សេដ្ឋកិច្ច

កម្ពុជាចុះ MOU សម្រួលការនាំចេញសំបុកត្រចៀកកាំទៅទីផ្សារចិន

បានផុស

២ years មុន

នៅ

ថ្ងៃព្រហស្បតិ៍ ២៦ កញ្ញា ២០២៤

ដោយ

អគ្គនាយកដ្ឋានគយចិនគ្រោងសម្រេចអនុញ្ញាតឱ្យកម្ពុជានាំចេញផលិតផលសំបុកត្រចៀកកាំទៅកាន់ទីផ្សាររបស់ខ្លួននៅចុងឆ្នាំ ២០២៤ ឆាប់ៗខាងមុខនេះ ដែលជាការបើកផ្លូវថ្មីមួយទៀតសម្រាប់ផលិតផលរបស់កម្ពុជា បន្ទាប់ពីប្រទេសមហាអំណាចសេដ្ឋកិច្ចក្នុងតំបន់មួយនេះបានអនុញ្ញាតនាំចូលនូវផលិផលកសិកម្មមួយចំនួនរួចទៅហើយ។

លោក ស៊ុយ កុកធាន ប្រធានសមាគមត្រចៀកកាំខ្មែរ ប្រាប់កម្ពុជាថ្មីនៅថ្ងៃទី ២៦ ខែកញ្ញា ឆ្នាំ ២០២៤ នេះថា អគ្គនាយកដ្ឋានគយចិននឹងសម្រេចអនុញ្ញាតឱ្យកម្ពុជានាំចេញសំបុកត្រចៀកកាំដោយផ្ទាល់ទៅទីផ្សារចិននៅពេលឆាប់ៗខាងមុខនេះ។

លោក ស៊ុយ កុកធាន៖ «ឥឡូវចិនមិនទាន់អនុញ្ញាតឱ្យនាំចូលសំបុកត្រចៀកកាំពីកម្ពុជាជាផ្លូវការនៅឡើយទេ ប៉ុន្តែសមាគមបានចុះអនុស្សារណៈយោគយល់ជាមួយរដ្ឋបាលគយចិន នៅខេត្តគ័ងហ្ស៊ី ដើម្បីសម្របសម្រួលការនាំចេញសំបុកត្រចៀកកាំ»។

លោក ស៊ុយ កុកធាន សង្ឃឹមថា ការនាំចេញសំបុកត្រចៀកកាំទៅទីផ្សារចិន នឹងឈានដល់កិច្ចព្រមព្រៀងចុងក្រោយ នៅដំណាច់ឆ្នាំ ២០២៤។

បើតាមលោក ស៊ុយ កុកធាន សម្រាប់តម្លៃសំបុកត្រចៀកកាំ ដែលប្រមូលទិញមិនទាន់ដឹងថា ប៉ុន្មាននោះទេ ប៉ុន្តែលោកបញ្ជាក់ថា តម្លៃសំបុកត្រចៀកកាំនៅទីផ្សារចិនដែលកែច្នៃហើយ មានតម្លៃខ្ពស់ ចាប់ពី ១៧០០ ដុល្លារ ដល់ជាង ២០០០ ដុល្លារអាមេរិកក្នុងមួយគីឡូក្រាម។

ផលិតកម្មសំបុកត្រចៀកកាំនៅកម្ពុជា ភាគច្រើនផលិតនៅខេត្តជាប់មាត់សមុទ្រ ដូចជា ខេត្តកំពត ខេត្តកោះកុង ប៉ុន្តែសក្ដានុពលសម្រាប់ការវិនិយោគបន្ត បច្ចុប្បន្ន បានប្ដូរមកខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញបឹងទន្លេសាប ខេត្តស្ទឹងត្រែង និងព្រះវិហារវិញ ដោយសារខេត្តជាប់មាត់សមុទ្រ មានការសាងសង់ច្រើនលើសលប់។

តាមការប៉ាន់ស្មានកម្ពុជាផលិតបានសំបុកត្រចៀកកាំប្រមាណ ១០០ តោន ក្នុងមួយឆ្នាំ ដែលផលិតផលទាំងនេះ ត្រូវបានកែច្នៃក្នុងស្រុក និងនាំចេញទៅប្រទេសជិតខាង ដែលមានអាជ្ញាបណ្ណនាំចេញទៅចិន។

សូមជំរាបផងដែរថា សមាគមត្រចៀកកាំខ្មែរ នៅថ្ងៃទី ២៦ ខែកញ្ញា ឆ្នាំ ២០២៤ បានចុះអនុស្សារណៈយោគយល់ជាមួយរដ្ឋបាលគយចិន នៅខេត្តគ័ងហ្ស៊ី ទីក្រុង ណាននីង ប្រទេសចិន ក្នុងគោលដៅសម្រួលការនាំចូលផលិតផលសំបុកត្រចៀកកាំទៅទីផ្សារចិន៕