ហាងឆេងមាសបន្តមានកំណើនជាង ៣ ពាន់ដុល្លារ ក្នុងមួយតម្លឹង

តម្លៃមាសតាមបណ្ដាហាងនានានៅក្នុងរាជធានីភ្នំពេញស្ថិតក្នុងរង្វង់ ៣០០ ដុល្លារ ក្នុងមួយជី។ អ្នកជំនាញយល់ថា ទំនោរហាងឆេងមាសនឹងមានការកើនឡើងបន្តទៀត បន្ទាប់ពីហក់​ឡើង​ខ្លាំង​​​កាលពីថ្ងៃសុក្រ​សប្ដាហ៍មុន។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities បានឱ្យដឹងនៅថ្ងៃទី ២០ ខែសីហា ឆ្នាំ ២០២៤ នេះថា មូលហេតុ​ដែលធ្វើ​ឱ្យតម្លៃ​មាស​កើនឡើង ដោយសារទំនុកចិត្តរបស់អ្នកវិនិយោគ ពោលគឺ ធនាគារកណ្ដាលអាមេរិកនឹងកាត់​បន្ថយ​​អត្រា​ការ​​ប្រាក់ពី ០.២៥ ទៅ ០.៥០ នៅថ្ងៃទី ១៨ ខែកញ្ញាខាងមុខ។

បើតាមលោក ឡុង សំណាង ការប្រកាសកាត់បន្ថយអត្រាការប្រាក់​ធ្វើឱ្យអ្នកអ្នកវិនិយោគអស់​ទំនុកចិត្ត​លើលុយដុល្លារ ដោយពួកគាត់​នឹង​ដក​លុយ​ពីធនាគារដែលគាត់ធ្លាប់វិនិយោគលើប្រាក់​ដុល្លារ​យក​ទៅទិញតម្លៃហាង​ឆេងមាស​វិញ។

ម្យ៉ាងទៀតកត្តា ភូមិសាស្ត្រនយោបាយ និងសង្គ្រាមរបស់អ៊ីស្រាអែល និងអ៊ីរ៉ង់ កំពុងឡើងកម្ដៅខ្លាំង ដូច្នេះសញ្ញាណ ភូមិស្ត្រនយោបាយមិនល្អ ដែលរុញច្រានឱ្យតម្លៃហាងឆេងមាស​កើនឡើងខ្លាំង​ដែរ។

បច្ចុប្បន្ន នៅកម្ពុជាតម្លៃហាងឆេងមាសនៅលើទីផ្សារលក់ចេញ ៣​​០១២ ដុល្លារក្នុងមួយតម្លឹង ចំណែកឯទីផ្សារអន្តរជាតិ ២៥០០ ដុល្លារក្នុងមួយអោន៕

អត្ថបទ៖ ឡេង ដេត