ព័ត៌មានអន្ដរជាតិ

តម្លៃប្រេងធ្លាក់ចុះ ជុំវិញកង្វល់តម្រូវការទាបនៅចិន

បានផុស

២ years មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

តម្លៃប្រេងកុងត្រាសម្រាប់ខែកញ្ញា បានធ្លាក់ចុះក្នុងការជួញដូរនៅថ្ងៃព្រហស្បតិ៍នេះ ជុំវិញកង្វល់ពាក់ព័ន្ធនឹងកម្សោយនៃតម្រូវការនៅចិន ដែលជាប្រទេសនាំចូលប្រេងឆៅធំជាងគេបំផុតរបស់ពិភពលោក និងក្ដីសង្ឃឹមនៃបទឈប់បាញ់នៅហ្គាហ្សា ដែលអាចបន្ធូរបន្ថយការរំខានផ្នែកផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៣៨ សេន ឬ ០,៥ ភាគរយ ដោយជួញដូរនៅតម្លៃ ៨១,៣៣ ដុល្លារ/បារ៉ែល នៅព្រឹកថ្ងៃព្រហស្បតិ៍នេះ។ ចំណែកឯប្រេងឆៅនាពេលអនាគតរបស់អាមេរិក ម៉ាក WTI វិញ បានធ្លាក់ចុះ ៣៣ សេន ឬ ០,៤ ភាគរយ នៅត្រឹម ៧៧,២៦ ដុល្លារ/បារ៉ែល។

តម្លៃប្រេងទាំង២កើនឡើងតិចតួចក្នុងការជួញដូរកាលពីថ្ងៃពុធ ក្រោយរដ្ឋបាលព័ត៌មានថាមពលអាមេរិក (EIA) បាននិយាយថា ស្តុកប្រេងឆៅរបស់សហរដ្ឋអាមេរិកបានធ្លាក់ចុះចំនួន ៣,៧ លានបារ៉ែលកាលពីសប្តាហ៍មុន ដែលនេះលើសជាងការរំពឹងទុក ១,៦ លានបារ៉ែល របស់អ្នកវិភាគ។

ជារឿយៗ តម្លៃប្រេងតែងកើនឡើង នៅពេលទិន្នន័យបង្ហាញពីការធ្លាក់ចុះនៃស្តុកប្រេងអាមេរិក។ យ៉ាងណាមិញ សម្រាប់ការជួញដូរនាថ្ងៃព្រហស្បតិ៍នេះ អ្នកជំនាញលើកឡើងប្រាប់រ៉យទ័រថា វិនិយោគិននៅតែមានការប្រុងប្រយ័ត្នចំពោះការចុះខ្សោយនៃតម្រូវការនៅក្នុងប្រទេសចិន និងក្ដីរំពឹងពីកិច្ចចរចាបទឈប់បាញ់រវាងអ៊ីស្រាអែល និងក្រុមហាម៉ាស ដែលនេះជាកត្តាធ្វើឱ្យតម្លៃប្រេងធ្លាក់ចុះ។

យោងតាមទិន្នន័យរបស់រដ្ឋាភិបាលចិន ការនាំចូលប្រេង និងដំណើរការរោងចក្រចម្រាញ់របស់ប្រទេសចិនសម្រាប់ឆ្នាំនេះ មាននិន្នាការទាបជាងឆ្នាំ ២០២៣ ដោយសារតែតម្រូវការប្រេងទាប ចំពេលកំណើនសេដ្ឋកិច្ចបន្តដើរអូសជើង។

នៅឯមជ្ឈិមបូព៌ាវិញ កិច្ចខិតខំប្រឹងប្រែងដើម្បីសម្រេចបានកិច្ចព្រមព្រៀងបទឈប់បាញ់ ដើម្បីបញ្ចប់សង្គ្រាមនៅតំបន់ហ្គាហ្សាស្ទ្រីបរវាងអ៊ីស្រាអែល និងក្រុមសកម្មប្រយុទ្ធហាម៉ាស ក្រោមផែនការរបស់អាមេរិក ខណៈការសម្របសម្រួលដោយអេហ្ស៊ីប និងកាតា ក៏ហាក់ទទួលបានសន្ទុះជាវិជ្ជមានក្នុងរយៈពេល១ខែកន្លងមកនេះ៕

Related Topics:តម្លៃប្រេង