រដ្ឋាភិបាលដាក់គម្រោងសាងសង់ផ្លូវ ទៅតំបន់កន្ទុយនាគជាគម្រោងអាទិភាព

មន្ត្រីជំនាញ នៃក្រសួងសាធារណការ និងជញ្ជូន បានចុះពិនិត្យផ្លូវជាតិលេខ៧៨-៥(ផ្លូវទៅ​កាន់​តំ​បន់​កន្ទុយនាគ) ប្រវែង ១៦៦ គីឡូម៉ែត្រ ជាបន្តបន្ទាប់ ខណៈក្រុមហ៊ុនសាងសង់បាន​ចុះសិក្សា​គម្រោងសាងសង់ផ្លូវនេះរួចហើយ។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី ១៥ ខែកញ្ញា ឆ្នាំ ២០២៤ នេះថា ផ្លូវលេខ៧៨-៥ ត្រូវបានចែកចេញជា៤កំណាត់ស្ថិត​ក្រោមការថែទាំរបស់​មន្ទីរសាធារណការ​ និងដឹកជញ្ជូន ខេត្តរតនគិរី។

កំណាត់ទី១៖ កម្រាលកៅស៊ូ DBST មានប្រវែង ២១,៩៥ គម ទទឹង១៤ម ចាប់ពី ផ្លូវបំបែកផ្លូវជាតិលេខ ៧៨ (គ.ម ១២៣+២៥០)សង្កាត់ឡាបានសៀក ក្រុងបានលុង ខេត្តរតនគិរី ដល់ គ.ម ២១+៩៥០ ភូមិស្វាយ ឃុំប៉ូយ ស្រុកអូរជុំ។

កំណាត់ទី ២៖ កម្រាលដីល្បាយថ្ម មានប្រវែង ២៤,០៩ គម ទទឹង ៧ម ចាប់ពី គ.ម ២១+៩៥០ ភូមិស្វាយ ឃុំប៉ូយ ស្រុកអូរជុំដល់ គ.ម ៤៦+០៤០ ឃុំតាវែងលើ ស្រុកតាវែង ខេត្តរតនគិរី។

កំណាត់ទី ៣៖ កម្រាលកៅស៊ូ DBST មានប្រវែង ១.០០ គម ទទឹង ១០ម ចាប់ពី គ.ម ៤៦+០៤០ ឃុំតាវែងលើ ស្រុកតាវែង ខេត្តរតនគិរី ដល់ គ.ម ៤៧+០៤០ ឃុំតាវែងលើ ស្រុកតាវែង ខេត្តរតនគិរី។ កំណាត់ទី ៤៖ កម្រាលដីធម្មជាតិ មានប្រវែង ១១៨,៩៦ គម រាជរដ្ឋាភិបាលកំពុង​គិតគូជា​គម្រោងអាទិភាព៕