពុជាត្រូវការផលិតកម្មផលិតវត្ថុធាតុដើមច្រើនជាងមុនដើម្បីវិនិយោគក្នុងការទទួលបានកិច្ចព្រមព្រៀងពាណិជ្ជកម្មសេរី(FTA)ច្រើនជាងមុន។

ចំពោះការនាំចេញមានចំនួន ១១២៩០ លានដុល្លារ ទៅសហរដ្ឋអាម៉េរិក សហភាពអឺរ៉ុប ជប៉ុន ចក្រភពអង់គ្លេស កាណាដា និងទីផ្សារផ្សេងៗទៀត៕