ក្រុមហ៊ុនបោះផ្សាយលក់មូលបត្រ ប្រមូលទុនប្រមាណ ៤០០ លានដុល្លារ

លោក ស៊ូ សុជាតិ អគ្គនាយកនិយ័តករមូលបត្រកម្ពុជា មានប្រសាសន៍ថា គិតមកដល់ឆ្នាំ ២០​២៤ មានក្រុមហ៊ុនចំនួន​២៣ ដែលបានចុះបញ្ជីនៅផ្សារមូលបត្រកម្ពុជា ប្រមូលទុនបានប្រមាណ ៤០០ ​លានដុល្លារ ដែលបានបាញ់បញ្ចូលទៅក្នុងចរន្តសេដ្ឋកិច្ច។

លោក ស៊ូ សុជាតិ លើកឡើងនៅក្នុងពិធីចុះហត្ថលេខាលើអនុស្សារណៈនៃការយោគ​យល់គ្នាស្ដី​ពី​កិច្ច​សហប្រតិបត្តិការលើការលើកកម្ពស់ការយល់ដឹង និងជំរុញការចូលរួមអភិវឌ្ឍវិស័យមូលបត្រ​នៅកម្ពុជារវាង និយ័តករ​មូល​​​​​​បត្រកម្ពុជា និងសមាគមសហព័ន្ធអ្នកវិនិយោគកម្ពុជា នៅថ្ងៃទី ១៧ ខែកញ្ញា ឆ្នាំ ២០២៤។

លោក ស៊ូ សុជាតិ មានប្រសាសន៍បន្តថា ទំហំទីផ្សារមូលបត្រមានទឹកប្រាក់ ២,៧៣ ពាន់លាន​ដុល្លារ ដែលមានក្រុមហ៊ុនចុះបញ្ចីលក់មូលបត្រកម្មសិទ្ធចំនួន ១១ ក្រុមហ៊ុន ដែលោកអះ​អាងថា តួលេខ​​នេះនៅតូចដែលមិនទាន់ឆ្លុះពីការពិតនៃទំហំទីផ្សារដែលមានក្រុមហ៊ុននៅកម្ពុជា។

លោក ស៊ូ សុជាតិ បញ្ជាក់ថា៖ «ក្រុមហ៊ុនមួយដែលបានមកចុះបញ្ជី មិនត្រឹមតែទទួល​បានសាច់​ប្រាក់​​នោះទេ តែក៏ជាក្រុមហ៊ុនមួយដែលចូលរួមជាមួយប្រទេសជាតិ ដើម្បីបង្ហាញទំហំទីផ្សារ​កម្ពុជា​​​ភាព​ធំទូលាយនៃទីផ្សារជាចំណុចដែលទាក់ទាញបំផុតដើម្បីឱ្យគេចូលមកវិនិយោគ»។

លោក លើកទឹកចិត្តឱ្យវិស័យឯកជនចូលរួមចុះបញ្ជីនៅផ្សារមូលបត្រកម្ពុជា និងអំពាវនាវ​ឱ្យសា​ធារ​​​ណៈ​​ជនសិក្សាវិនិយោគក្នុងវិស័យមូលត្រនៅកម្ពុជា។

បើតាមលោក ស៊ូ សុជាតិ បរិមាណជួញដូរភាគហ៊ុនប្រចាំថ្ងៃ បានកើនដល់ចន្លោះពី ២០ ម៉ឺន​ដុល្លារ ទៅ ៣០ ម៉ឺនដុល្លារ ក្នុងមួយថ្ងៃ ដែលមានអតិថិជនប្រមាណ ១ ពាន់ នាក់ ចូលទៅក្នុង​ទីផ្សា​រ​​ហើយជួញដូរ។

លោក ស៊ូ សុជាតិ បន្តថា ទីផ្សារមូលបត្រគឺជាប្រភពឱកាសសម្រាប់យើងគ្រប់គ្នា សម្រាប់ការ​សិក្សា​ពីវិស័យហិរញ្ញវត្ថុ និងជាប្រភពឱកាសសម្រាប់ការវិនិយោគផ្ទាល់ ដែលយើងអាច​ធ្វើពិពិធ​កម្ម​វិនិយោគដែលអាចបង្កើនចំណូល និងកាត់បន្ថយហានិភ័យតាមរយៈការវិនិយោគទីផ្សារមួយដែលមានភាពច្បាស់លាស់ស្របតាមច្បាប់។

និយ័តករមូលបត្រកម្ពុជា នៅថ្ងៃទី ១៧ ខែកញ្ញា ឆ្នាំ ២០២៤ បានចុះហត្ថលេខា​លើអនុស្សា​រណៈ​នៃ​ការយោគ​យល់គ្នាស្ដី​ពី​កិច្ច​សហប្រតិបត្តិការលើការលើកកម្ពស់ការយល់ដឹង និងជំរុញការ​ចូលរួម​​​អភិវឌ្ឍវិស័យ​មូលបត្រកម្ពុជា។

អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា មានប្រសាសន៍ថា ការចុះ អនុស្សារណៈនៃការ យោគ​​យល់នេះ មានបំណងផ្ដោតលើការផ្សព្វផ្សាយ អំពីការយល់ដឹងដល់​សមាជិក​​សមាជិការសហព័ន្ធ និងជំរុញការលើកកម្ពស់ការអភិវឌ្ឍមូលបត្រនៅកម្ពុជា៕

អត្ថបទ៖ ឡេង ដេត