ស្ថាប័នរដ្ឋពីរបន្តសហការលើកកម្ពស់បរិយាបន្នហិរញ្ញវត្ថុសម្រាប់ស្ត្រី និងសហគ្រិនស្រ្តីនៅកម្ពុជា

ភ្នំពេញ៖ ជាការបន្តបេសកម្មក្នុងការលើកកម្ពស់បរិយាបន្នហិរញ្ញវត្ថុសម្រាប់ស្ត្រី និងសហ     គ្រិនស្រ្តី តាមរយៈការបញ្ជ្រាបចំណេះដឹងផ្នែកហិរញ្ញវត្ថុនិងហិរញ្ញវត្ថុឌីជីថល ការពង្រឹងភាពអង់អាចផ្នែកសេដ្ឋកិច្ច ​ធនាគារជាតិនៃកម្ពុជា និងក្រសួងកិច្ចការនារីចុះហត្ថលេខាលើ        អនុស្សរណៈយោគយល់(MoU) ស្តីពី «ការលើកកម្ពស់បរិយាបន្នហិរញ្ញវត្ថុសម្រាប់ស្ត្រី»សម្រាប់រយៈ៥ឆ្នាំបន្តទៀត។​

MoU ​នេះ ក៏នឹងបន្តចូលរួមសម្រេចគោលដៅនៃយុទ្ធសាស្ត្រជាតិ ស្តីពី បរិយាបន្នហិរញ្ញវត្ថុ ឆ្នាំ២០១៩ – ២០២៥ និងយុទ្ធសាស្រ្តនារីរតនៈទី៦ ឆ្នាំ២០២៤ – ២០២៨ ផងដែរ។

ថ្លែងក្នុងពិធីចុះ MoU កាលពីថ្ងៃទីទី២៧ ខែឧសភា ឆ្នាំ២០២៤ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា MoU នេះមានគោលបំណងដើម្បីបន្តលើកកម្ពស់​បរិយាបន្នហិរញ្ញវត្ថុសម្រាប់ស្រ្តីនិងសហគ្រិនស្រ្តី តាមរយៈការបញ្រ្ជាបចំណេះដឹងផ្នែក​ហិរញ្ញវត្ថុ និងហិរញ្ញវត្ថុឌីជីថល ការពង្រឹងភាពអង់អាំចផ្នែកសេដ្ឋកិច្ច​ដោយលើកកម្ពស់​ផ្នត់គំនិតវិជ្ជមាន និងការពង្រីកភាបជាដៃគូក្នុងការជំរុញបរិយាបន្នហិរញ្ញវត្ថុសម្រាប់ស្រ្តី និងសហគ្រិនស្រ្តី។

លោកស្រីបណ្ឌិតបានថ្លែងថា៖«ការណ៍នេះនឹងចូលរួមជំរុញបន្ថែមដល់ស្រ្តី និងសហគ្រិនស្រ្តីក្នុ​ងការទទួលបាន និងប្រើប្រាស់សេវាហិរញ្ញវត្ថុផ្លូវការ ព្រមទាំងការទាញ​យកប្រយោជន៍​ពីការប្រើប្រាស់ឌីជីថល ដែលប្រកបដោយភាពទាន់សម័យ ឆ្លាតវៃ និងការទទួលខុសត្រូវ និងការបង្ការហានិភ័យដែលអាចកើតឡើង»។

លោកស្រីក៏បានគូសបញ្ជាក់ទៀតថា ការចុះអនុស្សរណៈនៃការយោគយល់នេះ ជាសក្ខីភាពដែលបានបង្ហាញពីវឌ្ឍនភាពនៃកិច្ចសហការរវាងធនាគារជាតិនៃកម្ពុជា និងក្រសួងកិច្ចការនារីក្នុងភាពជាដៃគូ ដើម្បីបន្តលើកកម្ពស់បរិយាបន្នហិរញ្ញវត្ថុសម្រាប់ស្រ្តី ប្រកបដោយប្រសិទ្ធភាព ប៉ុន្តែបេសកម្មនេះ ទាមទារការចូលរួមសហការពីភាគីពាក់ព័ន្ធបន្ថែមទៀត។

«ខ្ញុំសូមលើកទឹកចិត្តឱ្យគ្រប់ភាគីពាក់ព័ន្ធ ចូលរួមបន្តសហការក្នុងសកម្មភាពដែលស្ថាប័ននីមួយៗបាននិងកំពុងអនុវត្ត និងបង្កើនអាទិភាពទៅលើការលើកកម្ពស់បរិយាបន្នហិរញ្ញវត្ថុសម្រាប់ស្រ្តី ដើម្បីឱ្យសម្រេចបាននូវគោលដៅដែលបានកំណត់»។ នេះបើយោងតាមការថ្លែងរបស់លោកស្រីបណ្ឌិត ជា សិរី។

លោកស្រី អ៊ឹង កន្ថាផាវី រដ្ឋមន្រ្តី ក្រសួងកិច្ចការនារី ក៏បានវាយតម្លៃខ្ពស់ចំពោះកិច្ចសហការរវាងធនាគាជាតិនៃកម្ពុជាក្នុងការបន្តបេសកម្មលើកកម្ពស់បរិយាបន្នហិរញ្ញវត្ថុសម្រាប់ស្រ្តី និងសហគ្រិនស្រ្តីនៅកម្ពុជា។

លោកបានថ្លែងបន្តទៀតថាថា សម្រាប់កិច្ចសហការនិងភាពជាដៃគូរនេះបានចាប់ផ្តើមឡើងតាំងពីឆ្នាំ២០១៩ដើម្បីលើកកម្ពស់បរិយាបន្នហិរញ្ញវត្ថុសម្រាប់ស្រ្តី និងសហគ្រិនស្រ្តីដែលបានផ្តល់ផលប្រយោជន៍ដោយផ្ទាល់ដល់ក្រុមគោលដៅប្រមាណជាង១ពាន់នាក់លើការអភិវឌ្ឍជំនាញ ការប្រើប្រាស់ប្រព័ន្ធឌីជីថលនិងហិរញ្ញវត្ថុសម្រាប់ស្ត្រី និងសហគ្រិនស្រ្តី។

«ជាមួយគ្នានេះយើងក៏បានធ្វើការសិក្សាស្រាវជ្រាវលើតម្រូវការ និងកាលានុវត្តភាពផ្នែកឌីជីថល និងបិរយាបន្នហិរញ្ញវត្ថុសម្រាប់ស្រ្តីនៅជនបទ រួមទាំងការរៀបចំកិច្ចសន្ទនា និងកម្មវិធីពិគ្រោះយោបល់ផ្នែកគោលនយោបាយ និងកម្មវិធីផ្សព្វផ្សាយដើម្បីលើកកម្ពស់ការគាំទ្រពីក្រសួង ស្ថាប័ន សហគមន៍ គ្រួសារ និងដៃគូរពាក់ព័ន្ធ»។ នេះបើយោងតាមលោកស្រី អ៊ឹង កន្ថាផាវី៕